പ്രതിരോധ മേഖലയിലെ പ്രവര്‍ത്തനങ്ങള്‍ ശക്തിപ്പെടുത്തുന്ന തിരിക്കിലാണ് അനില്‍ അംബാനിയും, റിലയന്‍സ് ഗ്രൂപ്പും. തിരിച്ചുവരവില്‍ റിലയന്‍സ് ഗ്രൂപ്പ് കൂടുതല്‍ ശ്രദ്ധ കേന്ദ്രീകരിക്കുന്ന മേഖലകളില്‍ ഒന്നും പ്രതിരോധം തന്നെ.
അടുത്തിടെ കമ്പനി പ്രതിരോധ മേഖലയില്‍ നടത്തിയ നിക്ഷേപങ്ങള്‍, കരാറുകള്‍, സഹകരണങ്ങള്‍ എന്നിവ തന്നെ ഇതിനുള്ള ഉദാഹരണം. നിലവില്‍ റിലയന്‍സ് ഇന്‍ഫ്രാസ്ട്രക്ചറിന്റെ അനുബന്ധ സ്ഥാപനമായ റിലയന്‍സ് ഡിഫന്‍സ്, യുഎസ് കമ്പനിയുമായി ഉണ്ടാക്കിയ കരാറാണ് ശ്രദ്ധനേടുന്നത്.
യുഎസ് വമ്പന്‍മാരുമായി ചങ്ങാത്തം
യുഎസ് പ്രതിരോധ വകുപ്പിന്റെ അംഗീകൃത കരാറുകാരായ കോസ്റ്റല്‍ മെക്കാനിക്‌സുമായാണ് അനില്‍ അംബാനി പങ്കാളിത്തം പ്രഖ്യാപിച്ചിരിക്കുന്നത്. ഇന്ത്യയുടെ 20,000 കോടി രൂപയുടെ പ്രതിരോധ അറ്റകുറ്റപ്പണി, ഓവര്‍ഹോള്‍ (എംആര്‍ഒ), അപ്ഗ്രേഡ് മാര്‍ക്കറ്റ് അവസരങ്ങള്‍ മുതലെടുക്കുകയാണ് ഈ കൂട്ടുകെട്ടിന്റെ ലക്ഷ്യം.
റിലയന്‍സ് ഡിഫന്‍സും, കോസ്റ്റല്‍ മെക്കാനിക്‌സും തമ്മിലുള്ള പങ്കാളിത്തം ഇന്ത്യന്‍ സായുധ സേനയ്ക്ക് വലിയ നേട്ടമാകുമെന്നാണു വിലയിരുത്തല്‍.
തന്ത്രപരമായ പങ്കാളിത്തം
നിലവിലെ സഹകരണത്തിനെ തന്ത്രപരമായ പങ്കാളിത്തം എന്നാണു റിലയന്‍സ് ഡിഫന്‍സ് വിശേഷിപ്പിച്ചിരിക്കുന്നത്. ഇന്ത്യന്‍ സായുധ സേനയ്ക്ക് എന്‍ഡ്-ടു-എന്‍ഡ് മെയിന്റനന്‍സ്, റിപ്പയര്‍, ഓവര്‍ഹോള്‍ (എംആര്‍ഒ), അപ്ഗ്രേഡ്, ലൈഫ് സൈക്കിള്‍ സപ്പോര്‍ട്ട് സൊല്യൂഷനുകള്‍ എന്നിവ നല്‍കുന്നതിലാകും ശ്രദ്ധ.
100+ ജാഗ്വാര്‍ യുദ്ധവിമാനങ്ങള്‍, 100+ മിഗ്-29 യുദ്ധവിമാനങ്ങള്‍, അപ്പാച്ചെ ഹെലികോപ്റ്ററുകള്‍, എല്‍-70 എയര്‍ ഡിഫന്‍സ് തോക്കുകള്‍, ദീര്‍ഘകാല സുസ്ഥിരതയും ആധുനികവല്‍ക്കരണവും ആവശ്യമുള്ള മറ്റ് പാരമ്പര്യ സംവിധാനങ്ങള്‍ എന്നിവയ്ക്ക് സഹകരണം ഗുണം ചെയ്യുമെന്നു കമ്പനി പ്രതീക്ഷിക്കുന്നു.
പുതിയ പ്ലാന്റ് വരുന്നു
സഹകരണത്തിന്റെ ഭാഗമായി ഇരുവരും ചേര്‍ന്ന് മഹാരാഷ്ട്രയിലെ മിഹാനില്‍ ഒരു പുതിയ പ്ലാന്റ് സ്ഥാപിക്കുമെന്നും റിപ്പോര്‍ട്ടില്‍ വ്യക്തമാണ്. ഇന്ത്യന്‍ വിപണിയെയും, കയറ്റുമതി വിപണികളെയും ലക്ഷ്യമിട്ടുള്ള നീക്കമാണിത്.
ഇന്ത്യന്‍ സായുധ സേന ഉപയോഗിക്കുന്ന വിവിധ വ്യോമ, കര പ്രതിരോധ പ്ലാറ്റ്ഫോമുകള്‍ക്ക് ഈ പ്ലാന്റ് സേവനം നല്‍കും.
യുഎസ് വ്യോമസേനയ്ക്കും, യുഎസ് സൈന്യത്തിനും നിര്‍ണായക ഘടകങ്ങളും, സേവനങ്ങളും നല്‍കുന്ന കമ്പനിയാണ് കോസ്റ്റല്‍ മെക്കാനിക്‌സ്. റിലയന്‍സ് ഡിഫന്‍സുമായുള്ള പങ്കാളിത്തം ഇന്ത്യയുടെ എയ്റോസ്പേസ് ആവാസവ്യവസ്ഥയിലേക്കുള്ള കമ്പനിയുടെ ചുവടുവയ്പ്പു കൂടിയാണ്.
മികച്ച കയറ്റുമതിക്കാരാകാന്‍ ലക്ഷ്യം
ഇന്ത്യ രാജ്യത്തിന്റെ പ്രതിരോധ കയറ്റുമതി വര്‍ധിപ്പിക്കാന്‍ ലക്ഷ്യമിടുന്നു. നിലവില്‍ ഇന്ത്യയുടെ പ്രതിരോധ സംവിധാനങ്ങള്‍ക്ക് ആഗോള വിപണികളില്‍ മികച്ച പ്രതികരണമാണുള്ളത്. റിലയന്‍സ് ഡിഫന്‍സ് ഇന്ത്യയുടെ മുന്‍നിര പ്രതിരോധ കയറ്റുമതിക്കാരന്‍ ആകാന്‍ ലക്ഷ്യംവയ്ക്കുന്നു.
സ്വദേശ പ്രതിരോധ ഉല്‍പ്പാദനം വര്‍ദ്ധിപ്പിക്കുന്നതിനും, ഇറക്കുമതിയെ ആശ്രയിക്കുന്നത് കുറയ്ക്കുന്നതിനും ലക്ഷ്യമിട്ടുള്ള ഇന്ത്യാ ഗവണ്‍മെന്റിന്റെ ‘ആത്മനിര്‍ഭര്‍ ഭാരത്’, ‘മെയ്ക്ക് ഇന്‍ ഇന്ത്യ’ സംരംഭങ്ങളുമായി ഒത്തുപോകുന്നതാണ് അനില്‍ അംബാനിയുടെ സ്വപ്‌നം.
