മുംബൈ: ബാങ്കിന്റെ മൊത്ത അഡ്വാൻസുകൾ 20% ഉയർന്ന് 22,802 കോടി രൂപയായതായി ഇക്വിറ്റാസ് സ്മോൾ ഫിനാൻസ് ബാങ്ക് അറിയിച്ചു. 2021 സെപ്റ്റംബർ പാദത്തിൽ ഇത് 18,978 കോടി രൂപയായിരുന്നു. ഇതോടെ വെള്ളിയാഴ്ച ഇക്വിറ്റാസ് സ്മോൾ ഫിനാൻസ് ബാങ്ക് ഓഹരി 1.60% മുന്നേറി 50.85 രൂപയിലെത്തി.
ബാങ്കിന്റെ മൊത്ത അഡ്വാൻസ് കഴിഞ്ഞ പാദത്തിൽ 21,688 കോടി രൂപയായി വർധിച്ചു. ഇത് 5% വർധനയാണ് രേഖപ്പെടുത്തിയത്. കൂടാതെ ത്രൈമാസത്തിലെ വിതരണങ്ങൾ വാർഷികാ അടിസ്ഥാനത്തിൽ 22 ശതമാനവും പാദ അടിസ്ഥാനത്തിൽ 19 ശതമാനവും ഉയർന്നു.
അവലോകന പാദത്തിൽ കാസ നിക്ഷേപങ്ങൾ 28% വർധിച്ച് 10,456 കോടി രൂപയായപ്പോൾ, റീട്ടെയിൽ ടേം ഡെപ്പോസിറ്റുകൾ 7,665 കോടി രൂപയായി ഉയർന്നു. അതേസമയം 2023 സാമ്പത്തിക വർഷത്തെ ആദ്യ പകുതിയിൽ സ്ഥാപനത്തിന്റെ മൊത്തം നിക്ഷേപങ്ങൾ 20% വർധിച്ച് 21,726 കോടി രൂപയായതായി ഇക്വിറ്റാസ് എസ്എഫ്ബി റെഗുലേറ്ററി ഫയലിംഗിൽ പറഞ്ഞു.
ഒന്നാം പാദത്തിൽ ബാങ്കിന്റെ അറ്റാദായം 713.2% ഉയർന്ന് 97.01 കോടി രൂപയായി വർധിച്ചിരുന്നു. ചെറുകിട & ഇടത്തരം സംരംഭങ്ങൾ (എസ്എംഇ), കോർപ്പറേറ്റുകൾ, വ്യക്തികൾ എന്നിവർക്ക് ഉൽപ്പന്നങ്ങളും സേവനങ്ങളും വാഗ്ദാനം ചെയ്യുന്ന സാമ്പത്തിക സ്ഥാപനമാണ് ഇക്വിറ്റാസ് സ്മോൾ ഫിനാൻസ് ബാങ്ക്.
