ആഗോള സാങ്കേതിക ഭീമനായ എൻവിഡിയയ്ക്ക് ശേഷം 5 ട്രില്യൺ ഡോളറിന് മുകളിൽ വിപണി മൂല്യം നേടുന്ന രണ്ടാമത്തെ കമ്പനിയായി ആപ്പിൾ മാറി. ഹാർഡ്‌വെയർ ഉൽപ്പാദനച്ചെലവിലെ വർധനവ്, രൂക്ഷമായ എഐ മത്സരം, വിപണിയിലെ വളർച്ചാ മന്ദഗതി എന്നിവയ്ക്കിടയിലും ആപ്പിൾ കൈവരിച്ച ഈ നേട്ടം കമ്പനിയിലുള്ള നിക്ഷേപകരുടെ ഉറച്ച വിശ്വാസത്തെയാണ് അടിവരയിടുന്നത്.
സിഇഒ സ്ഥാനത്തുനിന്നുള്ള ടിം കുക്കിന്റെ 15 വർഷത്തെ സേവനത്തിന് ശേഷമുള്ള പടികളിറക്കത്തിനൊപ്പം തന്നെയാണ് ആപ്പിൾ ഈ ചരിത്രപരമായ നാഴികക്കല്ല് പിന്നിട്ടത്. അദ്ദേഹത്തിന്റെ ഭരണകാലത്ത് കമ്പനിയുടെ വിപണി മൂല്യത്തിൽ 13 മടങ്ങിന്റെ കൂറ്റൻ വർധനവാണ് രേഖപ്പെടുത്തിയത്.
ഡാറ്റാ സെന്ററുകളുടെയും ആർട്ടിഫിഷ്യൽ ഇന്റലിജൻസിന്റെയും കുതിപ്പാണ് എൻവിഡിയയെ സഹായിച്ചതെങ്കിൽ, ആപ്പിളിന്റെ ഉയർച്ചയ്ക്ക് കാരണം അവരുടെ ശക്തമായ ഇക്കോസിസ്റ്റവും ഉയർന്ന വില നൽകിയും ഐഫോണുകൾ വാങ്ങാൻ തയ്യാറാകുന്ന ഉപഭോക്താക്കളുമാണ്.
മെമ്മറി, സ്റ്റോറേജ് ചിപ്പുകളുടെ വില വർധിച്ചതിനെ തുടർന്ന് ആപ്പിൾ തങ്ങളുടെ ഉൽപ്പന്നങ്ങളുടെ വില ഉയർത്തിയിരുന്നെങ്കിലും ഓഹരി മൂല്യത്തിൽ 25 ശതമാനത്തോളം വർധനവാണുണ്ടായത്. പുതിയ ഫോൾഡബിൾ മോഡലായ ഐഫോൺ ഡ്യുവോയുടെ വരവും സിരിയിലെ പുതിയ എഐ അപ്‌ഗ്രേഡുകളും വരുംദിവസങ്ങളിലും കമ്പനിയുടെ വരുമാന വളർച്ചയ്ക്ക് ആക്കം കൂട്ടുമെന്നാണ് സാമ്പത്തിക വിദഗ്ധരുടെ വിലയിരുത്തൽ.
അതേസമയം എഐ രംഗത്തെ കടുത്ത മത്സരവും ഓപ്പൺഎഐ ഉയർത്തുന്ന ഭീഷണികളും ആപ്പിളിന് വരുംദിവസങ്ങളിൽ വലിയ വെല്ലുവിളിയാകാൻ സാധ്യതയുണ്ട്. ആപ്പിളിന്റെ ജീവനക്കാരെയും വ്യാപാര രഹസ്യങ്ങളെയും കേന്ദ്രീകരിച്ച് ഓപ്പൺഎഐക്കെതിരെ കമ്പനി നിയമപോരാട്ടം ആരംഭിച്ചുകഴിഞ്ഞു.
വിപണിയിൽ എഐ സാങ്കേതികവിദ്യ അതിവേഗം മാറിമറിയുന്ന സാഹചര്യത്തിൽ പുതിയ നേതൃത്വത്തിന് കീഴിൽ ആപ്പിൾ തങ്ങളുടെ മുന്നേറ്റം എങ്ങനെ തുടരുമെന്നതാണ് ആഗോള ടെക് ലോകം ഉറ്റുനോക്കുന്നത്.
