ന്യൂഡൽഹി: രാസവളങ്ങളുടെയും കുമിൾനാശിനിയായ തുരിശിന്റെയും (കോപ്പർ സൾഫേറ്റ്) വില ഇരട്ടിയിലധികം വർധിച്ചത് കർഷകർക്ക് കനത്ത ബാധ്യതയാകുന്നു. സ്വർണത്തിനു വില കൂടിയതോടെ ചെമ്പിന് ഡിമാൻഡ് ഉയർന്നതാണ് ചെമ്പ് പ്രധാന ഘടകമായ തുരിശിന്റെ വില കൂടാൻ കാരണമായത്.
കൃഷിയിടങ്ങളിൽ കർഷകർ വ്യാപകമായി ഉപയോഗിക്കുന്ന തുരിശിന്റെ വില കിലോഗ്രാമിന് 210 രൂപയിൽ നിന്നു 540 രൂപയായാണ് കുതിച്ചത്. സംഭരണം കുറഞ്ഞതിനാൽ വേണ്ടത്ര കിട്ടാനുമില്ലാത്ത അവസ്ഥ.
തെങ്ങ്, കുരുമുളക്, പച്ചക്കറി, റബർ എന്നിവയിലെ കുമിൾ രോഗത്തിനുള്ള പ്രതിവിധിയായാണ് തുരിശ് പ്രധാനമായും ഉപയോഗിക്കുന്നത്. മഴക്കാലത്ത് തുരിശിന്റെ ഉപയോഗം കൂടുതലാകുന്ന സാഹചര്യത്തിൽ വിലക്കയറ്റം സാരമായി ബാധിക്കുന്നതായി കർഷകർ പറയുന്നു.
രാസവളങ്ങളുടെ വില വർധിച്ചതും കർഷകർക്ക് തിരിച്ചടിയാണ്. ഫാക്ടംഫോസ് ചാക്കിനു ഫെബ്രുവരിയിൽ 1425 രൂപ ഉണ്ടായിരുന്നിടത്ത് ഇപ്പോഴത്തെ വില 2300 രൂപയാണ്. പൊട്ടാഷ് 1800ൽ നിന്നു 2200ൽ എത്തി. ഇതനുസരിച്ച് കോംപ്ലക്സ് വളങ്ങളുടെ വിലയും കൂടി. അടുത്ത മാസം മുണ്ടകൻ നെൽകൃഷി ആരംഭിക്കും. നവംബറിൽ പുഞ്ചയും തുടങ്ങും.
ഇറാൻ യുദ്ധത്തെ തുടർന്ന് രാജ്യാന്തര വിപണിയിൽ വളം നിർമാണത്തിനുള്ള രാസവസ്തുക്കളുടെ ഇറക്കുമതിയിലുണ്ടായ കുറവും വിലക്കയറ്റവുമാണ് വളത്തിന്റെയും കീടനാശിനികളുടെയും വില വർധിക്കാൻ കാരണമെന്ന് പറയുന്നു.
കേന്ദ്രസർക്കാർ രാസവള കമ്പനികൾക്ക് നൽകിയിരുന്ന സബ്സിഡി കുറച്ചതും വിലക്കയറ്റത്തിനു കാരണമായി.
