മുംബൈ: ഇന്ത്യക്കാരെ സംബന്ധിച്ച് ഏറെ സുപരിചിതമായ പേരായിരുന്നു ബജാജ് അലയന്‍സ് എന്നത്. ഇതില്‍ അലയന്‍സ് എന്നത് ഒരു ജര്‍മ്മന്‍ കമ്പനിയാണെന്ന് പലര്‍ക്കും അറിയില്ല. അതെ ബജാജ് അലയന്‍സ് ഒരു സംയുക്ത സംരംഭമാണ്. എന്നാല്‍ അലയന്‍സ് എന്ന ഈ പേര് ഇനിമുതല്‍ നിങ്ങള്‍ കേള്‍ക്കാന്‍ പോകുന്നത് മുകേഷ് അംബാനിയുടെ ജിയോയ്ക്ക് ഒപ്പമായിരിക്കും.
ജിയോ ഫിനാന്‍ഷ്യല്‍ സര്‍വീസസ് ലിമിറ്റഡ് (ജെഎഫ്എസ്എല്‍) ജര്‍മ്മനിയിലെ അലയന്‍സുമായി പങ്കാളിത്തത്തില്‍ എത്തിയിരിക്കുന്നു. ഇന്ത്യയില്‍ ഒരു വമ്പന്‍ റീഇന്‍ഷുറന്‍സ് കമ്പനിയാണ് ഒരുങ്ങുന്നത്. അലയന്‍സ് ജിയോ റീഇന്‍ഷുറന്‍സ് ലിമിറ്റഡ് (എജെആര്‍എല്‍) എന്നാകും സംയുക്ത സംരംഭത്തിന്റെ പേര്.
അലയന്‍സ്- ബജാജ് ഡീല്‍
അടുത്തിടെ ബജാജ് ഗ്രൂപ്പ് അവരുടെ ഇന്‍ഷുറന്‍സ് സംയുക്ത സംരംഭങ്ങളായ ബജാജ് അലയന്‍സ് ജനറല്‍ ഇന്‍ഷുറന്‍സ് കമ്പനി, ബജാജ് അലയന്‍സ് ലൈഫ് ഇന്‍ഷുറന്‍സ് കമ്പനി എന്നിവയിലെ അലയന്‍സിന്റെ ഓഹരികള്‍ ഏറ്റെടുത്തിരുന്നു. 24 വര്‍ഷം നീണ്ട പങ്കാളിത്തമാണ് ഇതോടെ അവസാനിച്ചത്. അതായത് രണ്ട് ഇന്‍ഷുറന്‍സ് കമ്പനികളിലെയും അലയന്‍സിന്റെ 26% ഓഹരികള്‍ ബജാജ് ഗ്രൂപ്പ് സ്വന്തമാക്കി. ഏകദേശം 24,180 കോടി രൂപ മൂല്യമുള്ളതായിരുന്നു ഈ ഇടപാട്.
അറിയേണ്ട കാര്യങ്ങള്‍
ഈ ഡീലിനു ശേഷം ബജാജ് അലയന്‍സ് ലൈഫ് ഇന്‍ഷുറന്‍സും, ബജാജ് അലയന്‍സ് ജനറല്‍ ഇന്‍ഷുറന്‍സും പൂര്‍ണ്ണമായും ഇന്ത്യന്‍ കമ്പനികളായി മാറി. രണ്ട് സ്ഥാപനങ്ങളിലുമുള്ള ബജാജ് ഫിന്‍സെര്‍വിന്റെ ഓഹരി പങ്കാളിത്തം 75% -ല്‍ കൂടുതലായിരിക്കും.
രണ്ട് കമ്പനികളും തമ്മിലുള്ള ദീര്‍ഘകാല അഭിപ്രായവ്യത്യാസങ്ങളാണ് വേര്‍പിരിയലിന് കാരണമെന്നാണ് വിലയിരുത്തല്‍. സംരംഭങ്ങളിലെ ഓഹരികള്‍ വര്‍ധിപ്പിക്കാന്‍ അലയന്‍സിന് മുന്‍കൂട്ടി സമ്മതിച്ച ഒരു പദ്ധതി ഉണ്ടായിരുന്നു. എന്നാല്‍ 24 വര്‍ഷത്തിനിടെ ഒരിക്കല്‍ പോലും ഇതു നടപ്പിലാക്കിയില്ല.
