- മുൻനിര ഇംഗ്ലീഷ് ലാംഗ്വേജ് ടെസ്റ്റായ ഐഇഎൽടിഎസിന്റെ കുത്തക അവസാനിക്കുന്നു
പുതിയ 4 ഇംഗ്ലീഷ് ഭാഷാ പരീക്ഷകൾക്ക് കൂടി കാനഡ അംഗീകാരം നൽകിയതോടെ ലോകത്ത് ഏറ്റവുമധികം പരീക്ഷാർത്ഥികൾ എഴുതുന്ന ഇംഗ്ലീഷ് ലാംഗ്വേജ് ടെസ്റ്റായ ഐഇഎൽടിഎസിന്റെ കുത്തക അവസാനിക്കുന്നു. തങ്ങളുടെ സ്റ്റുഡന്റ് ഡയറക്ട് സ്ട്രീമിന് (SDS) കീഴിലുള്ള അപേക്ഷകർക്ക് ഐഇഎൽടിഎസിനു പുറമെ CELPIP General, CAEL, PTE Academic, TOEFL iBT Test എന്നീ പരീക്ഷകൾ കൂടി എഴുതാൻ ഇമിഗ്രേഷൻ റെഫ്യൂജീസ് ആൻഡ് സിറ്റിസൻഷിപ്പ് കാനഡ (IRCC) അംഗീകാരം നൽകിയത് കഴിഞ്ഞയാഴ്ചയാണ്. 2023 ഓഗസ്റ്റ് 10 മുതൽ പുതിയ പരീക്ഷകളുടെ ഫലങ്ങൾ IRCC സ്വീകരിച്ചു തുടങ്ങും. ഐഇഎൽടിഎസിന് സമാനമായി മറ്റ് 4 ലാംഗ്വേജ് ടെസ്റ്റുകൾക്ക് കൂടി അനുമതി നൽകിയതോടെ ആഗോളതലത്തിൽ വലിയ വിദ്യാഭ്യാസ വിപണിയായ കാനഡയിൽ മത്സരം ശക്തമാകുമെന്ന് ഉറപ്പായി.
മുൻപ് സ്റ്റുഡന്റ് ഡയറക്ട് സ്ട്രീമിന് കീഴിൽ ഐഇഎൽടിഎസ് ജനറൽ, ഐഇഎൽടിഎസ് അക്കാദമിക് എന്നീ രണ്ട് ടെസ്റ്റുകളേ IRCC അംഗീകരിച്ചിരുന്നുള്ളൂ. ഐഡിപി എജ്യുക്കേഷൻ, ബ്രിട്ടിഷ് കൗൺസിൽ, കേംബ്രിഡ്ജ് അസസ്മെൻറ് ഇംഗ്ലീഷ് എന്നിവർ സംയുക്തമായാണ് ഐഇഎൽടിഎസ് പരീക്ഷ നടത്തുന്നത്. ഐഇഎൽടിഎസ് ജനറൽ, ഐഇഎൽടിഎസ് അക്കാദമിക് പരീക്ഷകളുടേത് പോലെ പരീക്ഷാർത്ഥികളുടെ സ്പീക്കിംഗ്, ലിസണിംഗ്, റീഡിംഗ്, റൈറ്റിംഗ് മേഖലകളിലെ മികവാണ് മറ്റു 4 ടെസ്റ്റുകളിലും വിലയിരുത്തുന്നത്. CELPIP General ടെസ്റ്റിൽ നാല് വിഭാഗത്തിലും മിനിമം സ്കോർ 7 ആണ് വിജയിക്കാൻ വേണ്ടത്. CAEL, PTE Academic ടെസ്റ്റുകളിൽ വിജയിക്കാൻ വേണ്ട മിനിമം സ്കോർ 60 ആണ്. TOEFL iBT Test വിജയിക്കാൻ വേണ്ട മിനിമം സ്കോർ 83 ആണ്. 4 ടെസ്റ്റുകൾക്കും പരീക്ഷാർത്ഥികൾ ടെസ്റ്റ് സെന്ററിൽ നേരിട്ടെത്തി പരീക്ഷ പൂർത്തിയാക്കണമെന്ന നിബന്ധനയുണ്ട്.
അതിനിടെ IRCCയുടെ പുതിയ തീരുമാനത്തെ തുടർന്ന് ഐഇഎൽടിഎസ് പരീക്ഷയുടെ ആഗോള നടത്തിപ്പുകാരായ, ഓസ്ട്രേലിയ ആസ്ഥാനമായ ഐഡിപി എജ്യുക്കേഷന് ഓഹരി വിപണിയിൽ വലിയ തിരിച്ചടി നേരിട്ടു. ഐഇഎൽടിഎസിന്റെ വലിയ വിപണികളിലൊന്നായ കനേഡിയൻ ഉന്നത വിദ്യാഭ്യാസ-കുടിയേറ്റ മേഖലയിൽ കുത്തക നഷ്ടപ്പെടാൻ സാധ്യതയുണ്ടെന്ന സൂചനയാണ് ഓഹരി വിറ്റൊഴിയാൻ നിക്ഷേപകരെ പ്രേരിപ്പിച്ചത്. ഐഡിപി എജ്യുക്കേഷന് കനേഡിയൻ സ്റ്റുഡന്റ് ഡയറക്ട് സ്ട്രീമിന് (SDS) കീഴിലുള്ള അപേക്ഷകരിൽ 30 ശതമാനമെങ്കിലും നഷ്ടമാകുമെന്ന് മോർഗൻ സ്റ്റാൻലിയും ഗോൾഡ്മാൻ സാച്സും വിലയിരുത്തുന്നു. ഒറ്റ ദിവസം കൊണ്ട് ഓഹരി വില 14% ഇടിഞ്ഞ് 1.1 ബില്യൺ ഡോളറിന്റെ മൂല്യശോഷണം കമ്പനിക്കുണ്ടായി.
പ്രതിവർഷം 30 ലക്ഷത്തിലേറെ പേരാണ് ഐഇഎൽടിഎസ് പരീക്ഷ എഴുതുന്നത്. ആഗോളതലത്തിൽ സർവകലാശാലകൾ, ഇമിഗ്രേഷൻ ഓഫീസുകൾ, തൊഴിൽദായകർ എന്നിവയടക്കം 11,000 ൽ അധികം സ്ഥാപനങ്ങൾ ഭാഷാ മികവിൻ്റെ മാനദണ്ഡമായി ഐഇഎൽടിഎസ് സ്കോർ പരിഗണിക്കുന്നു. കനേഡിയൻ ഗവണ്മെന്റിന്റെ പുതിയ തീരുമാനം നടപ്പിലാകുന്നതോടെ ഐഡിപി എജ്യുക്കേഷന്റെ ഈ രംഗത്തെ ആഗോള കുത്തകക്ക് കനത്ത ഇടിവുണ്ടാകുമെന്നാണ് വിലയിരുത്തൽ. ഐഡിപിയുടെ വരുമാനത്തിൻ്റെ പ്രധാന പങ്ക് സംഭാവന ചെയ്യുന്നത് ഐഇഎൽടിഎസ് ലാംഗ്വേജ് ടെസ്റ്റിങ്ങ് ആണ്. കൂടുതൽ രാജ്യങ്ങൾ കാനഡയുടെ മാതൃക പിന്തുടരുമെന്ന സൂചനകളും ശക്തമാണ്.
