ബ്രസൽസ്: ആപ്പിൾ ഇങ്കിന്റെ അടുത്ത തലമുറ മൊബൈൽ ഓപ്പറേറ്റിംഗ് സിസ്റ്റമായ ഐഒഎസ് 27 യൂറോപ്യൻ ഉപയോക്താക്കൾക്ക് വലിയ മാറ്റങ്ങൾ കൊണ്ടുവരാനൊരുങ്ങുന്നതായി റിപ്പോർട്ട്. അടുത്ത മാസം നടക്കുന്ന ആപ്പിളിന്റെ വേൾഡ്വൈഡ് ഡെവലപ്പേഴ്സ് കോൺഫറൻസ് (WWDC) 2026ൽ പുതിയ സോഫ്റ്റ്വെയര് പതിപ്പ് അവതരിപ്പിക്കുമെന്നാണ് പ്രതീക്ഷിക്കുന്നത്.
ഇതിനിടെ, ആപ്പിൾ തങ്ങളുടെ പ്രശസ്തമായ എയർപ്ലേ സാങ്കേതികവിദ്യയ്ക്ക് പകരമായി തേർഡ് പാർട്ടി മീഡിയ കാസ്റ്റിംഗ് സംവിധാനങ്ങൾക്കും പിന്തുണ നൽകുമെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ഇതിൽ പ്രധാനമായി ഗൂഗിൾ കാസ്റ്റ് ഉൾപ്പെടും.
അമേരിക്കൻ മാധ്യമമായ ബ്ലൂംബെർഗിന്റെ റിപ്പോർട്ടർ മാർക്ക് ഗുർമാന്റെ പവർ ഓൺ ന്യൂസ് ലെറ്ററിലാണ് ഈ വിവരങ്ങൾ പുറത്തുവന്നത്. റിപ്പോർട്ടിന്റെ അടിസ്ഥാനത്തിൽ, യൂറോപ്യൻ യൂണിയന്റെ ഡിജിറ്റൽ മാർക്കറ്റ്സ് ആക്ട് നിയമങ്ങൾ പാലിക്കുന്നതിനായാണ് ആപ്പിൾ ഈ നീക്കം നടത്തുന്നത്. ഉപയോക്താക്കൾക്ക് കൂടുതൽ സ്വാതന്ത്ര്യവും മത്സര സാധ്യതകളും ഉറപ്പാക്കുക എന്നതാണ് യൂറോപ്യൻ യൂണിയന്റെ പുതിയ നിയമത്തിന്റെ ലക്ഷ്യം.
ഇതോടെ, യൂറോപ്യൻ രാജ്യങ്ങളിലെ ഐഫോൺ ഉപയോക്താക്കൾക്ക് ഫോട്ടോകൾ, വീഡിയോകൾ, സംഗീതം എന്നിവ ടിവികളിലേക്കോ സ്പീക്കറുകളിലേക്കോ സ്ട്രീം ചെയ്യുന്നതിനായി എയർപ്ലേ മാത്രം ആശ്രയിക്കേണ്ട സാഹചര്യം മാറും. ഗൂഗിൾ കാസ്റ്റ് പോലുള്ള മറ്റു മീഡിയ സ്ട്രീമിംഗ് സംവിധാനങ്ങളും നേരിട്ട് ഉപയോഗിക്കാൻ കഴിയുമെന്ന് റിപ്പോർട്ടുകൾ സൂചിപ്പിക്കുന്നു. എന്നാൽ ഈ സൗകര്യം യൂറോപ്യൻ യൂണിയൻ രാജ്യങ്ങളിൽ മാത്രം പരിമിതപ്പെടാനാണ് സാധ്യത.
ഇതിന് മുമ്പും യൂറോപ്യൻ നിയമങ്ങൾ പാലിക്കുന്നതിനായി ആപ്പിൾ നിരവധി മാറ്റങ്ങൾ കൊണ്ടുവന്നിരുന്നു. ആപ്പ് സ്റ്റോറിൽ എമുലേറ്റർ ആപ്പുകൾക്ക് അനുമതി നൽകിയതും അതിലൊന്നാണ്. പിന്നീട് ഈ സൗകര്യം മറ്റു രാജ്യങ്ങളിലേക്കും വ്യാപിപ്പിക്കപ്പെട്ടു.
അതേസമയം, iOS 27-ൽ നിരവധി പുതിയ സവിശേഷതകൾ കൂടി ഉൾപ്പെടുമെന്നാണു സൂചനകൾ. സിരിയുടെ പുതുക്കിയ രൂപകൽപ്പന, ഷോർട്ട്കട്സ് ആപ്പിന്റെ നവീകരണം, എഐ അടിസ്ഥാനമാക്കിയ വാൾപേപ്പർ ജനറേറ്റർ, മെച്ചപ്പെടുത്തിയ റൈറ്റിംഗ് ടൂൾസ്, ജെൻമോജി, ഇമേജ് പ്ലേഗ്രൌണ്ട് ഫീച്ചറുകളുടെ അപ്ഗ്രേഡ് എന്നിവയും ഉൾപ്പെടും.
എയർപോഡ്സ് ക്രമീകരണ ഇന്റർഫേസിലും മാറ്റങ്ങൾ പ്രതീക്ഷിക്കപ്പെടുന്നു. ജൂൺ 8 മുതൽ 12 വരെ നടക്കുന്ന ആപ്പിളിന്റെ വേൾഡ്വൈഡ് ഡെവലപ്പേഴ്സ് കോൺഫറൻസ് (WWDC) 2026 സമ്മേളനത്തിൽ ഐഒഎസ് 27 ഔദ്യോഗികമായി പരിചയപ്പെടുത്തുമെന്ന് കരുതപ്പെടുന്നു.
തുടർന്ന് 2026-ലെ മൂന്നാം പാദത്തിൽ അപ്ഡേറ്റ് പൊതുജനങ്ങൾക്ക് ലഭ്യമാകാനാണ് സാധ്യത.
