മുംബൈ: ബ്ലുസ്മാർട് ഇലക്ട്രിക് മൊബിലിറ്റിയിൽ നിന്ന് 10,000 എക്സ്പ്രസ്-ടി ഇവി യൂണിറ്റുകൾ വിതരണം ചെയ്യുന്നതിനുള്ള ഓർഡർ ലഭിച്ചതായി ടാറ്റ മോട്ടോഴ്സ് അറിയിച്ചു. ഈ 10,000 യൂണിറ്റുകളുടെ വിതരണത്തിനുള്ള ഓർഡർ ഇന്ത്യയിലെ എക്കാലത്തെയും വലിയ ഇവി ഫ്ലീറ്റ് ഓർഡറാണെന്ന് ടാറ്റ മോട്ടോർസ് പ്രസ്താവനയിൽ പറഞ്ഞു. ഈ ഓർഡറുകളുടെ ഡെലിവറി ഉടൻ ആരംഭിക്കുമെന്ന് കമ്പനി കൂട്ടിച്ചേർത്തു. കഴിഞ്ഞ വർഷം ഒക്ടോബറിൽ ഇരു കമ്പനികളും ഒപ്പുവെച്ച 3,500 എക്സ്പ്രസ്-ടി ഇവി ഓർഡറിന് പുറമേയാണ് ഇപ്പോഴത്തെ ഓർഡർ.
മൊബിലിറ്റിയുടെ ദ്രുതഗതിയിലുള്ള വൈദ്യുതീകരണത്തിനായി തങ്ങൾ സജീവമായ ചുവടുവെപ്പുകൾ നടത്തുകയാണെന്നും, കൂടാതെ പ്രശസ്തരായ ഫ്ലീറ്റ് അഗ്രഗേറ്റർമാർ തങ്ങളോടൊപ്പം ഗ്രീൻ മൊബിലിറ്റി തരംഗത്തിൽ ചേരുന്നത് സന്തോഷകരമാണെന്നും ടാറ്റ മോട്ടോഴ്സ് അറിയിച്ചു. എക്സ്പ്രസ്-ടി ഇവികൾ രാജ്യത്തുടനീളം വിന്യസിക്കുമെന്നതിനാൽ ബ്ലൂസ്മാർട്ട് ഇലക്ട്രിക് മൊബിലിറ്റിയുമായുള്ള ബന്ധം തുടരുന്നതിൽ കമ്പനിക്ക് സന്തോഷമുണ്ടെന്ന് ടാറ്റ മോട്ടോർസ് പറഞ്ഞു.
ടാറ്റ മോട്ടോഴ്സ് ഫ്ലീറ്റ് ഉപഭോക്താക്കൾക്ക് മാത്രമായിയായിരുന്നു 2021 ജൂലൈയിൽ എക്സ്പ്രസ് ബ്രാൻഡ് പുറത്തിറക്കിയത്. ഈ ബ്രാൻഡിന് കീഴിലുള്ള ആദ്യത്തെ വാഹനമാണ് എക്സ്പ്രസ്-ടി ഇവി. തിങ്കളാഴ്ച ടാറ്റ മോട്ടോർസ് ഓഹരികൾ നേരിയ നേട്ടത്തോടെ 433 .40 രൂപയിലെത്തി.
