തിരുവനന്തപുരം: ലോകമെമ്പാടുമായി 2030-ഓടെ ഏകദേശം 30 ബില്യണ്‍ ഐഒടി (ഇന്‍റര്‍നെറ്റ് ഓഫ് തിംഗ്സ്) ഉപകരണങ്ങള്‍ കണക്ട് ചെയ്യപ്പെടുമെന്ന പ്രവചനത്തിന്‍റെ പശ്ചാത്തലത്തിലുള്ള നേട്ടങ്ങള്‍ സ്വന്തമാക്കാന്‍ ടെക്നോപാര്‍ക്കിന് കഴിയുമെന്ന് അര്‍മാഡാ.എഐയുടെ ഇന്ത്യ ഗവേഷണ വിഭാഗം മേധാവി ശരത് ചന്ദ്രന്‍. വിവരങ്ങളുടെ സ്വര്‍ണ ഖനിയായ വിവരങ്ങളെ ഉപയോഗപ്പെടുത്തിക്കൊണ്ട് പ്രശ്ന പരിഹാരങ്ങള്‍ കണ്ടെത്തുന്ന ഐഒടി വിപ്ലവത്തില്‍ രാജ്യത്തെ ആദ്യത്തെ ഐടി പാര്‍ക്കായ ടെക്നോപാര്‍ക്കിന് വലിയ പങ്കുണ്ടെന്ന് അദ്ദേഹം അഭിപ്രായപ്പെട്ടു. ടെക്നോപാര്‍ക്കിന്‍റെ ഔദ്യോഗിക വോഡ് കാസ്റ്റ് ആയ ‘ആസ്പയര്‍: സ്റ്റോറീസ് ഓഫ് ഇന്നൊവേഷന്‍’ എന്ന പരിപാടിയില്‍ പ്രസംഗിക്കുകയായിരുന്നു അദ്ദേഹം. ഐഒടിയുടെ നേട്ടങ്ങള്‍ ഉപയോഗപ്പെടുത്താന്‍ കഴിയുന്ന മികച്ച സാങ്കേതികവിദ്യ, സ്റ്റാര്‍ട്ടപ്പ് ആവാസവ്യവസ്ഥ നിര്‍മിക്കുന്നതിന്‍റെ പാതയിലാണ് ടെക്നോപാര്‍ക്.
എഡ്ജ് എഐയില്‍ കൂടുതല്‍ കണ്ടെത്തലുകള്‍ നടത്തണമെന്ന് ശരത് ചന്ദ്രന്‍ യുവ ഡെവലപ്പര്‍മാരോട് ആഹ്വാനം ചെയ്തു. എഡ്ജില്‍ ആണ് കൂടുതല്‍ ഡാറ്റ ഉത്പാദിപ്പിക്കപ്പെടുന്നത്. ‘പുതുമകള്‍ കൊണ്ടുവരാനും സമഗ്രമായ പരിഹാരങ്ങള്‍ നിര്‍മിക്കാനും വലിയ അവസരങ്ങളുള്ളതിനാല്‍ എഡ്ജ് ആണ് സാങ്കേതികവിദ്യയുടെ ഭാവിയെന്ന് അദ്ദേഹം ചൂണ്ടിക്കാണിച്ചു. ടെക്നോപാര്‍ക്കില്‍ ആദ്യത്തെ ഇന്ത്യന്‍ ഓഫീസ് തുറന്ന് 10 മാസത്തിനുള്ളില്‍ തന്നെ യുഎസ് ആസ്ഥാനമായുള്ള അര്‍മാഡാ.എഐ നൂതന എഐ സാങ്കേതികവിദ്യ വികസിപ്പിക്കുന്നതിലെ പ്രധാന കേന്ദ്രമായി ഇതിനെ മാറ്റി. രാജ്യത്തെ ഞങ്ങളുടെ പ്രധാന ഓഫീസായി തിരുവനന്തപുരത്തെ തിരഞ്ഞെടുക്കുന്നതിന് നിരവധി ഘടകങ്ങളുണ്ടെന്ന് ശരത് ചന്ദ്രന്‍ വ്യക്തമാക്കി. കുറഞ്ഞ ചെലവ്, പ്രതിഭകളുടെ ലഭ്യത, ജീവിത നിലവാരം, പ്രതിഭകളെ നിലനിര്‍ത്താനുള്ള കഴിവ് എന്നിവ ഗുണകരമായിരുന്നു. ഇതുകൂടാതെ, അര്‍മാഡയുടെ സാധ്യതകള്‍ ടെക്നോപാര്‍ക് തിരിച്ചറിയുകയും ലോകോത്തര നിലവാരമുള്ള സൗകര്യങ്ങള്‍ നല്‍കുകയും ചെയ്തു. സംസ്ഥാനത്തെ ഊര്‍ജസ്വലമായ ഐടി ആവാസവ്യവസ്ഥയില്‍ ഏത് തരത്തിലുള്ള പങ്കാളിത്തത്തിനും കമ്പനി തയ്യാറാണെന്ന് അറിയിച്ചു.
സ്റ്റാര്‍ലിങ്കുമായും മൈക്രോസോഫ്റ്റുമായും അര്‍മാഡാ.എഐ പങ്കാളിത്തത്തില്‍ ഏര്‍പ്പെട്ടിട്ടുണ്ട്, ഈ സഹകരണം സാങ്കേതികവിദ്യയുടെ ഏറ്റവും പുതിയ വിവരങ്ങള്‍ ലഭിക്കുന്നതിനൊപ്പം സഹകരണ ആവാസവ്യവസ്ഥയിലും വിവിധ വിപണികളിലും മികച്ച സ്വാധീനം നേടാന്‍ സഹായിക്കുന്നു. ഉപഭോക്താക്കള്‍ക്ക് സ്റ്റാര്‍ലിങ്ക് കണക്ടിവിറ്റി മികച്ച രീതിയില്‍ കൈകാര്യം ചെയ്യാനും ഒപ്റ്റിമൈസ് ചെയ്യാനും സഹായിക്കുന്ന സോഫ്റ്റ്വെയര്‍ പ്ലാറ്റ് ഫോം സൃഷ്ടിക്കുന്നതിനാണ് സ്റ്റാര്‍ലിങ്കുമായുള്ള പങ്കാളിത്തം ലക്ഷ്യം വയ്ക്കുന്നത്. ലോകത്തിന്‍റെ വിദൂര ഭാഗങ്ങളില്‍ പ്രവര്‍ത്തിക്കുന്ന പരിമിതമായ കണക്ടിവിറ്റിയുള്ള കമ്പനികളെ അര്‍മാഡയുടെ എഐ, എഡ്ജ് കമ്പ്യൂട്ടിംഗ് സൊല്യൂഷനുകള്‍ സഹായിക്കുന്നു. ഡിജിറ്റല്‍ വിഭജനം ഇല്ലാതാക്കുക എന്നതാണ് കമ്പനിയുടെ അടിസ്ഥാനപരമായ ദൗത്യമെന്ന് അദ്ദേഹം പറഞ്ഞു.
