മുംബൈ: റഷ്യയിലെ കിങ്ങ്സെപ്പിലെ ഉൽപ്പാദന സൗകര്യത്തിൽ യൂറോചെം മെഥനോളിനുള്ള ജലശുദ്ധീകരണ പാക്കേജിനായി കൊറിയയിലെ ഡിഎൽഇ&സി കമ്പനി ലിമിറ്റഡിൽ നിന്ന് ഏകദേശം 149 കോടി രൂപയുടെ എഞ്ചിനീയറിംഗ്, പ്രൊക്യുർമെന്റ് (EP) ഓർഡർ സ്വന്തമാക്കി വാട്ടർ ടെക്നോളജി സ്പെയ്സിലെ പ്രമുഖ കമ്പനിയായ വാ ടെക് വാബാഗ്. ഡിസൈൻ, എഞ്ചിനീയറിംഗ്, സപ്ലൈ, ഇൻസ്റ്റാളേഷൻ, കമ്മീഷൻ ചെയ്യൽ, പ്ലാന്റിന്റെ സ്റ്റാർട്ട്-അപ്പ് എന്നിവ ഉൾപ്പെടുന്ന കാര്യങ്ങളാണ് ഈ ഓർഡറിന്റെ പരിധിയിൽ വരുന്നത്. 15 മാസമാണ് പദ്ധതിക്കുള്ള കരാർ കാലാവധി.
ഈ ഓർഡർ ലഭിച്ചതോടെ വ്യാവസായിക മലിനജല വിഭാഗത്തിൽ വാബാഗിന്റെ സ്ഥാനം കൂടുതൽ ശക്തിപ്പെട്ടതായും, വാബാഗ് ഇന്ത്യയുടെയും വാബാഗ് റൊമാനിയയുടെയും സംയുക്ത പരിശ്രമത്തിലൂടെയാണ് ഈ ഓർഡർ നേടിയതെന്നും വാ ടെക് വാബാഗ് ഇന്ത്യ അറിയിച്ചു. ഈ പ്രോജക്റ്റ് ഉപ്പുവെള്ളം സംസ്കരിക്കുന്നതിന് അൾട്രാഫിൽട്രേഷൻ, മൃദുലമാക്കൽ, റിവേഴ്സ് ഓസ്മോസിസ് എന്നീ സാങ്കേതികവിദ്യകൾ ഉപയോഗിക്കുമെന്നും. ഈ ഓർഡറിൽ മതിയായ പേയ്മെന്റ് സെക്യൂരിറ്റികൾ ഉൾപ്പെടുന്നതായും കമ്പനി കൂട്ടിച്ചേർത്തു.
മുനിസിപ്പൽ, വ്യാവസായിക ഉപയോക്താക്കൾക്കായി ജലശുദ്ധീകരണത്തിൽ ശ്രദ്ധ കേന്ദ്രീകരിക്കുന്ന ഒരു ഇന്ത്യൻ ബഹുരാഷ്ട്ര കമ്പനിയാണ് വാ ടെക് വാബാഗ് ലിമിറ്റഡ്. ഇതിനകം 6000-ലധികം പ്രോജക്ടുകൾ പൂർത്തിയാക്കിയ കമ്പനിക്ക് 30-ലധികം രാജ്യങ്ങളിൽ പ്രവർത്തന സാന്നിധ്യമുണ്ട് .
