നിർമിതബുദ്ധി ഉപയോഗിച്ചുള്ള ആൾമാറാട്ട തട്ടിപ്പുകൾ വർധിച്ചുവരുന്ന സാഹചര്യത്തിൽ, ഉപയോക്താക്കൾക്ക് സുരക്ഷയൊരുക്കാൻ പുതിയ സംവിധാനവുമായി ഗൂഗിൾ. ‘വ്യാജ കോൾ ഡിറ്റക്ഷൻ’ എന്ന ഈ പുതിയ സുരക്ഷാ സവിശേഷത, ആൻഡ്രോയിഡ് ഫോണുകളിലെ തട്ടിപ്പ് കോളുകളെ തിരിച്ചറിയാനും തടയാനും സഹായിക്കും. മൊബൈൽ വ്യവസായത്തിൽ ഇത്തരത്തിലൊന്ന് ആദ്യമായാണ് അവതരിപ്പിക്കുന്നത്.
തട്ടിപ്പുകാർ AI ഉപയോഗിച്ച് തങ്ങളുടെ പ്രിയപ്പെട്ടവരുടെ ശബ്ദം ക്ലോൺ ചെയ്ത് പണം തട്ടുന്ന സംഭവങ്ങൾ വ്യാപകമായതോടെയാണ് ഗൂഗിളിന്റെ ഈ സുരക്ഷാ നീക്കം. ‘ഫോൺ ബൈ ഗൂഗിൾ’ ആപ്പ് ഉപയോഗിക്കുന്നവർക്കാണ് ഈ സൗകര്യം ലഭിക്കുക. ഉപയോക്താക്കൾക്കിടയിൽ നടക്കുന്ന ആശയവിനിമയം എൻഡ്-ടു-എൻഡ് എൻക്രിപ്റ്റഡ് ആർ.സി.എസ് സാങ്കേതികവിദ്യ വഴിയാണ് നടക്കുന്നത്.
ഒരാൾ വിളിക്കുമ്പോൾ, ആ കോൾ യഥാർത്ഥമാണോ എന്ന് ഉറപ്പുവരുത്താൻ ഫോണുകൾ തമ്മിൽ ഒരു ‘ഡിജിറ്റൽ ഹാൻഡ്ഷേക്ക്’ നടക്കും. കോൾ ചെയ്യുന്നയാൾ പരിചയമുള്ള ആളാണെന്ന് അവകാശപ്പെട്ടാലും, ഈ പരിശോധനയിൽ പിഴവ് സംഭവിക്കുകയാണെങ്കിൽ ഉപയോക്താവിന് ഉടൻ തന്നെ ഓൺ-സ്ക്രീൻ മുന്നറിയിപ്പ് ലഭിക്കും. അത്തരം കോളുകൾ ഉടൻ അവസാനിപ്പിക്കാൻ ഈ മുന്നറിയിപ്പ് നിർദ്ദേശിക്കുന്നു.
ഈ സംവിധാനം പൂർണ്ണമായും സ്വകാര്യമായാണ് പ്രവർത്തിക്കുന്നതെന്ന് ഗൂഗിൾ ഉറപ്പുനൽകുന്നു. സുരക്ഷാ ക്രമീകരണങ്ങൾ ഡിഫോൾട്ടായി പ്രവർത്തനക്ഷമമാക്കിയിട്ടുണ്ടെങ്കിലും, ആവശ്യമെങ്കിൽ ‘ഫോൺ ബൈ ഗൂഗിൾ’ ആപ്പ് സെറ്റിംഗ്സ് വഴി ഇത് ഓഫാക്കാനും ഉപയോക്താക്കൾക്ക് സാധിക്കും.
ആഗോളതലത്തിൽ സാമ്പത്തിക തട്ടിപ്പുകൾ വൻതോതിൽ വർധിച്ചുവരുന്ന സാഹചര്യത്തിലാണ് പുതിയ നീക്കം. 2024-ൽ അമേരിക്കയിൽ മാത്രം ആൾമാറാട്ട തട്ടിപ്പുകൾ മൂലം മൂന്നു ബില്യൺ ഡോളറിന്റെ നഷ്ടമാണ് റിപ്പോർട്ട് ചെയ്തത്. ഇത്തരം തട്ടിപ്പുകളെ ചെറുക്കാൻ പഴയ കോളർ ഐഡി സംവിധാനങ്ങൾ അപര്യാപ്തമായതോടെയാണ് ഗൂഗിൾ അത്യാധുനിക AI സാങ്കേതികവിദ്യയിലേക്ക് തിരിഞ്ഞത്.
ഈ മാസം മുതൽ പിക്സൽ ഫോണുകളിൽ തുടങ്ങി ആൻഡ്രോയിഡ് 12-ഉം അതിനുശേഷമുള്ള പതിപ്പുകളും പ്രവർത്തിക്കുന്ന എല്ലാ ഫോണുകളിലും ഈ സംവിധാനം ആഗോളതലത്തിൽ ലഭ്യമാകും. ആൻഡ്രോയിഡ് ഉപയോക്താക്കൾക്ക് പ്ലേ സ്റ്റോറിൽ നിന്ന് ‘ഫോൺ ബൈ ഗൂഗിൾ’ ആപ്പ് ഡൗൺലോഡ് ചെയ്ത് ഈ സേവനം ലഭ്യമാക്കാം.
ഗൂഗിൾ മെസേജുകളിലെ സ്കാം ഡിറ്റക്ഷൻ അടക്കമുള്ള നിലവിലെ സുരക്ഷാ സംവിധാനങ്ങൾക്കൊപ്പം പുതിയ സവിശേഷത കൂടി എത്തുന്നതോടെ ആൻഡ്രോയിഡ് ഉപയോക്താക്കൾക്ക് കൂടുതൽ സുരക്ഷിതമായ അനുഭവം ലഭിക്കുമെന്നാണ് കമ്പനിയുടെ വിലയിരുത്തൽ.
