ന്യൂഡല്ഹി: റിസര്വ് ബാങ്ക് ഓഫ് ഇന്ത്യ (ആര്ബിഐ) തങ്ങളുടെ ഡിജിറ്റല് കറന്സി (സിബിഡിസി) ഈ വര്ഷം പുറത്തിറക്കിയേക്കുമെന്ന് റിപ്പോര്ട്ട്. മൊത്ത വ്യാപാര സംരഭങ്ങള്ക്കായി തുടക്കത്തില് ഉപയോഗം പരിമിതപ്പെടുത്തുമെന്നും ഉദ്യോഗസ്ഥരെ ഉദ്ദരിച്ച് ബിസിനസ് സ്റ്റാന്ഡേര്ഡ് റിപ്പോര്ട്ട് ചെയ്തു. ഘട്ടം ഘട്ടമായി ഉപയോഗം വര്ധിപ്പിക്കും.
മൊത്ത വ്യാപാരികളില് പരീക്ഷിച്ച ശേഷം പിന്നീട് ചെറുകിട വ്യാപാരികളിലേയ്ക്കും മറ്റ് മേഖലകളിലേയ്ക്കും ഉപയുക്തത വ്യാപിപ്പിക്കും. അജ്ഞാതത്വത്തിന് സാധ്യതയില്ലാത്ത വിധം ഉപയുക്തത വര്ധിപ്പിക്കാനാണ് ആര്ബിഐ ശ്രമം. 2022-23ലെ കേന്ദ്ര ബജറ്റില് ധനമന്ത്രി നിര്മല സീതാരാമനാണ് ഡിജിറ്റല് കറന്സി പുറത്തിറക്കുമെന്ന് പ്രഖ്യാപിച്ചത്.
തുടര്ന്ന് ഡിജിറ്റല് കറന്സി ഉള്ക്കൊള്ളിച്ച് 1934 ലെ ആര്ബിഐ നിയമത്തില് ഭേദഗതി വരുത്തുകയും അത് ഫിനാന്സ് ബില്ലില് ഉള്പ്പെടുത്തുകയും ചെയ്തു. ബില് പൈലറ്റ് സ്റ്റഡി നടത്താനും സിബിഡിസി ഇഷ്യു ചെയ്യാനും ആര്ബിഐയെ പ്രാപ്തമാക്കി.
സിബിസിഡി ഒരു ഡിജിറ്റല് അല്ലെങ്കില് വെര്ച്വല് കറന്സിയാണ്. എന്നാല് കഴിഞ്ഞ ദശകത്തില് കൂണുപോലെ മുളച്ചുപൊന്തുന്ന സ്വകാര്യ വെര്ച്വല് കറന്സികളുമായോ ക്രിപ്റ്റോകറന്സിയുമായോ ഇതിനെ താരതമ്യപ്പെടുത്താനാവില്ല. ഇടപാട് സാധുത ഇല്ലാത്തതിനാല് സ്വകാര്യ വെര്ച്വല് കറന്സികള് ഒരു വ്യക്തിയുടെയും കടത്തെയോ ബാധ്യതകളെയോ പ്രതിനിധീകരിക്കുന്നില്ല, ആര്ബിഐ അവരുടെ റിപ്പോര്ട്ടില് പറയുന്നു.
ഇത് നിലവില് ലഭ്യമായ സ്വകാര്യ കമ്പനികള് നടത്തുന്ന ഇലക്ട്രോണിക് വാലറ്റുകളെ പ്രതിഫലിപ്പിക്കും. സിബിസിഡി ഒരു പരമാധികാര പിന്തുണയുള്ള ഡിജിറ്റല് കറന്സിയായിരിക്കും.
ആര്ബിഐ നവീകരണത്തെ പ്രോത്സാഹിപ്പിച്ചിട്ടുണ്ടെന്നും ഫിന്ടെക്കുകളുമായി ബന്ധപ്പെട്ട നേട്ടങ്ങളും അപകടസാധ്യതകളും സൂക്ഷ്മമായി നിരീക്ഷിക്കുന്നുണ്ടെന്നും ഉദ്യോഗസ്ഥര് പറയുന്നു. ഫിന്ടെക്,പേയ്മെന്റ് ബാങ്കുകള്, അക്കൗണ്ട് അഗ്രഗേറ്റര്, പ്രീപെയ്ഡ് ഇന്സ്ട്രുമെന്റുകള്, പിയര്ടുപിയര് ലെന്ഡിംഗ്, എന്നിങ്ങനെ ഉയര്ന്നുവരുന്ന മേഖലകള്ക്കായി റിസര്വ് ബാങ്ക് ഈയിടെ മാര്ഗ്ഗനിര്ദ്ദേശങ്ങള് പുറപ്പെടുവിച്ചിരുന്നു.
