വാട്സാപ്പിൽ(Whatsapp) പുതിയ കസ്റ്റം ചാറ്റ് ലിസ്റ്റ് ഫീച്ചർ(Custom Chat List Feature) എത്തിയേക്കും. ചാറ്റുകളെ ഇഷ്ടാനുസരണം വ്യത്യസ്ത ലിസ്റ്റുകളാക്കി ക്രമീകരിക്കാനാവുന്ന ഫീച്ചർ ആണിത്.
വാട്സാപ്പ് ഫീച്ചർ ട്രാക്കിങ് വെബ്സൈറ്റായ വാബീറ്റാ ഇൻഫോയാണ്(Wabeta Info) ഈ പുതിയ സൗകര്യം സംബന്ധിച്ച വിവരങ്ങൾ പങ്കുവെച്ചത്.
ഉപഭോക്താക്കൾക്ക് ഏറെ പ്രിയപ്പെട്ട ചാറ്റുകൾ മാത്രം പ്രത്യേകം വേർതിരിക്കാനും വ്യക്തികളുമായുള്ള ചാറ്റുകളും ഗ്രൂപ്പ് ചാറ്റുകളും വെവ്വേറെ ആക്കാനുമെല്ലാം ഈ സംവിധാനത്തിലൂടെ സാധിക്കും.
നിലവിൽ അൺറീഡ്, ഫേവറൈറ്റ്സ്, ഗ്രൂപ്പ്സ് എന്നിങ്ങനെയുള്ള ഫിൽറ്ററുകൾ വാട്സാപ്പിൽ ലഭ്യമാണ്.
ഇതിനൊപ്പമാണ് ഉപഭോക്താക്കളുടെ ഇഷ്ടാനുസരണം ചാറ്റുകൾ വേർതിരിക്കാനുള്ള സൗകര്യം ഒരുക്കുന്നത്. ഈ ഫീച്ചർ എത്തിയാൽ പ്രിയപ്പെട്ടവരുടെ ചാറ്റുകൾ കണ്ടെത്താൻ ചാറ്റ് ലിസ്റ്റിൽ ഒരുപാട് സ്ക്രോൾ ചെയ്യേണ്ടി വരില്ല.
വാട്സാപ്പ് ബിസിനസ് ഉപഭോക്താക്കൾക്കും ചാറ്റുകൾ ആവശ്യാനുസരണം വേർതിരിക്കാൻ ആ സൗകര്യം സഹായിക്കും.
ഇപ്പോൾ നിർമാണ ഘട്ടത്തിലിരിക്കുന്ന കസ്റ്റം ഫിൽറ്റർ ഫീച്ചർ വാട്സാപ്പിന്റെ ഭാവി അപ്ഡേറ്റുകളിലായിരിക്കും അവതരിപ്പിക്കപ്പെടുന്നത്.
