മുംബൈ: 2023 ഏപ്രിൽ-ജൂൺ പാദത്തിൽ കമ്പനിയുടെ ഏകീകൃത അറ്റ നഷ്ടം 135.96 കോടി രൂപയായി കുറഞ്ഞതായി ഫ്യൂച്ചർ ലൈഫ്സ്റ്റൈൽ ഫാഷൻസ് ലിമിറ്റഡ് (എഫ്എൽഎഫ്എൽ) ശനിയാഴ്ച അറിയിച്ചു. ഒരു വർഷം മുമ്പ് ഇതേ പാദത്തിൽ കമ്പനി 348.08 കോടി രൂപയുടെ അറ്റനഷ്ടം രേഖപ്പെടുത്തിയിരുന്നു. ഫ്യൂച്ചർ ഗ്രൂപ്പിന്റെ ഫാഷൻ വസ്ത്രവ്യാപാര വിഭാഗമാണ് എഫ്എൽഎഫ്എൽ.
അതേസമയം അവലോകന കാലയളവിൽ കമ്പനിയുടെ പ്രവർത്തനങ്ങളിൽ നിന്നുള്ള വരുമാനം 8.42 ശതമാനം കുറഞ്ഞ് 272.88 കോടി രൂപയായി. കഴിഞ്ഞ സാമ്പത്തിക വർഷം ഇതേ കാലയളവിൽ ഇത് 297.99 കോടി രൂപയായിരുന്നുവെന്ന് കമ്പനി അറിയിച്ചു. എന്നാൽ ഈ പാദത്തിൽ എഫ്എൽഎഫ്എല്ലിന്റെ മൊത്തം ചെലവ് ഒരു വർഷം മുൻപത്തെ 656.07 കോടിയിൽ നിന്ന് 436.56 കോടി രൂപയായി കുറഞ്ഞു.
കുറഞ്ഞ വിൽപ്പന അളവ്, സാമ്പത്തിക ചെലവുകൾ, മൂല്യത്തകർച്ച എന്നിവ കാരണം കമ്പനിയുടെ ഒന്നാം പാദത്തിലെ നികുതിക്ക് മുമ്പുള്ള നഷ്ടം 142.40 കോടി രൂപയായിരുന്നു. എഫ്എൽഎഫ്എല്ലിന് അതിന്റെ പോർട്ട്ഫോളിയോയിൽ ഇൻ-ഹൗസ് റീട്ടെയിൽ ശൃംഖലകൾ, ബ്രാൻഡ് ഫാക്ടറി, എക്സ്ക്ലൂസീവ് ബ്രാൻഡ് ഔട്ട്ലെറ്റുകൾ (ഇബിഒകൾ), മറ്റ് മൾട്ടി-ബ്രാൻഡ് ഔട്ട്ലെറ്റുകൾ എന്നിവയുണ്ട്.
സ്ഥാപനത്തിന്റെ നിലവിലെ ബാധ്യതകൾ അതിന്റെ നിലവിലെ ആസ്തികളെക്കാൾ 1,180.66 കോടി രൂപ കവിഞ്ഞതായി ഫ്യൂച്ചർ ലൈഫ്സ്റ്റൈൽ ഫാഷൻസ് ലിമിറ്റഡ് അറിയിച്ചു.
ആസ്തികളുടെ ധനസമ്പാദനം, പ്രവർത്തനങ്ങളിലെ വർദ്ധനവ്, മറ്റ് തന്ത്രപരമായ സംരംഭങ്ങൾ എന്നിവയിലൂടെ മതിയായ പണലഭ്യത ക്രമീകരിക്കാൻ മാനേജ്മെന്റിന് കഴിയുമെന്ന് തങ്ങൾക്ക് ഉറപ്പുണ്ടെന്ന് കമ്പനി കൂട്ടിച്ചേർത്തു. കിഷോർ ബിയാനിയുടെ നേതൃത്വത്തിലുള്ള റീട്ടെയിൽ സാമ്രാജ്യം നിലവിൽ കടുത്ത സാമ്പത്തിക പ്രതിസന്ധിയിലൂടെയാണ് കടന്ന് പോകുന്നത്.
