മുംബൈ: മികച്ച ഒന്നാംപാദ പ്രകടനത്തിന്റെ മികവില് യാത്ര ഓഹരികള് ചൊവ്വാഴ്ച 16 ശതമാനം ഉയര്ന്നു. ഇത് തുടര്ച്ചയായ രണ്ടാം ദിവസമാണ് ഓഹരി നേട്ടത്തിലാവുന്നത്. തിങ്കളാഴ്ച ഓഹരി 20 ശതമാനം അപ്പര് സര്ക്യൂട്ടിലെത്തിയിരുന്നു.
16 കോടി രൂപയാണ് ഒന്നാംപാദത്തില് കമ്പനി രേഖപ്പെടുത്തിയ അറ്റാദായം. മുന്വര്ഷത്തെ സമാന പാദത്തെ അപേക്ഷിച്ച് 298 ശതമാനം വര്ദ്ധനവാണിത്. വരുമാനം 108.1 ശതമാനം ഉയര്ന്ന് 209.8 കോടി രൂപയായപ്പോള് എബിറ്റ 410.7 ശതമാനമുയര്ന്ന് 22.98 കോടി രൂപ.
എബിറ്റമാര്ജിന് 4.5 ശതമാനത്തില് നിന്നും 11 ശതമാനമായി ഉയര്ന്നു. കോര്പറേറ്റ് ട്രാവലിലേയും മീറ്റിംഗുകള്, ഇന്സന്റീവുകള്, കോണ്ഫറന്സുകള്, എക്സിബിഷനുകള് എന്നിവയിലേയും വര്ധനവാണ് മൊത്തം വരുമാനമുയര്ത്തിയത്.
കമ്പനി ഓഹരി കഴിഞ്ഞ മാസത്തില് 53 ശതമാനമാണുയര്ന്നത്. ലിസ്റ്റിംഗിന് ശേഷം ഓഹരിയുടെ കൂടിയ വില 157.15 രൂപയാണ്. പക്ഷെ നിലവില് ഓഹരി ഐപിഒ വിലയായ 142 രൂപയേക്കാള് താഴെയാണ്.
