ഇന്ത്യൻ പ്രാഥമിക ഓഹരി വിപണിയിൽ (Primary Market) ഈയാഴ്ച പ്രാരംഭ പൊതുഓഹരി വിൽപ്പനയുമായി (IPO) നിക്ഷേപകരുടെ മുന്നിലേക്ക് കടന്നെത്തുന്നത് ആറ് കമ്പനികളാണ്.
പ്രതിരോധ ഇലക്ട്രോണിക്സ്, മാനുഫാക്ചറിംഗ് പ്ലാറ്റ്‌ഫോം, പവർ ട്രാൻസ്മിഷൻ, മെഡിക്കൽ ഉപകരണങ്ങൾ, കസ്റ്റമർ എക്സ്പീരിയൻസ് സേവനങ്ങൾ, അഗ്നിസുരക്ഷാ സംവിധാനങ്ങൾ തുടങ്ങി വൈവിധ്യമാർന്ന മേഖലകളിൽ പ്രവർത്തിക്കുന്ന കമ്പനികളാണ് മെയിൻബോർഡ് വിഭാഗത്തിൽ ഐ.പി.ഒ അവതരിപ്പിക്കുന്നത്. ഇവയുടെ ഓഹരികൾ ബി.എസ്.ഇ, എൻ.എസ്.ഇ തുടങ്ങിയ ദേശീയ എക്സ്ചേഞ്ചുകളിൽ ലിസ്റ്റ് ചെയ്യും.
മൊത്തം 10,000 കോടിയിലധികം രൂപ സമാഹരിക്കാനാണ് ഈ പബ്ലിക് ഇഷ്യൂകളിലൂടെ ലക്ഷ്യമിടുന്നത്. 2026 ഒക്ടോബർ 13 മുതൽ 19 വരെയുള്ള തീയതികളിലാണ് സബ്‌സ്‌ക്രിപ്ഷൻ നടക്കുക.
ഒക്ടോബർ 21 മുതൽ 23 വരെയുള്ള ദിവസങ്ങളിൽ ഈ ഓഹരികൾ വിപണിയിൽ ലിസ്റ്റ് ചെയ്യപ്പെടും. ഇതിൽ നാല് കമ്പനികൾ പൂർണമായും ഓഫർ ഫോർ സെയിൽ (OFS) വഴിയാണ് ഓഹരികൾ വിറ്റഴിക്കുന്നത്.
അതുകൊണ്ട് തന്നെ ഈ ഇഷ്യൂകളിൽ നിന്നുള്ള തുക കമ്പനികൾക്ക് ലഭിക്കില്ല, നിലവിലെ പ്രൊമോട്ടർമാർക്കും നിക്ഷേപകർക്കുമായിരിക്കും ലഭിക്കുക.
ഈയാഴ്ച മെയിൻബോർഡ് വിഭാഗത്തിൽ നിന്നും വിപണിയിൽ എത്തുന്ന 6 ഐ.പി.ഒകളുടെ വിശദാംശങ്ങൾ താഴെ നൽകുന്നു:
- എച്ച്.ഡി ഫയർ പ്രൊട്ടക്ട്
ഇഷ്യൂ കാലാവധി: 2026 ഒക്ടോബർ 13–15 | ലിസ്റ്റിംഗ്: ഒക്ടോബർ 21
പ്രൈസ് ബാൻഡ്: 258–271 രൂപ | ലോട്ട് സൈസ്: 55 ഓഹരികൾ
ഇഷ്യൂ തുക: 712 കോടി രൂപ (പൂർണമായും ഒ.എഫ്.എസ് മുഖേന)
ബിസിനസ് പശ്ചാത്തലം: അന്താരാഷ്ട്ര യു.എൽ (UL), എഫ്.എം (FM) അംഗീകാരങ്ങളുള്ള ജലം, ഫോം, ഗ്യാസ് അധിഷ്ഠിത അഗ്നിശമന ഉപകരണങ്ങൾ നിർമ്മിക്കുന്ന കമ്പനിയാണ് എച്ച്.ഡി ഫയർ പ്രൊട്ടക്ട് ലിമിറ്റഡ് (HD Fire Protect Ltd). 90-ലധികം രാജ്യങ്ങളിലേക്ക് ഉത്പന്നങ്ങൾ കയറ്റുമതി ചെയ്യുന്നു. 2025-26 സാമ്പത്തിക വർഷത്തിൽ കമ്പനി നേടിയ വരുമാനം 505 കോടിയും അറ്റാദായം 117 കോടിയും വീതം കുറിച്ചു. - ഫ്യൂഷൻ സി.എക്സ്
