മുംബൈ: റിലയൻസ് റീട്ടെയിൽ അവരുടെ ഇലക്ട്രോണിക്സ് ശൃംഖലയായ റിലയൻസ് ഡിജിറ്റലിന് കീഴിൽ രാജ്യത്തുടനീളമുള്ള വിവിധ നഗരങ്ങളിൽ ആയിരക്കണക്കിന് ചെറുകിട സ്റ്റോറുകൾ തുറക്കാൻ പദ്ധതിയിടുന്നു.
ഈ സ്റ്റോറുകൾ പ്രാഥമികമായി സ്മാർട്ട്ഫോണുകൾ, ടാബ്ലറ്റുകൾ, ലാപ്ടോപ്പുകൾ, ഗെയിമിംഗ് ഉപകരണങ്ങൾ, ടെലിവിഷനുകൾ, ഇന്റർനെറ്റ് പ്രാപ്തമാക്കിയ ഉൽപ്പന്നങ്ങൾ എന്നിവ വിൽക്കുമെന്ന് രണ്ട് വ്യവസായ എക്സിക്യൂട്ടീവുകളെ ഉദ്ധരിച്ച് ഇക്കണോമിക് ടൈംസ് റിപ്പോർട്ട് ചെയ്തു. അതേസമയം രാജ്യത്തെ ഏറ്റവും വലിയ റീട്ടെയിലർ പുതിയ സ്റ്റോറുകളുടെ ബ്രാൻഡ് നാമം ഇതുവരെ തീരുമാനിച്ചിട്ടില്ല.
റിലയൻസ് റീട്ടെയിൽ മുമ്പ് ഡിജിറ്റൽ എക്സ്പ്രസ് എന്ന ബ്രാൻഡിന് കീഴിൽ ചെറിയ വലിപ്പത്തിലുള്ള സ്റ്റോറുകളുടെ ഒരു ശൃംഖല നടത്തിയിരുന്നു. എന്നാൽ പിന്നീട് അവ അടച്ചുപൂട്ടുകയും ജിയോ കണക്ഷനുകളും ചില മൊബൈൽ ഫോണുകളും വിൽക്കുന്ന മൈ ജിയോ സ്റ്റോറുകളായി പരിവർത്തനം ചെയ്യുകയും ചെയ്തു.
റിലയൻസ് റീട്ടെയിലിന്റെ ഏറ്റവും വലിയ ബിസിനസാണ് സ്മാർട്ട്ഫോണുകൾ ഉൾപ്പെടെയുള്ള ഇലക്ട്രോണിക്സ്. ഇത് 530-ലധികം വലിയ വലിപ്പമുള്ള റിലയൻസ് ഡിജിറ്റൽ സ്റ്റോറുകൾ, റിലയൻസ് ഡിജിറ്റൽ വെബ്സൈറ്റ്, ജിയോമാർട്ട് മാർക്കറ്റ് പ്ലേസ് എന്നിവയിലൂടെ ഇലക്ട്രോണിക്സ് ഉൽപ്പന്നങ്ങൾ വിൽക്കുന്നു.
