കൊച്ചി: കേരളത്തിന്റെ വ്യാവസായിക, ലോജിസ്റ്റിക്സ് മേഖലയ്ക്ക് വലിയ ഉണർവ് നൽകിക്കൊണ്ട്, എൻഡിആർ സ്പേസ് പ്രൈവറ്റ് ലിമിറ്റഡിന്റെ വെയർഹൗസിംഗ് ആൻഡ് ഇൻഡസ്ട്രിയൽ പാർക്കിന് വ്യവസായ-നിയമ മന്ത്രി പി രാജീവ് തറക്കല്ലിടും. 250 കോടി രൂപയുടെ നിക്ഷേപം ലക്ഷ്യമിടുന്ന പദ്ധതിയുടെ തറക്കല്ലിടൽ ചടങ്ങ് ഇന്ന് ആലുവ ചുണങ്ങംവേലിയിൽ നടക്കും. 16 ഏക്കറിലായി വികസിപ്പിക്കുന്ന ഈ ഗ്രേഡ്-എ വെയർഹൗസിംഗ് സംരംഭം, സംസ്ഥാനത്തിന്റെ ലോജിസ്റ്റിക്സ് ശേഷി വർധിപ്പിക്കാനും വ്യാവസായിക വളർച്ച ത്വരിതപ്പെടുത്താനും ലക്ഷ്യമിട്ടുള്ളതാണ്. ചടങ്ങിൽ ആലുവ എംഎൽഎ അൻവർ സാദത്ത് മുഖ്യാതിഥിയാകും.
എൻഡിആർ സ്പേസ് പ്രൈവറ്റ് ലിമിറ്റഡ് ചീഫ് എക്സിക്യൂട്ടീവ് ഓഫീസർ രാജ് ശ്രീനിവാസൻ, വ്യവസായ പ്രതിനിധികൾ എന്നിവരും യോഗത്തിൽ പങ്കെടുത്ത് പ്രസംഗിക്കും. സംസ്ഥാനത്തുടനീളം ഏകദേശം രണ്ട് ദശലക്ഷം ചതുരശ്ര അടി വിസ്തീർണമുള്ള ഗ്രേഡ്-എ വെയർഹൗസിംഗ്, വ്യാവസായിക ഇടങ്ങൾ സ്ഥാപിക്കാനുള്ള എൻഡിആർ സ്പേസിന്റെ വലിയ പദ്ധതിയുടെ ഭാഗമാണ് ആലുവയിലെ ഈ വികസനം. എഫ്എംസിജി, ഫാർമസ്യൂട്ടിക്കൽ, ഇ-കൊമേഴ്സ്, തേർഡ്-പാർട്ടി ലോജിസ്റ്റിക്സ് തുടങ്ങിയ വളർന്നുവരുന്ന വ്യവസായങ്ങളുടെ ആവശ്യങ്ങൾ ഈ സൗകര്യം നിറവേറ്റും.
കാര്യക്ഷമമായ ഇൻവെന്ററി, സ്റ്റോക്ക് മാനേജ്മെന്റിനായി ഭാഗികമായോ പൂർണമായോ ഓട്ടോമേറ്റ് ചെയ്ത സംവിധാനങ്ങൾ ഇവിടെ സജ്ജീകരിക്കും. കൂടാതെ, സുസ്ഥിര രൂപകൽപ്പനയോടും ഊർജക്ഷമതയോടുമുള്ള പ്രതിബദ്ധതയുടെ ഭാഗമായി പദ്ധതിക്ക് എഡ്ജ് സർട്ടിഫിക്കേഷനും ലഭിക്കും. ഈ വെയർഹൗസിംഗ് പാർക് പൂർത്തിയാകുമ്പോൾ, 200-ൽ അധികം ആളുകൾക്ക് നേരിട്ടും അല്ലാതെയും തൊഴിലവസരങ്ങൾ സൃഷ്ടിക്കപ്പെടും. ഇത് സംസ്ഥാനത്തിന്റെ ലോജിസ്റ്റിക്സ് സംവിധാനം ആധുനികവത്കരിക്കാനുള്ള ശ്രമങ്ങൾക്ക് വലിയ പിന്തുണയേകും.
