ഇന്ത്യയുടെ വളര്ച്ചക്കൊപ്പം ലോകത്തിന് മുന്നിൽ തലയെടുപ്പോടെ വളരുന്ന മറ്റൊരാളുണ്ട്. ഗൗതം അദാനി.പോയ വര്ഷം ഇന്ത്യയിൽ മാത്രമല്ല ലോകത്ത് തന്നെ ഏറ്റവും വേഗത്തിൽ ആസ്തി വളര്ത്തിയ ഒരാൾ കൂടെയായിരുന്നു അദാനി. മുകേഷ് അംബാനിയെ കടത്തി വെട്ടി ഇന്ത്യയിലെ ഏറ്റവും വലിയ സമ്പന്നൻ ആയി മാറിയ വ്യക്തി ഇപ്പോൾ ലോകത്തിലെ മൂന്നാമത്തെ വലിയ സമ്പന്നൻ ആണ്. ഇങ്ങനെ പോയാൽ അദാനി ലോകത്തെ തന്നെ വലിയ സമ്പന്നൻ ആയി മാറാൻ അധിക നാൾ ഒന്നും കാത്തിരിക്കേണ്ടി വരില്ല. ഏതാനും നാളുകൾക്കുള്ളിൽ ടെസ്ല സ്ഥാപകൻ എലൻ മസ്കിനെയും പിന്നിലാക്കുന്ന രീതിയിലാണ് അദാനിയുടെ ആസ്തി വളര്ച്ച.
12,100 കോടി ഡോളര് ആണ് ഗൗതം അദാനിയുടെ ഇപ്പോഴത്തെ ആസ്തി. ടെസ്ല സിഇഒ എലൻ മസ്കിൻെറ സമ്പത്ത് 2021 നവംബറിൽ 34000 കോടി ഡോളര് ആയിരുന്നു. ഇപ്പോൾ ഇത് 13700 കോടി ഡോളറായി കുറഞ്ഞിരിക്കുകയാണ്..അതേസമയം അദാനി വേഗത്തിൽ സമ്പത്ത് വളര്ത്തിക്കൊണ്ടുമിരിക്കുന്നു. ഒട്ടേറെ ഏറ്റെടുക്കലുകളും ബിസിനസ് വളര്ത്തലും. ‘ഏഷ്യയിലെ ഏറ്റവും തിരക്കേറിയ ഡീൽമേക്കർ ആണ് ഇപ്പോൾ അദാനി എന്നാണ് കോര്പ്പറേറ്റ് ലോകത്തെ സംസാരം തന്നെ.
ഗൗതം അദാനിയുടെ ആസ്തി കഴിഞ്ഞ ഒരു വർഷത്തിനിടെ 4400 കോടി ഡോളർ ഉയർന്നപ്പോൾ മസ്കിൻെറ ആസ്തി 13300 കോടിഡോളറായി കുറഞ്ഞു. എലൻ മസ്കിൻെറ ആസ്തി കുറയുകയും, കഴിഞ്ഞ 12 മാസത്തെ അതേ വേഗതയിൽ ഗൗതം അദാനി തൻെറ സമ്പത്ത് വര്ധിപ്പിക്കുകയും ചെയ്താൽ, ഇന്ത്യൻ വ്യവസായി അഞ്ച് ആഴ്ചയ്ക്കുള്ളിൽ അല്ലെങ്കിൽ അടുത്ത 35 ദിവസത്തിനുള്ളിൽ ആസ്തിയിൽ ട്വിറ്റർ മേധാവിയെ മറികടക്കും. അദാനി ഓഹരികളുടെ കുതിപ്പ് തുടര്ന്നാൽ ലോകത്തിലെ രണ്ടാമത്തെ വലിയ സമ്പന്നനാകാൻ അദാനിക്ക് അധികം കാത്തിരിക്കേണ്ടി വരില്ല.. മസ്കിന് പ്രതിദിനം ശരാശരി 0.36 ബില്യൺ ഡോളർ നഷ്ടമായിക്കൊണ്ടിരിക്കുമ്പോൾ, അദാനി സമ്പത്തിലേക്ക് പ്രതിദിനം 0.12 ബില്യൺ ഡോളർ കൂട്ടിച്ചേർത്തുകൊണ്ടിരിക്കുന്നു.
ഗൗതം അദാനിയുടെ നേതൃത്വത്തിലുള്ള അദാനി ഗ്രൂപ്പിൻെറ കമ്പനികളുടെ ഓഹരി വിലയിലെ കുതിച്ചുചാട്ടമാണ് കഴിഞ്ഞ വർഷം അദാനിയുടെ ആസ്തി ഉയരുന്നതിന് പിന്നിലെ പ്രധാന കാരണം. കമ്പനിയുടെ പ്രധാന ശാഖയായ അദാനി എൻറർപ്രൈസസ് 2022-ൽ ഏകദേശം 116 ശതമാനം നേട്ടം കൈവരിച്ചു. ഇത് നിക്ഷേപകരുടെ സമ്പത്ത് ഇരട്ടിയാക്കി. അദാനി പവർ ഓഹരി വില 185 ശതമാനവും അദാനി വിൽമർ ഓഹരി വില 105 ശതമാനവും നേട്ടമുണ്ടാക്കിയപ്പോൾ അദാനി ടോട്ടൽ ഗ്യാസ് ഓഹരികളുടെ വില 91 ശതമാനം ഉയർന്നു.
അദാനി ഗ്രൂപ്പിൻെറ വിപണി മൂല്യം മൂന്ന് വർഷത്തിനുള്ളിൽ ഒമ്പത് മടങ്ങ് വർദ്ധിച്ചു. ടാറ്റ ഗ്രൂപ്പിനും റിലയൻസ് ഇൻഡസ്ട്രീസിനുമൊക്കെ തൊട്ടുപിന്നിൽ ഇപ്പോൾ അദാനി എൻറര്പ്രൈസസും എത്തുന്നതാണ് കാഴ്ച. അദാനി ഗ്രൂപ്പിന്റെയും അതിന്റെ അനുബന്ധ സ്ഥാപനങ്ങളുടെയും ദ്രുതഗതിയിലുള്ള വളർച്ച അദാനിയെ ലോകത്തിലെ മൂന്നാമത്തെ സമ്പന്നനാക്കിയെങ്കിൽ ഇതേ കമ്പനികളുടെ വളര്ച്ച അദാനിയെ ലോകത്തെ ഏറ്റവും വലിയ സമ്പന്നനാക്കാനും മതി.