ഇഷ്യൂ കാലാവധി: 2026 ഒക്ടോബർ 14–16 | ലിസ്റ്റിംഗ്: ഒക്ടോബർ 22
പ്രൈസ് ബാൻഡ്: 275–289 രൂപ | ലോട്ട് സൈസ്: 51 ഓഹരികൾ
ഇഷ്യൂ തുക: 702 കോടി രൂപ (പുതിയ ഓഹരികൾ 500 കോടി രൂപ + ഒ.എഫ്.എസ് 202 കോടി രൂപ)
ബിസിനസ് പശ്ചാത്തലം: 13 രാജ്യങ്ങളിലായി 40 കേന്ദ്രങ്ങളുള്ള ആഗോള കസ്റ്റമർ എക്സ്പീരിയൻസ് (CX), എ.ഐ ഡാറ്റ ഇൻഫ്രാസ്ട്രക്ചർ സേവന ദാതാക്കളാണ് ഫ്യൂഷൻ സി.എക്സ് ലിമിറ്റഡ് (Fusion CX Ltd). കമ്പനിയുടെ കടബാധ്യതകൾ വീട്ടുന്നതിനും സാങ്കേതികവിദ്യ നവീകരിക്കുന്നതിനുമാണ് ഐ.പി.ഒ വഴി സമാഹരിക്കുന്ന തുക വിനിയോഗിക്കുക. ഇക്കഴിഞ്ഞ സാമ്പത്തിക വർഷത്തിൽ (FY26) കമ്പനി നേടിയ വരുമാനം 1,852 കോടി രൂപയും അറ്റാദായം 170 കോടി രൂപയും വീതം രേഖപ്പെടുത്തി. - ടോൺബോ ഇമേജിംഗ് ഇന്ത്യ
ഇഷ്യൂ കാലാവധി: 2026 ഒക്ടോബർ 15–19 | ലിസ്റ്റിംഗ്: ഒക്ടോബർ 23
പ്രൈസ് ബാൻഡ്: 665–700 രൂപ | ലോട്ട് സൈസ്: 21 ഓഹരികൾ
ഇഷ്യൂ തുക: 852 കോടി രൂപ (പൂർണമായും ഒ.എഫ്.എസ് മുഖേന)
ബിസിനസ് പശ്ചാത്തലം: തെർമൽ ഇമേജിംഗ്, ഇലക്ട്രോ-ഒപ്റ്റിക്സ് സംവിധാനങ്ങൾ നിർമ്മിക്കുന്ന മുൻനിര ഡിഫൻസ് ഒ.ഇ.എം (OEM) കമ്പനിയാണ് ടോൺബോ ഇമേജിംഗ് ഇന്ത്യ ലിമിറ്റഡ് (Tonbo Imaging India Ltd). 24 രാജ്യങ്ങളിലായി കമ്പനിയുടെ 28,000-ലധികം സിസ്റ്റങ്ങൾ വിന്യസിച്ചിട്ടുണ്ട്. ഇക്കഴിഞ്ഞ സാമ്പത്തിക വർഷത്തിൽ 370 കോടി രൂപ വരുമാനവും 51 കോടി രൂപ ലാഭവും കൈവരിച്ചു. - സെറ്റ്‍വെർക്ക് മാനുഫാക്ചറിംഗ് ബിസിനസ്
ഇഷ്യൂ കാലാവധി: 2026 ഒക്ടോബർ 15–19 | ലിസ്റ്റിംഗ്: ഒക്ടോബർ 23
പ്രൈസ് ബാൻഡ്: ₹143–₹151 | ലോട്ട് സൈസ്: 99 ഓഹരികൾ
ഇഷ്യൂ തുക: 5,012 കോടി രൂപ (പുതിയ ഓഹരികൾ 2,830 കോടി രൂപ + ഒ.എഫ്.എസ് 2,182 കോടി രൂപ)
ബിസിനസ് പശ്ചാത്തലം: പതിനായിരത്തിലധികം സപ്ലൈയർമാരുള്ള സാങ്കേതികവിദ്യാധിഷ്ഠിത മാനുഫാക്ചറിംഗ് മാർക്കറ്റ്‌പ്ലേസ് പ്ലാറ്റ്‌ഫോമാണ് സെറ്റ്‍വെർക്ക് മാനുഫാക്ചറിംഗ് ബിസിനസ് ലിമിറ്റഡ് (Zetwerk Manufacturing Business Ltd). ഈ ആഴ്ചയിലെ ഏറ്റവും വലിയ ഇഷ്യൂവാണിത്. കഴി‍ഞ്ഞ സാമ്പത്തിക വർഷം (FY26) വരുമാനമായി 16,101 കോടി രൂപ നേടിയെങ്കിലും കമ്പനി അറ്റനഷ്ടത്തിലാണ്. കടം വീട്ടാനും ബിസിനസ് വിപുലീകരണത്തിനുമാണ് ഐ.പി.ഒ വഴി സമാഹരിക്കുന്ന തുക ഉപയോഗിക്കുക. - ബോൺഫിഗ്ലിയോളി ട്രാൻസ്മിഷൻസ്
