ന്യൂഡൽഹി: നഗരങ്ങളിലെ ചെറു ഭവനങ്ങൾ 60,000 കോടി രൂപയുടെ പലിശ സബ്‌സിഡിക്ക് അംഗീകാരം. നഗരങ്ങളിൽ താമസിക്കുന്ന സാമ്പത്തികമായി പിന്നോക്കം നിൽക്കുന്നവരുടെ ഭവനവായ്പ സബ്സിഡി പദ്ധതിക്ക് അംഗീകാരം നൽകി ധനമന്ത്രാലയം. 60,000 കോടി രൂപയുടെ പലിശ സബ്സിഡി പദ്ധതിക്കാണ് അംഗീകാരം നൽകിയിരിക്കുന്നത്.
നഗരത്തിലെ ഭവന പദ്ധതികളെ ശക്തിപ്പെടുത്തുന്നതിനും സഹായകരമായ സബ്സിഡി സ്കീമാണിത്. ധനമന്ത്രാലയത്തിന്റെ ഭാഗമായ എക്‌സ്‌പെൻഡിച്ചർ ഫിനാൻസ് കമ്മിറ്റി, ഭവന മന്ത്രാലയത്തിന്റെ നിർദ്ദേശത്തിന് അംഗീകാരം നൽകിയതായി ആണ് റിപ്പോ‍ർട്ടുകൾ.
നഗരപ്രദേശങ്ങളിൽ താങ്ങാനാവുന്ന വിലയിലെ ഭവനങ്ങൾ പ്രോത്സാഹിപ്പിക്കുന്നതിൽ പദ്ധതി നിർണായകമായേക്കും എന്നാണ് സൂചന. സ്വാതന്ത്ര്യ ദിനത്തിൽ നടത്തിയ പ്രസംഗത്തിൽ, നഗരങ്ങളിലെ ചേരികളിലും വാടകവീടുകളിലും അനധികൃത കോളനികളിലും താമസിക്കുന്നവർക്ക് സ്വന്തമായി വീടുണ്ടാക്കാൻ ബാങ്ക് വായ്പകൾക്ക് പലിശ സബ്സിഡി നൽകുന്ന പദ്ധതി പ്രധാനമന്ത്രി നരേന്ദ്ര മോദി പ്രഖ്യാപിച്ചിരുന്നു.
ഒപ്പം പുതിയ ഹോം ലോൺ സബ്സിഡി സ്കീം കേന്ദ്രം പ്രഖ്യാപിക്കാൻ ഒരുങ്ങുന്നതായും സൂചനകളുണ്ട്. ഭവന വായ്പഎടുത്തിട്ടുള്ള നിരവധി സാധാരണക്കാർക്ക് ആശ്വാസമായ പ്രഖ്യാപനം ഉണ്ടാകുമെന്നാണ് സൂചന.
പദ്ധതിയുടെ വിശദാംശങ്ങൾ പൂർണമായി പ്രഖ്യാപിച്ചിട്ടില്ല. അടുത്ത അഞ്ച് വർഷത്തിനുള്ളിൽ ആണ് നഗരങ്ങളിലെ ചെറു വീടുകൾക്കായി സബ്‌സിഡിയോടെ വായ്പ നൽകുന്നത്. ഇന്ത്യ 60,000 കോടി രൂപയാണ് ഇതിനായി ചെലവഴിക്കുന്നത്. 2024 ലെ പൊതു തെരഞ്ഞെടുപ്പിന് മുന്നോടിയായി അധികം വൈകാതെ തന്നെ ബാങ്കുകൾ പദ്ധതി നടപ്പാക്കുമെന്നാണ് സൂചന.
നഗരങ്ങളിൽ താമസിക്കുന്ന ദുർബല വിഭാഗങ്ങൾ ഒരുപാട് പ്രശ്നങ്ങൾ അഭിമുഖീകരിക്കുന്നുണ്ട്. ഇടത്തരം കുടുംബങ്ങളിലെ പലരും സ്വന്തമായി വീട് വാങ്ങുന്നത് സ്വപ്നം കാണുന്നു.
നഗരങ്ങളിൽ താമസിക്കുന്നവരിൽ വാടക വീടുകളിലും ചേരികളിലും അനധികൃത കോളനികളിലും കഴിയുന്ന കുടുംബങ്ങൾക്ക് പ്രയോജനം ചെയ്യുന്ന പുതിയ പദ്ധതി കൊണ്ടുവരും എന്നാണ് പ്രധാനമന്ത്രി നൽകിയ സൂചന.
ഹോം ലോൺ എടുത്ത് ചെറുവീടുകൾ വയ്ക്കുന്നവ‍ർക്ക് പലിശ നിരക്കിലെ ഇളവ് കൂടാതെ വായ്പാ സബ്സിഡിയും നൽകിയേക്കും.
