മുംബൈ: പ്രൈവറ്റ് പ്ലേസ്മെന്റ് അടിസ്ഥാനത്തിൽ നോൺ-കൺവെർട്ടിബിൾ ഡിബഞ്ചറുകൾ ഇഷ്യൂ ചെയ്യുന്നതിലൂടെ 12,000 കോടി രൂപ വരെ സമാഹരിക്കുന്നതിന് എൻടിപിസിക്ക് ഓഹരി ഉടമകളുടെ അനുമതി ലഭിച്ചു. ചൊവ്വാഴ്ച നടന്ന വാർഷിക പൊതുയോഗത്തിൽ ആവശ്യമായ ഭൂരിപക്ഷത്തോടെയാണ് നിർദിഷ്ട പ്രമേയം പാസാക്കിയത്.
കമ്പനി ഒന്നോ അതിലധികമോ ഘട്ടങ്ങളിലായി (12-ൽ കൂടാത്ത) ധന സമാഹരണം നടത്താനാണ് പദ്ധതിയിടുന്നത്. സമാഹരിക്കുന്ന ഫണ്ട് മൂലധന ചെലവുകൾക്കും പ്രവർത്തന മൂലധനത്തിനും പൊതുവായ കോർപ്പറേറ്റ് ആവശ്യങ്ങൾക്കുമായി ഉപയോഗിക്കും. കമ്പനി കപ്പാസിറ്റി എക്സ്പാൻഷൻ മോഡിൽ ആയതിനാൽ മൂലധനച്ചെലവിന്റെ വലിയൊരു ഭാഗം കടത്തിൽ നിന്നാണ് ഫണ്ട് ചെയ്യേണ്ടത്.
ധനസമാഹരണ നിർദ്ദേശത്തിന് കമ്പനിയുടെ ബോർഡ് നേരത്തെ അംഗീകാരം നൽകിയിരുന്നു. വൈദ്യുതി ഉൽപാദനത്തിലും അനുബന്ധ പ്രവർത്തനങ്ങളിലും ഏർപ്പെട്ടിരിക്കുന്ന ഒരു പൊതുമേഖലാ സ്ഥാപനമാണ് എൻടിപിസി ലിമിറ്റഡ്.
