ഗൂഗിളിനൊപ്പം രണ്ട് പതിറ്റാണ്ട് പൂർത്തിയാക്കി സുന്ദർ പിച്ചൈ. ഇൻസ്റ്റാഗ്രാമിൽ സുന്ദർ പിച്ചൈ തന്നെയാണ് തന്റെ 20 വർഷത്തെ യാത്രയെ കുറിച്ച് പങ്കുവെച്ചത്. ചെറുതും എന്നാൽ ഹൃദ്യവുമായ ഒരു കുറിപ്പ് സുന്ദർ പിച്ചൈ പങ്കുവെച്ചിട്ടുണ്ട്.
സുന്ദർ പിച്ചൈയുടെ കുറിപ്പ് ഇങ്ങനെയാണ്;
“2004 ഏപ്രിൽ 26 ഗൂഗിളിലെ എൻ്റെ ആദ്യ ദിവസമായിരുന്നു. അതിനുശേഷം എല്ലാം ഒരുപാട് മാറിയിരിക്കുന്നു – സാങ്കേതികവിദ്യ, ഞങ്ങളുടെ ഉൽപ്പന്നങ്ങൾ ഉപയോഗിക്കുന്ന ആളുകളുടെ എണ്ണം… എൻ്റെ മുടി. മാറാത്ത ഒന്ന് മാത്രം, – ഈ കമ്പനിയിൽ ജോലി ചെയ്യുന്നതിൽ നിന്ന് എനിക്ക് ലഭിക്കുന്ന ആവേശം. 20 വർഷമായി, ഞാൻ ഇപ്പോഴും ഭാഗ്യവാനാണെന്ന് തോന്നുന്നു, ”- സുന്ദർ പിച്ചൈ ഇൻസ്റ്റാഗ്രാമിൽ എഴുതി.
ഇൻസ്റ്റാഗ്രാം പോസ്റ്റിനൊപ്പം ഗൂഗിൾ സിഇഒ ഒരു ചിത്രവും പങ്കുവെച്ചിട്ടുണ്ട്. “20” എന്ന് എഴുതിയ ബലൂണിന്റെ ചിത്രമാണ് അത് . “20 വർഷത്തെ അഭിനന്ദനങ്ങൾ” എന്ന വാക്കുകളുള്ള ഒരു ലാവ വിളക്കും ഒരു മേശപ്പുറത്തുണ്ട്.
ഗൂഗിളിൻ്റെയും ആൽഫബെറ്റിൻ്റെയും സിഇഒയാണ് സുന്ദർ പിച്ചൈ, ആൽഫബെറ്റിൻ്റെ ഡയറക്ടർ ബോർഡിലും സുന്ദർ പിച്ചൈ ഉണ്ട്. 2004-ൽ അദ്ദേഹം ഗൂഗിളിൽ പ്രോഡക്റ്റ് മാനേജർ ആയി ജോലി ചെയ്തു തുടർന്ന് വിവിധ നൂതന ഉൽപ്പന്നങ്ങളിലും സേവനങ്ങളിലും വൈവിധ്യവത്കരിക്കാൻ അദ്ദേഹം കമ്പനിയെ നയിച്ചു.
കഴിഞ്ഞ മൂന്ന് വർഷമായി അദ്ദേഹത്തിന്റെ ശമ്പളം 2 മില്യൺ ഡോളറാണ്. ആഗോള കമ്പനികളിൽ മുൻനിരയിലുള്ള, ഏറ്റവും കൂടുതൽ പ്രതിഫലം വാങ്ങുന്ന, ഇന്ത്യൻ വംശജരായ സിഇഒമാരെക്കുറിച്ച് പരാമർശിക്കുമ്പോഴെല്ലാം സുന്ദർ പിച്ചൈയുടെ പേര് മുന്നിട്ട് നിൽക്കും