ജിയോയ്ക്ക് കൈകൊടുത്ത് അലയന്‍സ്
ബജാജില്‍ നിന്ന് വേര്‍പിരിഞ്ഞ് അലയന്‍സ് ചേക്കേറുന്നത് റിലയന്‍സിലേയ്ക്കാണ്. സംയോജനത്തിന്റെ ഭാഗമായി അലയന്‍സ് ജിയോ റീഇന്‍ഷുറന്‍സ് ലിമിറ്റഡ് 10 രൂപ മുഖവിലയുള്ള 25,000 ഇക്വിറ്റി ഓഹരികള്‍ പുറത്തിറക്കും. ഇത് 2.5 ലക്ഷം രൂപയുടെ പ്രാരംഭ നിക്ഷേപത്തെ സൂചിപ്പിക്കുന്നു. ജിയോ, അലയന്‍സ് എന്നിവര്‍ക്ക് സംയുക്ത സംരംഭത്തില്‍ 50 ശതമാനം ഓഹരി പങ്കാളിത്തം ഉണ്ടാകും.
ഇന്ത്യയില്‍ ഇന്‍ഷുറന്‍സ് വിപ്ലവം?
ജര്‍മ്മന്‍ ഭീമനായ അലയന്‍സുമായുള്ള പങ്കാളിത്തം ഇന്ത്യയില്‍ ഒരു ഇന്‍ഷുറന്‍സ് വിപ്ലവം സൃഷ്ടിക്കാനുള്ള ജിയോ ഫിനാന്‍ഷ്യല്‍ സര്‍വീസസിന്റെ താല്‍പ്പര്യത്തെ അടയാളപ്പെടുത്തുന്നു. സംയുക്ത സംരംഭം ഒരു റീഇന്‍ഷുറര്‍ ആയാകും പ്രവര്‍ത്തിക്കുക.
ഇന്‍ഷുറന്‍സ് റെഗുലേറ്ററി ആന്‍ഡ് ഡെവലപ്മെന്റ് അതോറിറ്റി ഓഫ് ഇന്ത്യയില്‍ നിന്ന് സംയുക്ത സംരംഭത്തിന് നോ ഒബ്ജക്ഷന്‍ സര്‍ട്ടിഫിക്കറ്റ് ലഭിച്ചിട്ടുണ്ട്. കോര്‍പ്പറേറ്റ് കാര്യ മന്ത്രാലയത്തില്‍ നിന്ന് ഇന്‍കോര്‍പ്പറേഷന്‍ സര്‍ട്ടിഫിക്കറ്റ് ലഭിച്ചു.
പങ്കാളിത്തം റിലയന്‍സിന് നേട്ടം
ഇന്ത്യന്‍ ഇന്‍ഷുറന്‍സ് വിപണിയെ പറ്റി വര്‍ഷങ്ങളുടെ ആഴത്തിലുള്ള അറിവ് അലയന്‍സിനുണ്ട്. അലയന്‍സിന്റെ നിലവിലെ അലയന്‍സ് റീ, അലയന്‍സ് കൊമേഴ്സ്യല്‍ പോര്‍ട്ട്ഫോളിയോകളും, ഇന്ത്യയിലെ പ്രവര്‍ത്തനങ്ങളും സംയുക്ത സംരംഭം പ്രയോജനപ്പെടുത്തും. വിലനിര്‍ണ്ണയം, റിസ്‌ക് സെലക്ഷന്‍, പോര്‍ട്ട്ഫോളിയോ മാനേജ്മെന്റ് വൈദഗ്ദ്ധ്യം എന്നിവയിലുള്ള അലയന്‍സിന്റെ കഴിവ് റിലയന്‍സ് ജിയോയ്ക്ക് കൂടുതല്‍ കരുത്താകും.
ജിയോ- അലയന്‍സ് സഹകരണം ഇന്ത്യന്‍ ഇന്‍ഷുറന്‍സ് കമ്പനികള്‍ക്ക് കൂടുതല്‍ കരുത്തുപകരുമെന്നാണ് വിലയിരുത്തല്‍. റീഇന്‍ഷുറര്‍ എന്ന നിലയില്‍ കമ്പനി സേവനം നല്‍കുക ഇന്‍ഷുറന്‍സ് കമ്പനികള്‍ക്കാകും. രാജ്യത്തെ ഇന്‍ഷുറന്‍സ് കമ്പനികള്‍ക്ക് ജിയോ- അലയന്‍സ് പങ്കാളിത്തത്തില്‍ അപകടസാധ്യതകള്‍ കൂടുതല്‍ ഫലപ്രദമായി കൈകാര്യം ചെയ്യാനും, ശക്തമായ അണ്ടര്‍റൈറ്റിംഗ് കഴിവുകള്‍ ലഭ്യമാക്കാനും സാധിക്കും.
സംയുക്ത സംരംതം മുഴുവന്‍ ഇന്‍ഷുറന്‍സ് ആവാസവ്യവസ്ഥയുടെയും പ്രതിരോധശേഷി വര്‍ധിപ്പിക്കുമെന്ന് വിദഗ്ധര്‍ വിലയിരുത്തുന്നു. 2047 ഓടെ എല്ലാവര്‍ക്കും ഇന്‍ഷുറന്‍സ് എന്ന ഇന്ത്യയുടെ ദേശീയ ലക്ഷ്യത്തിനും ഇതു പ്രധാനമാണ്.
