മുംബൈ: 25.90 കോടി രൂപയ്ക്ക് ഡിജിറ്റൽ ടെക് കമ്പനിയായ ഗോ ആപ്റ്റിവിന്റെ അധിക ഓഹരി ഏറ്റെടുക്കാൻ കരാറിൽ ഏർപ്പെട്ടതായി മരുന്ന് നിർമ്മാതാക്കളായ സിപ്ല അറിയിച്ചു. കരാർ പൂർത്തിയാകുമ്പോൾ ഗോആപ്റ്റിവിൽ സിപ്ലയുടെ മൊത്തം ഓഹരി പങ്കാളിത്തം 22.02 ശതമാനമായി ഉയരും. ഇക്വിറ്റി ഷെയറുകളിലും കൺവെർട്ടിബിൾ പ്രിഫറൻസ് ഷെയറുകളിലും നിക്ഷേപം നടത്തുകയും 30 ദിവസത്തിനകം അല്ലെങ്കിൽ കക്ഷികൾ പരസ്പര സമ്മതത്തോടെയുള്ള മറ്റ് തീയതികൾക്കകം ആവശ്യമായ ക്ലോസിംഗ് വ്യവസ്ഥകൾ നിറവേറ്റുന്നതിന് വിധേയമായി ഇടപാട് പൂർത്തിയാക്കുമെന്ന് സിപ്ല പ്രസ്താവനയിൽ പറഞ്ഞു.
2020 ജൂണിൽ ഗോആപ്റ്റിവിൽ കമ്പനി നടത്തിയ നിക്ഷേപം വളർച്ച കൈവരിക്കുകയും ഇന്ത്യയിലെ താഴ്ന്ന നിര നഗരങ്ങളിലുടനീളം സിപ്ലയുടെ ചാനൽ വ്യാപനം വർദ്ധിപ്പിക്കുകയും ചെയ്തു. നിലവിലെ നിക്ഷേപം ഗോആപ്റ്റിവുമായുള്ള തങ്ങളുടെ പങ്കാളിത്തം കൂടുതൽ ശക്തിപ്പെടുത്തുമെന്നും, ഇതിലൂടെ താങ്ങാനാവുന്നതും ഗുണമേന്മയുള്ളതുമായ മരുന്നുകൾ, എൻഡ്-ടു-എൻഡ് ബ്രാൻഡ് മാർക്കറ്റിംഗ്, ചാനൽ ഇടപഴകൽ എന്നിവയിലൂടെ ഇന്ത്യയിലെ 2-6 ടയർ നഗരങ്ങളിലെ രോഗികൾക്ക് സേവനം എത്തിക്കാൻ തങ്ങളെ സഹായിക്കുമെന്നും സിപ്ലയുടെ എംഡിയും ഗ്ലോബൽ സിഇഒയുമായ ഉമാംഗ് വോറ പറഞ്ഞു.
2013-ൽ സംയോജിപ്പിച്ച ഗോആപ്റ്റിവ് രോഗികളുടെ എണ്ണം വർദ്ധിപ്പിക്കുന്നതിനായി ഫാർമസ്യൂട്ടിക്കൽ കമ്പനികൾക്ക് ഡിജിറ്റൽ സൊല്യൂഷനുകൾ വാഗ്ദാനം ചെയ്യുന്ന ബിസിനസ്സിൽ ഏർപ്പെട്ടിരിക്കുന്ന ഒരു ഡിജിറ്റൽ ടെക്-കമ്പനിയാണ്. ഡിസ്ട്രിബ്യൂഷൻ, ഡിജിറ്റൽ സൊല്യൂഷനുകൾ, ഇന്റഗ്രേറ്റഡ് ബ്രാൻഡ് സെയിൽസ് മാനേജ്മെന്റ്, ഡിജിറ്റൽ മാർക്കറ്റിംഗ്, പേഷ്യന്റ് സപ്പോർട്ട്, ഹെൽത്ത് കെയർ ഡാറ്റ അനലിറ്റിക്സ്, ചാനൽ എൻഗേജ്മെന്റ് തുടങ്ങിയവ ഉൾപ്പെടെയുള്ള എൻഡ് ടു എൻഡ് ബിസിനസ് സൊല്യൂഷനുകൾ ഹെൽത്ത് കെയർ കമ്പനികൾക്കായി ഇത് വാഗ്ദാനം ചെയ്യുന്നു.
