ന്യൂഡല്ഹി: നഗരങ്ങളിലെ അടിസ്ഥാന സൗകര്യങ്ങള് വികസിപ്പിക്കാനായി കേന്ദ്രസര്ക്കാര് 1 ലക്ഷം കോടി രൂപയുടെ അര്ബന് ചലഞ്ച് ഫണ്ട് പ്രഖ്യാപിച്ചു. 100,000 അധികം ജനസംഖ്യയുള്ള 300 നഗരങ്ങള്ക്കാണ് തുക അനുവദിക്കുക. ഇതിനായി നഗരങ്ങള് വികസന നിര്ദ്ദേശങ്ങള് സമര്പ്പിക്കണം.
മുനിസിപ്പല് പരിഷ്കാരങ്ങളും നൂതന ആസൂത്രണവും പ്രകടമാക്കുന്ന പദ്ധതികള്ക്ക് മുന്ഗണന നല്കും. നഗരങ്ങളെ വളര്ച്ചാ കേന്ദ്രങ്ങളാക്കുക, സൃഷ്ടിപരമായ പുനര്വികസന തന്ത്രങ്ങള് പ്രോത്സാഹിപ്പിക്കുക എന്നതാണ് ലക്ഷ്യം.
ജല, ശുചിത്വ സേവനങ്ങള് മെച്ചപ്പെടുത്തുക,ഉപയോഗശൂന്യമായ ഭൂമിയും അടിസ്ഥാന സൗകര്യങ്ങളും വികസിപ്പിക്കുക, നഗര വികാസത്തിനും മെച്ചപ്പെട്ട ജീവിത സാഹചര്യങ്ങള്ക്കുള്ള അവസരങ്ങള് തുറക്കുക എന്നിവയും ലക്ഷ്യമാണ്.
കാര്യക്ഷമമായ ഭൂവിനിയോഗം, സ്വകാര്യമേഖലയുടെ പങ്കാളിത്തം, പരിഷ്കരണാധിഷ്ഠിത വികസനം എന്നിവയില് ശ്രദ്ധ കേന്ദ്രീകരിച്ചുകൊണ്ട് ഇന്ത്യയുടെ നഗരനയത്തില് ഒരു പ്രധാന മാറ്റമാണ് ഫണ്ട് വിഭാവനം ചെയ്യുന്നത്. 2026 ന്റെ തുടക്കത്തില് നിര്ദ്ദേശങ്ങള് പരിശോധിക്കുകയും താമസിയാതെ നടപ്പാക്കല് ആരംഭിക്കുകയും ചെയ്യും.
മൊത്തം പദ്ധതി ചെലവിന്റെ 25% കേന്ദ്ര സര്ക്കാര് സംഭാവന ചെയ്യുമ്പോള് ബാക്കി 75% സംസ്ഥാന സര്ക്കാരുകളും സ്വകാര്യ മേഖല പങ്കാളികളും സമാഹരിക്കണം. പൊതു-സ്വകാര്യ പങ്കാളിത്തത്തെ പ്രോത്സാഹിപ്പിക്കുന്നതിനും നഗര വികസനത്തില് പങ്കിട്ട ഉത്തരവാദിത്തം ഉറപ്പാക്കുന്നതിനുമാണ് ഈ ഘടന രൂപകല്പ്പന ചെയ്തിരിക്കുന്നത്.
