ഒരു പരിധിയിൽ അധികം വിനിമയങ്ങൾ നടന്നാൽ അത് ആദായ നികുതി വകുപ്പ് ശ്രദ്ധിക്കും എന്ന് നിങ്ങൾക്ക് അറിയാമോ? ബാങ്കിൽ നിക്ഷേപിക്കുകയോ, പിൻവലിക്കുകയോ ചെയ്യുന്ന തുക മാത്രമല്ല, ഓഹരി, മ്യൂച്വൽ ഫണ്ട്, പ്രോപർട്ടി അടക്കമുള്ള വിനിമയങ്ങളുമായി ബന്ധപ്പെട്ടും ചില പരിധികളുണ്ട്. ഹൈ വാല്യു ട്രാൻസാക്ഷൻസ് നടക്കുന്നത് ആദായ നികുതി വകുപ്പിന് റിപ്പോർട്ട് ചെയ്യപ്പെടും എന്ന വസ്തുതയാണ് മനസ്സിലാക്കാനുള്ളത്.
ഇന്നത്തെ കാലത്ത് ആദായ നികുതി വകുപ്പിന് ആധുനിക സാങ്കേതിക വിദ്യയുടെയും, ഡാറ്റ അനലിറ്റിക്സ് ടൂളുകളുടെയും സഹായമുണ്ട്. സാമ്പത്തിക വിനിമയങ്ങൾ ട്രാക്ക് ചെയ്യാനും, നികുതി വെട്ടിപ്പ് തടയാനും ഇത്തരത്തിൽ ശ്രമങ്ങൾ നടക്കുന്നു. അതായത്, നിങ്ങളുടെ പല വിനിമയങ്ങളും ബാങ്കുകൾ, മറ്റു ധനകാര്യ സ്ഥാപനങ്ങൾ എന്നിവ വഴി ഓട്ടോമാറ്റിക്കായി നികുതി വകുപ്പിലേക്ക് റിപ്പോർട്ട് ചെയ്യപ്പെടാം.
ആദായ നികുതി റിട്ടേൺ ഫയൽ ചെയ്യുക എന്നത് പ്രധാനമാണെങ്കിലും, ചില ഹൈ-വാല്യു ട്രാൻസാക്ഷനുകൾ കൂടുതൽ പരിശോധനകൾക്ക് വിധേയമാകാം. നിങ്ങളുടെ ഡിക്ലയർ ചെയ്തിരിക്കുന്ന വരുമാനവും, ചിലവുകളും പൊരുത്തപ്പെടുന്നില്ലെങ്കിൽ നികുതി വകുപ്പിൽ നിന്ന് നോട്ടീസ് ലഭിക്കാനും സാധ്യതയുണ്ട്.
സേവിങ്സ് അക്കൗണ്ടും, സ്ഥിര നിക്ഷേപവും
ഒരു സേവിങ്സ് അക്കൗണ്ടിൽ ഒരു സാമ്പത്തിക വർഷത്തിൽ 10 ലക്ഷം രൂപയിലധികം നിക്ഷേപം നടത്തിയാൽ അത് ആദായ നികുതി വകുപ്പിലേക്ക് ബാങ്ക് റിപ്പോർട്ട് ചെയ്യാൻ സാധ്യതയുണ്ട്.
ഇവിടെ, നിങ്ങളുടെ ഡിക്ലയർ ചെയ്ത വരുമാാനവും, ഡെപ്പോസിറ്റിന്റെ ഉറവിടവും പൊരുത്തപ്പെടുന്നില്ലെങ്കിൽ നികുതി വകുപ്പിന് വിശദീകരണം നൽകേണ്ടതായി വരാം. ഒരു സാമ്പത്തിക വർഷം 10 ലക്ഷം രൂപയിൽ കൂടുതൽ സ്ഥിര നിക്ഷേപമായി നടത്തിയാലും സമാനമായി റിപ്പോർട്ട് ചെയ്യപ്പെടും.
ഓഹരി വിപണിയും, മ്യൂച്വൽ ഫണ്ടും
ഓഹരി, മ്യൂച്വൽ ഫണ്ട്, കടപ്പത്രം എന്നിവയിൽ വലിയ തോതിൽ നിക്ഷേപം നടത്തുമ്പോഴും സാമ്പത്തിക സ്ഥാപനങ്ങൾ വഴി ആദായ നികുതി വകുപ്പിന് വിവരം ലഭിക്കുന്നു. ഇവിടെയും, നിങ്ങളുടെ ഡിക്ലയർ ചെയ്ത വരുമാനത്തേക്കാൾ നിക്ഷേപം വളരെയധികം ഉയർന്നു നിൽക്കുന്നുവെങ്കിൽ വിശദീകരണം നൽകേണ്ടതായി വരാം.
ക്രെഡിറ്റ് കാർഡും, പ്രോപർട്ടിയും
ഉയർന്ന തോതിലുള്ള ക്രെഡിറ്റ് കാർഡ് ചിലവഴിക്കലുകൾ, നിങ്ങളുടെ വരുമാനവുമായി ഒത്തു പോകുന്നില്ലെങ്കിലും വിശദീകരണം നൽകേണ്ടി വന്നേക്കാം.
വീട്, ഭൂമി, അപ്പാർട്മെന്റ് തുടങ്ങിയവ വാങ്ങുന്നതും വിവിധ ഗവൺമെന്റ് ഡാറ്റ ബേസുകളിൽ റെക്കോർഡ് ചെയ്യപ്പെടുന്നുണ്ട്. വില കൂടിയ പ്രോപർട്ടി വാങ്ങുമ്പോഴും വരുമാന ഉറവിടം വെളിപ്പെടുത്താൻ ടാക്സ് ഡിപ്പാർട്മെന്റ് ആവശ്യപ്പെടാം.
