ന്യൂഡൽഹി: മൊബൈൽ നമ്പർ പോർട്ടബിലിറ്റിക്ക് സമാനമായ രീതിയിൽ, ഉപഭോക്താക്കൾക്ക് ഇനി എൽപിജി ഗ്യാസ് കണക്ഷൻ ഇഷ്ടമുള്ള വിതരണ കമ്പനിയിലേക്ക് മാറ്റാൻ സാധിക്കും. ഗ്യാസ് വിതരണത്തിലെ കാലതാമസം പോലുള്ള പ്രശ്‌നങ്ങൾക്കുള്ള പരിഹാരമായാണ് കേന്ദ്ര സർക്കാർ ഈ സംവിധാനം വീണ്ടും നടപ്പിലാക്കുന്നത്.
ഇതിന്റെ ഭാഗമായി, പൊതുജനങ്ങളിൽ നിന്നും ഓഹരി ഉടമകളിൽ നിന്നും അഭിപ്രായങ്ങൾ ക്ഷണിച്ചതായി പെട്രോളിയം ആൻഡ് നാച്ചുറൽ ഗ്യാസ് റെഗുലേറ്ററി ബോർഡ് (പിഎൻജിആർബി) അറിയിച്ചു.
എൽപിജി വിതരണം സംബന്ധിച്ച സേവനങ്ങളിൽ അതൃപ്തരായ ഉപഭോക്താക്കൾക്ക് ഈ സംവിധാനം വഴി തങ്ങളുടെ ഇഷ്ടാനുസരണം വിതരണക്കാരെ തിരഞ്ഞെടുക്കാം. 2013-ൽ യുപിഎ സർക്കാർ പരീക്ഷണാടിസ്ഥാനത്തിൽ ഈ സംവിധാനം ആരംഭിച്ചിരുന്നു.
രാജ്യത്ത് 32 കോടിയിലധികം എൽപിജി കണക്ഷനുകളുണ്ടെങ്കിലും, വർഷം തോറും 17 ലക്ഷത്തിലധികം ഉപഭോക്താക്കൾ വിതരണ കാലതാമസം സംബന്ധിച്ച് പരാതികളുമായി രംഗത്തെത്തുന്നുണ്ട്. ഈ പ്രശ്നങ്ങൾ പരിഹരിക്കുന്നതിനാണ് പുതിയ നടപടി.
നിയമങ്ങളും മാർഗ്ഗനിർദ്ദേശങ്ങളും രൂപവത്കരിക്കുന്നതിനായി 2025 ഒക്ടോബർ 15-നകം അഭിപ്രായങ്ങൾ സമർപ്പിക്കാവുന്നതാണ്.
