മുംബൈ: ഇന്ത്യൻ സർക്കാരിന്റെ ഉടമസ്ഥതയിലുള്ള ടെലികോം കമ്പനിയായ ഭാരത് സഞ്ചാർ നിഗം ലിമിറ്റഡിന്റെ (ബിഎസ്എൻഎൽ ) എല്ലാ 4ജി നെറ്റ് വർക്കും 5 ജിയിലേക്ക് മാറ്റും. അടുത്ത ആറു മുതൽ എട്ട് മാസത്തിനുള്ളിൽ ഇത് രാജ്യത്ത് നടപ്പാകും. രാജ്യത്ത് സ്വന്തമായി ടെലികോം സംവിധാനം നിർമ്മിക്കാനുള്ള പദ്ധതിയുടെ ഭാഗമായിട്ടാണ് ഈ മാറ്റം എന്ന് കേന്ദ്ര ടെലികോം മിനിസ്റ്റർ ജ്യോതിരാദിത്യ സിന്ധ്യ പറഞ്ഞു.
സ്വന്തമായി 4ജി സാങ്കേതിക വിദ്യയുള്ള രാജ്യങ്ങളുടെ കൂട്ടത്തിലേക്ക് ഇന്ത്യയും ഇപ്പോൾ പ്രവേശിച്ചിട്ടുണ്ടെന്ന് കൗടില്യ ഇക്കണോമിക് എൻക്ലേവ് 2025 ൽ സംസാരിക്കവെ ജ്യോതിരാദിത്യ സിന്ധ്യ പറഞ്ഞു. ചൈന, ദക്ഷിണ കൊറിയ, ഫിൻലാൻഡ്, സ്വീഡൻ എന്നിവിടങ്ങളിൽ നിന്നുള്ള ഹുവാവേ, ഇസഡ്ടിഇ, സാംസങ്, നോക്കിയ, എറിക്സൺ എന്നീ വലിയ കമ്പനികൾക്ക് മാത്രമായിരുന്നു ഇത് ഉണ്ടായിരുന്നത്.
ഇന്ത്യൻ പ്രധന മന്ത്രി നരേന്ദ്ര മോദി, 4ജി സംവിധാനമുള്ള 92,564 ടവറുകൾ ഉദ്ഘാടനം ചെയ്തിരുന്നു. ഇത് കാശ്മീരിനെ കന്യാകുമാരിയായും, ബറൂച്ചിനെ അരുണാചൽ പ്രദേശുമായും ബന്ധിപ്പിക്കുന്നു എന്നും അദ്ദേഹം സമ്മേളനത്തിൽ പറഞ്ഞു.
“ഇന്ന് നമ്മുടെ ഇന്ത്യ 4ജി നിലവാരം ഉള്ള ക്ലബിൽ പ്രവേശിച്ചിരുന്നു. ഇത് രാജ്യത്തിന്റെ ഇന്നോവേഷൻ കേപ്പബിലിറ്റിയും ഇന്നോവേഷൻ എന്റർപ്രൈസിനേയുമാണ് എടുത്ത് കാണിക്കുന്നത്. എന്നാൽ ഇത് ഇവിടെ കൊണ്ട് നിർത്തില്ല, അടുത്ത ആറ് മുതൽ എട്ട് മാസത്തിനുള്ളിൽ, മുഴുവൻ 4 ജി ടവറുകളും 5ജിയിലേക്ക് അപ്‌ഗ്രേഡ് ചെയുകയും, ഇന്ത്യയിൽ ഉടനീളം 5ജി നെറ്റ്‌വർക്ക് സേവനം കൊണ്ടുവരുകയും ചെയ്യും” എന്ന് അദ്ദേഹം പറഞ്ഞു.
“ഇന്ത്യ ഒരു ലക്ഷ്യസ്ഥാനം മാത്രമല്ല, ഒരു ദിശയാണ്, ഇന്ത്യ ശബ്ദം മാത്രമല്ല, ദൗത്യമാണ്. പ്രക്ഷുബ്ധമായ സാഹചര്യങ്ങളിൽ അഭിവൃദ്ധി ആഗ്രഹിക്കുന്നവർ ഇന്ത്യയിലേക്ക് നോക്കാനും നീങ്ങാനും, നിക്ഷേപിക്കാനുമാണ് ഞാൻ പറയുന്നത്” എന്നും അദ്ദേഹം കൂട്ടിച്ചേർത്തു.
ഇന്ത്യയുടെ ഇന്നോവേഷനും ഇക്കോസിസ്റ്റവും അഭിവൃദ്ധി പ്രാപിക്കുന്നുണ്ടെന്നും, അതോടൊപ്പം ആഭ്യന്തര സ്റ്റാർട്ടപ്പുകൾ, ആഗോള സാങ്കേതിക കമ്പനികൾ, എഐ, സെമികണ്ടക്ടറുകൾ, ആശയവിനിമയങ്ങൾ എന്നിവയിലും ഇന്ത്യ പുരോഗതി കൈവരിക്കുന്നുണ്ടെന്നും അദ്ദേഹം പരിപാടിയിൽ പറഞ്ഞു.”
“ലോകത്തിലെ രണ്ടാമത്തെ വലിയ മൊബൈൽ ഫോൺ നിർമാണ രാജ്യവും നമ്മുടേതാണ്. ആഗോളതലത്തിൽ ആശയവിനിമയ എഐ സെമിക്കോൺ ശൃംഖലയിൽ ഇന്ത്യ മുൻപന്തിയിൽ തന്നെയാണ് ഉള്ളത്. ഇത് 2025 ലെ ഇന്ത്യൻ മൊബൈൽ കോൺഗ്രസിൽ പ്രദർശിപ്പിക്കും” എന്നും അദ്ദേഹം പറഞ്ഞു.
ഇന്ത്യൻ മൊബൈൽ കോൺഗ്രസിൽ, 150 രാജ്യങ്ങളിൽ നിന്നുള്ള പ്രതിനിധി സംഘങ്ങൾ, 1,500 പ്രദർശകർ, ഏകദേശം 7,000 പ്രതിനിധികൾ, 4ജി, 5ജി സാങ്കേതികവിദ്യകളുടെ 1,000-ത്തിലധികം ഉപയോഗ കേസുകൾ എന്നിവ ഉണ്ടാകും അതുപോലെ എഐ, ക്വാണ്ടം കമ്പ്യൂട്ടിങ്, ഉയർന്ന സാങ്കേതികവിദ്യകൾ, എന്നിവയിലെ നൂതന ആശയങ്ങൾ പരിപാടിയിൽ ഉയർത്തിക്കാട്ടും.
