ന്യൂഡല്ഹി: ഷെഡ്യൂള്ഡ് വാണിജ്യ ബാങ്കുകളുടെ (എസ്സിബി) മൊത്തം നിഷ്ക്രിയ ആസ്തി (ജിഎന്പിഎ) 2022 ഡിസംബറില് 4.5 ശതമാനമായി കുറഞ്ഞു. റിസര്വ് ബാങ്ക് (ആര്ബിഐ) ഏപ്രില് 21 ന് ബുള്ളറ്റിന് അറിയിക്കുന്നു.
റിസര്വ് ബാങ്ക് നിയമമനുസരിച്ച്, 90 ദിവസത്തേക്ക് മൂലധനമോ പലിശയോ തിരിച്ചടയ്ക്കുന്നില്ലെങ്കില് വായ്പയെ എന്പിഎയായി തരംതിരിക്കാം.
അത്തരം വായ്പകള്ക്കെതിരെ ബാങ്കുകള് പ്രൊവിഷന്സ് നീക്കിവയ്ക്കേണ്ടതുണ്ട്. ഇത് അവരുടെ ലാഭത്തെ ബാധിക്കുന്നു.എല്ലാ പ്രധാന മേഖലകളിലും ബാങ്കുകളുടെ ആസ്തി ഗുണനിലവാരം മെച്ചപ്പെട്ടതായി ബുള്ളറ്റിന് കാണിക്കുന്നു.
ആഭ്യന്തര സമ്പദ്വ്യവസ്ഥയുടെയും സാമ്പത്തിക മേഖലയുടെയും അവസ്ഥയെക്കുറിച്ച് ഉള്ക്കാഴ്ച നല്കുന്ന പ്രതിമാസ പ്രസിദ്ധീകരണമാണ് ആര്ബിഐ ബുള്ളറ്റിന്.
2022 ഡിസംബറില് ബാങ്കിംഗ് സംവിധാനത്തിന്റെ അറ്റ നിഷ്ക്രിയ ആസ്തി 1.2 ശതമാനമായിരുന്നുവെന്ന് ആര്ബിഐ ബുള്ളറ്റിന് വ്യക്തമാക്കി.
കെയര് എഡ്ജ് റേറ്റിംഗ്സ് റിപ്പോര്ട്ട് അനുസരിച്ച്, ഷെഡ്യൂള്ഡ് വാണിജ്യ ബാങ്കുകളുടെ മൊത്ത നിഷ്ക്രിയ ആസ്തി 2022 ഡിസംബര് 31 വരെ 19.7 ശതമാനം ഇടിഞ്ഞ് 6.1 ലക്ഷം കോടി രൂപയായിട്ടുണ്ട്.
2022 സാമ്പത്തിക വര്ഷത്തിന്റെ മൂന്നാം പാദത്തില് ബാങ്കുകളുടെ എഴുതിത്തള്ളല് 23,000 കോടിയില് നിന്ന് 25.2 ശതമാനം ഉയര്ന്ന് 29,000 കോടി രൂപയായി. വീണ്ടെടുക്കുമെന്ന പ്രതീക്ഷയില്ലാത്തപ്പോള് വായ്പ എഴുതിത്തള്ളുന്നു. എഴുതിത്തള്ളിയ ആസ്തികള്ക്കായി ബാങ്കുകള് പൂര്ണ്ണ വ്യവസ്ഥകള് ഏര്പ്പെടുത്തേണ്ടതുണ്ട്.
മിക്ക ബാങ്കുകളും മൂന്നാം പാദത്തില് ബാഡ് ഡെബ്റ്റ് എണ്ണത്തില് പുരോഗതി റിപ്പോര്ട്ട് ചെയ്തി്ട്ടുണ്ട്. സ്റ്റേറ്റ് ബാങ്ക് ഓഫ് ഇന്ത്യ 3.14 ശതമാനം മൊത്തം നിഷ്ക്രിയ ആസ്തിയും 0.77 ശതമാനം അറ്റ നിഷ്ക്രിയ ആസ്തിയുമാണ് റിപ്പോര്ട്ട് ചെയ്തത്.
ഇത് ഒരു വര്ഷം മുമ്പ് 4.5 ശതമാനം മൊത്ത നിഷ്ക്രിയ ആസ്തിയെയും 1.34 ശതമാനം അറ്റ നിഷ്ക്രിയ ആസ്തിയെയും അപേക്ഷിച്ച് കുറവാണ്.
ബാങ്ക് ഓഫ് ബറോഡ 4.53 ശതമാനം മൊത്തം നിഷ്ക്രിയ ആസ്തിയും 0.99 ശതമാനം നിഷ്ക്രിയ ആസ്തിയും റിപ്പോര്ട്ട് ചെയ്തപ്പോള് രാജ്യത്തെ ഏറ്റവും വലിയ സ്വകാര്യ ബാങ്കായ എച്ച്ഡിഎഫ്സി ബാങ്ക് 2022 ഡിസംബര് പാദത്തില് ആസ്തി ഗുണനിലവാരത്തില് നേരിയ പുരോഗതി രേഖപ്പെടുത്തി.
