മുംബൈ: മോത്തിലാൽ ഓസ്വാൾ ഫിനാൻഷ്യൽ സർവീസസ് ലിമിറ്റഡിന്റെ (എംഒഎസ്എൽ) പ്രൈവറ്റ് ഇക്വിറ്റി വിഭാഗമായ മോത്തിലാൽ ഓസ്വാൾ ആൾട്ടർനേറ്റ്സ്, വരാനിരിക്കുന്ന മൂന്ന് റെസിഡൻഷ്യൽ പ്രോജക്ടുകളുടെ വികസനത്തിനായി ചെന്നൈ ആസ്ഥാനമായുള്ള ഡെവലപ്പറായ അർബൻറൈസ് – അലയൻസ് ഗ്രൂപ്പിൽ 260 കോടി രൂപ നിക്ഷേപിച്ചു.
മോത്തിലാൽ ഓസ്വാൾ ആൾട്ടർനേറ്റ്സിന്റെ ഭാഗമായ മോത്തിലാൽ ഓസ്വാൾ റിയൽ എസ്റ്റേറ്റ് വഴിയാണ് സ്ഥാപനം നിക്ഷേപമിറക്കിയത്. ബാംഗ്ലൂർ കനകപുര റോഡിലെ 30 ഏക്കർ വില്ല പ്രൊജക്റ്റ്, ബാംഗ്ലൂർ വൈറ്റ്ഫീൽഡ് ഏരിയയിലെ 7 ഏക്കർ ഹൈ-റൈസ് അപ്പാർട്ട്മെന്റ് പ്രോജക്റ്റ്, ഹൈദരാബാദ് നിസാംപേട്ട് ഏരിയയിലെ 17.5 ഏക്കർ അപ്പാർട്ട്മെന്റ് പ്രോജക്റ്റ് എന്നിവയ്ക്കാണ് ഡെവലപ്പർ ഫണ്ട് സ്വരൂപിച്ചത്.
ഈ മൂന്ന് പദ്ധതികളിലെയും മൊത്തം വിൽപ്പന വിസ്തീർണ്ണം 6.2 ദശലക്ഷം ചതുരശ്രയടി വരെ ആയിരിക്കുമെന്നും ഇതിലൂടെ 4,600 കോടി രൂപ വരുമാനം ലഭിക്കുമെന്നും കണക്കാക്കപ്പെടുന്നു. അർബൻറൈസ്-അലയൻസ് ഗ്രൂപ്പ് ഇതുവരെ 7,500-ലധികം വീടുകൾ നിർമ്മിച്ചു. ഡെവലപ്പർ മൊത്തം 54 ദശലക്ഷം ചതുരശ്ര അടി പ്രോജക്ടുകൾ വിവിധ ഘട്ടങ്ങളിലായി വികസിപ്പിച്ചുകൊണ്ടിരിക്കുന്നു. കൂടാതെ കമ്പനിക്ക് 33,000 കോടി രൂപയുടെ റിയൽ എസ്റ്റേറ്റ് പോർട്ട്‌ഫോളിയോയുണ്ട്.
