ഡൽഹി: 2022 സാമ്പത്തിക വർഷത്തിൽ ആപ്പിൾ ഇന്ത്യയുടെ ഏകീകൃത വരുമാനം 4.03 ബില്യൺ ഡോളർ (33,381 കോടി രൂപ) എന്ന എക്കാലത്തെയും ഉയർന്ന നിരക്കിലെത്തി. പ്രീമിയം സ്മാർട്ട്ഫോണുകൾക്കുള്ള ശക്തമായ ഡിമാൻഡിന്റെ പശ്ചാത്തലത്തിൽ ഇത് കഴിഞ്ഞ വർഷത്തേക്കാൾ ഏകദേശം 45 ശതമാനം ഉയർന്നു.
കൂടാതെ അറ്റാദായം 3 ശതമാനം ഉയർന്ന് 150 മില്യൺ ഡോളറായതായി (1,263 കോടി രൂപ) കമ്പനിയുടെ ഫയലിംഗുകൾ കാണിക്കുന്നു. ഈ കാലയളവിൽ ഐഫോൺ വിൽപ്പനയുടെ കാര്യത്തിൽ ഇന്ത്യ പുതിയ സർവകാല റെക്കോർഡ് സ്ഥാപിച്ചതായി ഫലങ്ങൾ പ്രഖ്യാപിച്ചുകൊണ്ട് ആപ്പിളിന്റെ ചീഫ് ഫിനാൻഷ്യൽ ഓഫീസർ ലൂക്കാ മേസ്ത്രി പറഞ്ഞു.
അവലോകന കാലയളവിൽ ആപ്പിളിന്റെ ഐഫോൺ ബിസിനസിന്റെ അറ്റ വിൽപ്പന 10 ശതമാനം വർധിച്ച് 42.6 ബില്യൺ ഡോളറായി. അതേസമയം കമ്പനിയുടെ മൊത്തം ചെലവുകൾ മുൻ വർഷത്തെ 2.58 ബില്യൺ ഡോളറിൽ നിന്ന് (21,297 കോടി രൂപ) 49 ശതമാനം വർധിച്ച് 3.84 ബില്യൺ ഡോളറായി (31,693 കോടി രൂപ).
ഇന്ത്യയിൽ ഐഫോൺ 14ന്റെ നിർമ്മാണം ആരംഭിച്ചതായി ആപ്പിൾ കഴിഞ്ഞ മാസം പ്രഖ്യാപിച്ചിരുന്നു. കൂടാതെ നിലവിൽ പ്രീമിയം സ്മാർട്ട്ഫോൺ വിപണിയിൽ ആപ്പിൾ ഇന്ത്യയ്ക്ക് 37 ശതമാനം വിപണി വിഹിതമുണ്ട്.