ഇഷ്യൂ കാലാവധി: 2026 ഒക്ടോബർ 15–19 | ലിസ്റ്റിംഗ്: ഒക്ടോബർ 23
പ്രൈസ് ബാൻഡ്: 558–586 രൂപ | ലോട്ട് സൈസ്: 25 ഓഹരികൾ
ഇഷ്യൂ തുക: 2,534 കോടി രൂപ (പൂർണമായും ഒ.എഫ്.എസ് മുഖേന)
ബിസിനസ് പശ്ചാത്തലം: ഗിയർ മോട്ടോറുകൾ, ഗിയർബോക്സുകൾ, ഇൻഡസ്ട്രിയൽ ഡ്രൈവുകൾ എന്നിവ നിർമ്മിക്കുന്ന പ്രമുഖ കമ്പനിയാണ് ബോൺഫിഗ്ലിയോളി ട്രാൻസ്മിഷൻസ് ലിമിറ്റഡ് (Bonfiglioli Transmissions Ltd). 2025 കലണ്ടർ വർഷത്തിൽ 2,024 കോടി രൂപ വരുമാനവും 238 കോടി രൂപ അറ്റാദായവും നേടി. - സഹജാനന്ദ് മെഡിക്കൽ ടെക്നോളജീസ്
ഇഷ്യൂ കാലാവധി: 2026 ഒക്ടോബർ 15–19 | ലിസ്റ്റിംഗ്: ഒക്ടോബർ 23
പ്രൈസ് ബാൻഡ്: 327–344 രൂപ | ലോട്ട് സൈസ്: 43 ഓഹരികൾ
ഇഷ്യൂ തുക: 475 രൂപ കോടി (പൂർണമായും ഒ.എഫ്.എസ് മുഖേന)
ബിസിനസ് പശ്ചാത്തലം: ഹൃദ്രോഗ ചികിത്സയ്ക്കുള്ള കൊറോണറി സ്റ്റെന്റുകൾ, ട്രാൻസ്കഥീറ്റർ ആർട്ടിക് വാൽവ് ഇംപ്ലാന്റേഷൻ (TAVI) ഉൽപ്പന്നങ്ങൾ എന്നിവ നിർമ്മിക്കുന്ന മെഡിക്കൽ ഉപകരണ കമ്പനിയാണ് സഹജാനന്ദ് മെഡിക്കൽ ടെക്നോളജീസ് ലിമിറ്റഡ് (Sahajanand Medical Technologies Ltd). 77 രാജ്യങ്ങളിൽ സാന്നിധ്യമുണ്ട്. ഇക്കഴിഞ്ഞ സാമ്പത്തിക വർഷം (FY26) കമ്പനി നേടിയ വരുമാനം 1,219 കോടി രൂപയും ലാഭം 69 കോടി രൂപയുമാണ്.
മെയിൻ ബോർഡ് വിഭാഗത്തിലുള്ള ഈ ആറെണ്ണത്തിന് പുറമെ, ഷെൽസ് ഇന്ത്യ (ഒക്ടോബർ 15-19), വൈഭവ് വ്യാപാർ (ഒക്ടോബർ 13-15), രവിത എൻജിനീയറിംഗ് സർവീസസ് (ഒക്ടോബർ 13-15) എന്നീ 3 കമ്പനികളുടെ ഐ.പിഒ എസ്.എം.ഇ വിഭാഗത്തിലും അരങ്ങേറുന്നുണ്ട്.
സെക്കൻഡറി വിപണിയിലെ ചാഞ്ചാട്ടങ്ങൾക്കിടയിലും മികച്ച വളർച്ചാ സാധ്യതയുള്ള ഈ പുതിയ ഐ.പി.ഒകൾ വിദേശ-ആഭ്യന്തര നിക്ഷേപകരുടെ വലിയ പങ്കാളിത്തം ആകർഷിക്കുമെന്നാണ് പൊതുവായ വിലയിരുത്തൽ.
