കൊച്ചി: രാജ്യത്തെ ഏറ്റവും വലിയ ഗോൾഡ് ലോൺ സ്ഥാപനമായ മുത്തൂറ്റ് ഫിനാൻസ് ഗ്ലോബൽ മീഡിയം ടേം നോട്ട് പ്രോഗ്രാമിനു കീഴിലുള്ള സീനിയർ സെക്യേർഡ് നോട്ടുകളുടെ ഇഷ്യൂ വഴി 400 മില്യൺ ഡോളർ (3350 കോടിയോളം രൂപ) സമാഹരിച്ചു. വിവിധ രാജ്യങ്ങളിൽ നിന്നുള്ള 125-ലധികം നിക്ഷേപകർ റിസർവ് ബാങ്കിന്റെ വിദേശ വാണിജ്യ വായ്പകൾ സംബന്ധിച്ച നിർദ്ദേശങ്ങൾ പാലിച്ചുള്ള ഈ മൂലധന സമാഹരണത്തിൽ പങ്കെടുത്തു. 6.375% കൂപ്പൺ നിരക്കോടു കൂടിയ നോട്ടുകൾ ഗുജറാത്തിലെ ഗിഫ്റ്റ് സിറ്റിയിലുള്ള എൻഎസ്ഇ ഇൻറ്റർനാഷനൽ എക്സ്ചേഞ്ചിൽ ലിസ്റ്റു ചെയ്തു. ഡോയിഷ് ബാങ്കും സ്റ്റാൻഡേർഡ് ചാർട്ടേർഡ് ബാങ്കുമാണ് ഇഷ്യൂവിന്റെ മേൽനോട്ടം വഹിക്കുന്നത്.
ആഗോള നിക്ഷേപകരുമായുള്ള കമ്പനിയുടെ സഹകരണം കൂടുതൽ ശക്തമാക്കുന്നതാണ് ഈ സമാഹരണമെന്നും, കൂടുതൽ വായ്പകൾ വിതരണം ചെയ്യാനും നിക്ഷേപനിര വിപുലമാക്കാനും ഇത് കമ്പനിയെ സഹായിക്കുമെന്നും മുത്തൂറ്റ് ഫിനാൻസ് മാനേജിങ് ഡയറക്ടർ ജോർജ്ജ് അലക്സാണ്ടർ മുത്തൂറ്റ് പറഞ്ഞു. മുത്തൂറ്റ് ഫിനാൻസ് 2019-ൽ 450 മില്യൺ ഡോളറും 2020-ൽ 550 മില്യൺ ഡോളറും ഇത്തരത്തിൽ സമാഹരിച്ചിരുന്നു. യഥാക്രമം 2022-ലും 2023-ലും ഈ തുകകൾ തിരിച്ചടക്കുകയും ചെയ്തു.
