മുംബൈ: ഇന്‍ഫോസിസ് സഹസ്ഥാപകനും ആധാര്‍, യൂണിഫൈഡ് പേയ്‌മെന്റ്‌സ് ഇന്റര്‍ഫേസിന്റെ (യുപിഐ) ശില്‍പ്പിയുമായ നന്ദന്‍ നിലേകനി, ഫിന്‍ടെര്‍നെറ്റ് എന്ന പേരില്‍ പുതിയ ഡിജിറ്റല്‍ ഇന്‍ഫ്രാസ്ട്രക്ചര്‍ പദ്ധതി ആരംഭിക്കുന്നു. 2026 ല്‍ പദ്ധതി പ്രവര്‍ത്തനക്ഷമമാകും. ഇന്‍ഷൂറര്‍മാര്‍, ധനകാര്യ സ്ഥാപനങ്ങള്‍ എന്നിവയ്ക്ക് സുരക്ഷിതമായി ഡാറ്റ പങ്കിടാനും സേവനങ്ങള്‍ നല്‍കാനും സാധിക്കുന്ന ഒരു വികേന്ദ്രീകൃത സാമ്പത്തിക ശൃംഖലയാകുമിത്.
ഫിന്‍ടെര്‍നെറ്റ് എന്നാല്‍ ‘ഫിനാന്‍ഷ്യല്‍ ഇന്റര്‍നെറ്റ്’ എന്നാണ്. ഇത് ഒരു ആപ്പോ ഉല്‍പ്പന്നമോ അല്ല. മറിച്ച് ഡിജിറ്റല്‍ ഇന്‍ഫ്രാസ്ട്രക്ചറാണ് – ഇന്റര്‍നെറ്റ് വെബ്സൈറ്റുകളെ ആഗോളതലത്തില്‍ ബന്ധിപ്പിക്കുന്നതിന് സമാനമായിട്ടാകും പ്രവര്‍ത്തനം. സാമ്പത്തിക വിവരങ്ങളും സേവനങ്ങളും സുരക്ഷിതവും നിലവാരമുള്ളതുമായ രീതിയില്‍ കൈമാറ്റം ചെയ്യാന്‍ കഴിയുന്ന പരസ്പര പ്രവര്‍ത്തനക്ഷമമായ സംവിധാനങ്ങളുടെ ഒരു ശൃംഖല.. ക്രെഡിറ്റ്, ഇന്‍ഷുറന്‍സ്, സേവിംഗ്‌സ്, നിക്ഷേപ ഉപകരണങ്ങള്‍ എന്നിവയിലേക്കുള്ള ആക്സസ് മെച്ചപ്പെടുത്താന്‍ ഇതുവഴിയാകും. പ്രത്യേകിച്ച് പരമ്പരാഗത ബാങ്കിംഗ് സംവിധാനങ്ങളില്‍ പ്രവേശനം കുറയുന്ന സാഹചര്യത്തില്‍.
ആധാര്‍, യുപിഐ, ഓപ്പണ്‍ നെറ്റ്വര്‍ക്ക് ഫോര്‍ ഡിജിറ്റല്‍ കൊമേഴ്സ് (ഒഎന്‍ഡിസി) തുടങ്ങി ഡിജിറ്റല്‍ പൊതു ഉല്‍പ്പന്നങ്ങള്‍ രൂപകല്‍പ്പന ചെയ്യാന്‍ സഹായിച്ച ബെംഗളൂരു ആസ്ഥാനമായുള്ള തിങ്ക് ടാങ്ക് ഐസ്പിരിറ്റുമായിസഹകരിച്ചാണ് പദ്ധതി.്അക്കൗണ്ട് അഗ്രഗേറ്ററുകള്‍, കണ്‍സെന്റ് മാനേജര്‍മാര്‍ തുടങ്ങിയ സാങ്കേതികവിദ്യകള്‍ ഫിന്റര്‍നെറ്റ് ഉപയോഗിക്കും. ബാങ്ക് സ്റ്റേറ്റ്മെന്റുകള്‍ അല്ലെങ്കില്‍ ഇന്‍ഷുറന്‍സ് രേഖകള്‍ പോലുള്ള സാമ്പത്തിക ഡാറ്റ – സുരക്ഷിതവും നിയന്ത്രിതവുമായ രീതിയില്‍ വായ്പ നല്‍കുന്നവരുമായി പങ്കിടാന്‍ വ്യക്തികളെ അനുവദിക്കുന്ന ഡിജിറ്റല്‍ സംവിധാനങ്ങളാണ് അക്കൗണ്ട് അഗ്രഗേറ്ററുകള്‍. ആര്‍ക്കൊക്കെ, എന്ത് ഉദ്ദേശ്യത്തിനായി തങ്ങളുടെ ഡാറ്റ ആക്സസ് ചെയ്യാനാകുക എന്ന് ഉപയോക്താക്കള്‍ വ്യക്തമായി അംഗീകരിക്കുന്നുവെന്ന് കണ്‍സെന്റ് മാനേജര്‍മാര്‍ ഉറപ്പാക്കുന്നു.
ആപ്ലിക്കേഷന്‍ പ്രോഗ്രാമിംഗ് ഇന്റര്‍ഫേസുകള്‍ എന്ന് വിളിക്കപ്പെടുന്ന സ്റ്റാന്‍ഡേര്‍ഡ് ഡിജിറ്റല്‍ ഇന്റര്‍ഫേസുകള്‍ വഴി വ്യത്യസ്ത പ്ലാറ്റ്ഫോമുകള്‍ ഒരുമിച്ച് പ്രവര്‍ത്തിക്കും.സാമ്പത്തിക സംവിധാനത്തിലെ സംഘര്‍ഷം കുറയ്ക്കാന്‍ ഫിന്റര്‍നെറ്റ് സഹായിക്കുമെന്ന് നിലേകനി വിശദീകരിച്ചു. സോഫ്റ്റ്വെയര്‍ സിസ്റ്റങ്ങള്‍ക്കിടയിലുള്ള പാലങ്ങള്‍ പോലെ ഈ എപിഐകള്‍ പ്രവര്‍ത്തിക്കുകയും സുഗമവും സുരക്ഷിതവുമായ ഡാറ്റ കൈമാറ്റം സാധ്യമാക്കുകയും ചെയ്യും.
കൂടുതല്‍ പേരെ ഉള്‍ക്കൊള്ളുന്നതും സുതാര്യവും കാര്യക്ഷമവുമായ സാമ്പത്തിക സേവനങ്ങള്‍ ഇന്ത്യയുടെ വിശാലമായ ഡിജിറ്റല്‍ പൊതു അടിസ്ഥാന സൗകര്യ ലക്ഷ്യങ്ങളെ പിന്തുണയ്ക്കും.ഇടനിലക്കാരെ ആശ്രയിക്കാതെ തന്നെ ചെറുകിട ബിസിനസുകള്‍ക്കും വ്യക്തികള്‍ക്കും ഇതുവഴി ഔപചാരിക സാമ്പത്തിക ഉപകരണങ്ങള്‍ ആക്സസ് ചെയ്യാം.
യുപിഐ, ഡിജിറ്റല്‍ പേയ്മെന്റുകളെ പരിവര്‍ത്തനം ചെയ്തതുപോലെ, സാമ്പത്തിക സേവനങ്ങളെ പുനര്‍നിര്‍മ്മിക്കാന്‍ ഫിന്റര്‍നെറ്റിനാകും നിലേകനി പറഞ്ഞു.
