കൊച്ചി: ചരിത്രപരമായ ഉയരത്തിലെത്തിയ ശേഷം ഇന്ത്യയുടെ വിദേശനാണ്യ കരുതല് ശേഖരത്തില് നേരിയ കുറവ്. റിസര്വ് ബാങ്ക് ഓഫ് ഇന്ത്യയുടെ ഏറ്റവും പുതിയ കണക്കുകള് പ്രകാരം, ഫെബ്രുവരി 20-ന് അവസാനിച്ച ആഴ്ചയില് കരുതല് ശേഖരം 2.119 ബില്യണ് ഡോളര് കുറഞ്ഞ് 723.608 ബില്യണ് ഡോളറിലെത്തി. കഴിഞ്ഞ മാസം ശേഖരം 725.727 ബില്യണ് ഡോളര് എന്ന എക്കാലത്തെയും ഉയര്ന്ന നിരക്കില് എത്തിയിരുന്നു.
കുറവിന് കാരണം സ്വര്ണവും വിദേശ കറന്സിയും
കരുതല് ശേഖരത്തിലെ പ്രധാന ഘടകമായ വിദേശ കറന്സി ആസ്തികളില് 1.039 ബില്യണ് ഡോളറിന്റെ ഇടിവാണ് രേഖപ്പെടുത്തിയത്. ഇതോടെ ഈ ആസ്തി 572.564 ബില്യണ് ഡോളറായി കുറഞ്ഞു. കൂടാതെ, സ്വര്ണ ശേഖരത്തിന്റെ മൂല്യത്തിലും 977 മില്യണ് ഡോളറിന്റെ കുറവുണ്ടായിട്ടുണ്ട്. നിലവില് സ്വര്ണശേഖരം 127.489 ബില്യണ് ഡോളറാണ്.
ആശങ്ക വേണ്ടെന്ന് ആര്ബിഐ
ഇടിവ് ആശങ്കയുണ്ടാക്കുന്നുണ്ടെങ്കിലും, രാജ്യത്തിന്റെ സ്ഥിതി ഇപ്പോഴും ശക്തമാണെന്ന് ആര്ബിഐ വ്യക്തമാക്കുന്നു. നിലവിലെ കരുതല് ശേഖരം 11 മാസത്തിലധികം ചരക്ക് ഇറക്കുമതി ചെയ്യാന് പര്യാപ്തമാണ്. രാജ്യത്തിന്റെ ബാഹ്യ സാമ്പത്തിക ആവശ്യകതകള് നിറവേറ്റാന് ഈ ശേഖരം കൊണ്ട് സാധിക്കുമെന്ന് ആര്ബിഐ അറിയിച്ചു.
കഴിഞ്ഞ രണ്ട് വര്ഷമായി വിപണിയിലെ താരം
കഴിഞ്ഞ കുറച്ചു കാലമായി വിദേശനാണ്യ ശേഖരത്തില് വലിയ വര്ദ്ധനവാണ് രേഖപ്പെടുത്തിയിരുന്നത്. 2025-ല് മാത്രം ഫോറെക്സ് കിറ്റിയില് ഏകദേശം 56 ബില്യണ് ഡോളര് വര്ദ്ധിച്ചു. 2024-ല് ഇത് 20 ബില്യണ് ഡോളറിലധികം വര്ദ്ധിച്ചിരുന്നു.
രൂപയുടെ മൂല്യം സ്ഥിരമായി നിലനിര്ത്താന് ആര്ബിഐ വിപണിയില് ഇടപെടുന്നതിന്റെ ഭാഗമായാണ് ഇത്തരം മാറ്റങ്ങള് ഉണ്ടാകുന്നത്.
