അനിൽ അംബനിയുടെ റിലയൻസ് ഇൻഫ്രാസ്ട്രക്ചർ റിയൽ എസ്റ്റേറ്റ് മേഖലയിലേക്ക്

മുംബൈ: കഴിഞ്ഞ കുറച്ചു മാസങ്ങളായി ബിസിനസ് ലോകത്തെ ചൂടുള്ള വിഷയമാണ് അനിൽ അംബാനി. വർഷങ്ങൾക്കു മുമ്പ് വിദേശ കോടതിയിൽ തന്റെ പാപ്പരത്വം പ്രഖ്യാപിച്ച മുകേഷ് അംബാനിയുടെ സഹോദരൻ നടത്തുന്ന നീക്കങ്ങൾ വളരെ ശ്രദ്ധേയമാണ്.

അനിൽ അംബാനിയുടെ റിലയൻസ് ക്യാപിറ്റലിനായുള്ള ആദ്യ ഗഡു ഹിന്ദുജ ഗ്രൂപ്പിന്റെ ഐഐഎച്ച്എൽ അടച്ചതോടെ റെസല്യൂഷൻ പ്ലാൻ പൂർത്തിയാകുമെന്ന് ഏറെക്കുറെ വ്യക്തമായി കഴിഞ്ഞു.

നിലവിൽ അനിൽ അംബാനി ശ്രദ്ധപിടിച്ചു പറ്റുന്നത് പുതിയ കമ്പനിയുടെ പേരിലാണ്.
പുതിയ സംരംഭം വഴി അനിൽ അംബനിയുടെ റിലയൻസ് ഇൻഫ്രാസ്ട്രക്ചർ റിയൽ എസ്റ്റേറ്റ് മേഖലയിലേക്ക് ചുവടുവയ്ക്കുകയാണ്.

റിലയൻസ് ജയ് പ്രോപ്പർട്ടീസ് പ്രൈവറ്റ് ലിമിറ്റഡ് (ആർജെപിപിഎൽ) എന്ന പേരിലാണ് പുതിയ സ്ഥാപനം. കമ്പനിയുടെ പേരിലെ ജയ് എന്ന വിശേഷണം അദ്ദേഹത്തിന്റെ മക്കളെ പ്രതീനിധീകരിക്കുമെന്നു വിശ്വസിക്കപ്പെടുന്നു. ഈ വികസനം ഇതോടകം വിപണി നിരീക്ഷകരുടെ ജിജ്ഞാസ ഉണർത്തിയിട്ടുണ്ട്.

അനിൽ അംബാനിയുടെ പുതിയ നീക്കം കഴിഞ്ഞ രണ്ടു സെഷനിലും റിലയൻസ് ഇൻഫ്രാ ഓഹരികളെ തളർത്തിയിരുന്നു. നിലവിൽ റിലയൻസ ്ഇൻഫ്രാ ഓഹരികളുടെ വില 218.55 രൂപയാണ്.

52 ആഴ്ചയിലെ ഓഹരിയുടെ ഉയർന്ന നിലവാതം 308 രൂപയും, താഴ്ന്ന നിലവാരം 144.45 രൂപയുമാണ്. റിലയൻസ് ഇൻഫ്രാസ്ട്രക്ചറിന്റെ അനുബന്ധ സ്ഥാപനമായ റിലയൻസ് എനർജി ലിമിറ്റഡിന് കീഴിലാണ് പുതിയ സ്ഥാപനം ഉൾപ്പെടുന്നത്.

2024 ഓഗസ്റ്റ് 12-ന് റിലയൻസ് ജയ് പ്രോപ്പർട്ടീസ് ഔദ്യോഗികമായി സംയോജിപ്പിച്ചു. ഒരു ലക്ഷം രൂപ മൂലധനത്തിലാണ് കമ്പനിയുടെ തുടക്കം. 10 രൂപ മുഖവിലയുള്ള 10,000 ഓഹരികളാണുള്ളത്.

വളർന്നുവരുന്ന റിയൽ എസ്റ്റേറ്റ് വിപണിയിൽ തന്റെ കമ്പനിയുടെ സ്ഥാനം ഉറപ്പിക്കുന്നതിനുള്ള അനിൽ അംബാനിയുടെ ധീരമായ ചുവടുവെപ്പിനെ ആണ് പുതിയ സ്ഥാപനം സൂചിപ്പിക്കുന്നത്.

പ്രധാനമന്ത്രി ആവാസ് യോജന (പിഎംഎവൈ-യു) 2.0 യുമായി യോജിപ്പിക്കുന്ന, വിവിധ പ്രോപ്പർട്ടികൾ ഏറ്റെടുക്കുന്നതിനും വിൽക്കുന്നതിനും പാട്ടത്തിനെടുക്കുന്നതിനും വികസിപ്പിക്കുന്നതിനും റിലയൻസ് ജയ് പ്രോപ്പർട്ടീസ് ശ്രദ്ധ കേന്ദ്രീകരിക്കുന്നു.

നഗരങ്ങളിലെ ദരിദ്രർക്കും, ഇടത്തരം കുടുംബങ്ങൾക്കും താങ്ങാനാവുന്ന വിലയിൽ വീട് നൽകുക എന്നതാണ് ഈ സർക്കാർ പദ്ധതിയുടെ ലക്ഷ്യം.

പുതിയ നീക്കങ്ങൾ നടത്തിയിട്ടും റിലയൻസ് ഓഹരികൾ ഇടിഞ്ഞതിൽ ചില വിദഗ്ധരും, നിക്ഷേപകരും ആശങ്ക പ്രകടിപ്പിച്ചിട്ടുണ്ട്. പുതിയ സംരംഭത്തിന്റെ സമയവും, സ്വാധീനവുമാണ് ചർച്ച ചെയ്യപ്പെടുന്നത്.

പുതിയ സംരംഭത്തിൽ അനിൽ അംബാനി കുടുംബത്തിന് 0.17% ഓഹരി പങ്കാളിത്തം മാത്രമാണുള്ളത്. RISEE ഇൻഫിനിറ്റി പ്രൈവറ്റ് ലിമിറ്റഡാണ് പ്രബലർ, 16% ഓഹരികൾ.

പ്രൊമോട്ടർമാർ ഒന്നിച്ച് 16.50% ഓഹരി കൈവശം വച്ചിരിക്കുന്നു.