മുംബൈ: പ്രമുഖ ഷൂ നിർമ്മാതാക്കളായ ബാറ്റ ഇന്ത്യയുടെ 2022 സെപ്റ്റംബറിൽ അവസാനിച്ച രണ്ടാം പാദത്തിലെ ഏകീകൃത അറ്റാദായം 47.44 ശതമാനം വർധിച്ച് 54.82 കോടി രൂപയായി. ഒരു വർഷം മുമ്പ് ജൂലൈ-സെപ്റ്റംബർ പാദത്തിൽ കമ്പനി 37.18 കോടി രൂപ അറ്റാദായം നേടിയതായി ബാറ്റ ഇന്ത്യ ലിമിറ്റഡ് ബിഎസ്ഇ ഫയലിംഗിൽ അറിയിച്ചു.
അവലോകന പാദത്തിൽ പ്രവർത്തനങ്ങളിൽ നിന്നുള്ള വരുമാനം 829 കോടി രൂപയായി. കഠിനമായ പ്രവർത്തന അന്തരീക്ഷവും ഗണ്യമായ മെറ്റീരിയൽ പണപ്പെരുപ്പവും ഉണ്ടായിരുന്നിട്ടും, റീട്ടെയിൽ / ഫ്രാഞ്ചൈസി / ഡിസ്ട്രിബ്യൂഷൻ / ഇ-കോം എന്നിവയുടെ ബിസിനസ്സ് ചാനലുകളിലുടനീളം വിശാലമായ വോളിയം അടിസ്ഥാനമാക്കിയുള്ള വരുമാന വളർച്ച കൈവരിക്കാൻ കമ്പനിക്ക് കഴിഞ്ഞതായി ബാറ്റ ഇന്ത്യ അതിന്റെ വരുമാന പ്രസ്താവനയിൽ പറഞ്ഞു.
സെപ്റ്റംബർ പാദത്തിൽ ബാറ്റ ഇന്ത്യയുടെ ആകെ ചെലവ് 769.56 കോടി രൂപയായി വർധിച്ചു. കൂടാതെ ഈ കാലയളവിൽ ബാറ്റയുടെ വിതരണ ചാനൽ 1,100-ലധികം പട്ടണങ്ങളിലേക്ക് കുടി വ്യാപിപ്പിച്ചു. മൊത്തം വിൽപ്പനയുടെ 11 ശതമാനം സംഭാവന നൽകിയ ഡിജിറ്റൽ ബിസിനസ്സ് അതിന്റെ ഏറ്റവും ഉയർന്ന വരുമാനമായ 95 കോടി രൂപ കൈവരിച്ചു.
മെച്ചപ്പെട്ട ഉപഭോക്തൃ വികാരമാണ് ഫലങ്ങളിൽ പ്രതിഫലിക്കുന്നതെന്ന് ബാറ്റ ഇന്ത്യ എംഡിയും സിഇഒയുമായ ഗുഞ്ജൻ ഷാ പറഞ്ഞു. ബാറ്റ ഇന്ത്യയുടെ ഓഹരി ബിഎസ്ഇയിൽ 1.73 ശതമാനം ഇടിഞ്ഞ് 1,749.20 രൂപയിൽ എത്തി.
