യുഎസ് ആസ്ഥാനമായി പ്രവര്ത്തിക്കുന്ന പ്രമുഖ ആര്ട്ടിഫിഷ്യല് ഇന്റലിജന്സ് (AI) സ്റ്റാര്ട്ടപ്പുകളെ ലക്ഷ്യമിട്ട് വന് നിക്ഷേപങ്ങളുമായി വിപ്രോ സ്ഥാപകനും ശതകോടീശ്വരനുമായ അസിം പ്രേംജിയുടെ പ്രൈവറ്റ് ഇന്വെസ്റ്റ്മെന്റ് കമ്പനിയായ ‘പ്രേംജി ഇന്വെസ്റ്റ്’.
ആഗോളതലത്തില് ശ്രദ്ധേയമായ 11 പ്രമുഖ എഐ കമ്പനികളിലാണ് പ്രേംജി ഇന്വെസ്റ്റ് ഇതുവരെ നിക്ഷേപം നടത്തിയിട്ടുള്ളത്. ട്രാക്സന് (Tracxn) പുറത്തുവിട്ട ഏറ്റവും പുതിയ ഡാറ്റ പ്രകാരം ഈ കമ്പനികളുടെ ആകെ വിപണി മൂല്യം നിലവില് 43 ബില്യണ് ഡോളറിലെത്തി നില്ക്കുന്നു. മുന്നിര എഐ കമ്പനികളില് നിശബ്ദമായി നിക്ഷേപം വ്യാപിപ്പിക്കുന്ന ഇന്ത്യന് ഫണ്ടുകളില് ഏറ്റവും മുന്നിലാണ് ഇപ്പോള് പ്രേംജി ഇന്വെസ്റ്റ്.
നിക്ഷേപങ്ങളില് ഭൂരിഭാഗവും യുഎസില്
ആഭ്യന്തര എഐ സ്റ്റാര്ട്ടപ്പുകള്ക്ക് കൂടുതല് ഫണ്ടിംഗ് പിന്തുണ നല്കണമെന്ന ചര്ച്ചകള് ഇന്ത്യയില് ശക്തമായി തുടരുമ്പോഴാണ് പ്രേംജി ഇന്വെസ്റ്റ് ഫണ്ടിന്റെ വലിയൊരു പങ്ക് യുഎസ് കേന്ദ്രീകൃത എഐ കമ്പനികളിലേക്ക് ഒഴുക്കുന്നത്. എന്നാല് ഈ നിക്ഷേപങ്ങളില് ഇന്ത്യന് സാന്നിധ്യവും ശക്തമാണ്.
പ്രേംജി ഇന്വെസ്റ്റ് പിന്തുണ നല്കുന്ന യുഎസ് കമ്പനികളില് അഞ്ചെണ്ണമെങ്കിലും (Hippocratic AI, Baseten, SpotDraft, Galileo Technologies, Pixis AI) ഇന്ത്യന് സംരംഭകര് സ്ഥാപിച്ചവയോ സഹസ്ഥാപകരായുള്ളവയോ ആണ് എന്നതാണ് ശ്രദ്ധേയം. ഇതേസമയം, ഇന്ത്യയിലെ രണ്ട് ബംഗളൂരു അധിഷ്ഠിത എഐ സ്റ്റാര്ട്ടപ്പുകളിലും പ്രേംജി ഇന്വെസ്റ്റ് ആദ്യഘട്ട നിക്ഷേപം നടത്തിയിട്ടുണ്ട്.
മൂല്യം ഉയര്ത്തി മുന്നിര കമ്പനികള്
2021 ജനുവരി 1 മുതല് ആരംഭിച്ച നിക്ഷേപ പരമ്പരകളില് സീഡ് ഫണ്ടിംഗ് മുതല് സീരീസ് എഫ് (Series F) റൗണ്ടുകളില് വരെ പ്രേംജി ഇന്വെസ്റ്റ് പങ്കാളിയായിട്ടുണ്ട്. 19 ഫണ്ടിംഗ് റൗണ്ടുകളിലാണ് കമ്പനി ഇതുവരെ ഭാഗമായത്. ഇതില് 2024, 2025 വര്ഷങ്ങളിലാണ് ഏറ്റവും കൂടുതല് നിക്ഷേപങ്ങള് നടന്നത് (ഓരോ വര്ഷവും അഞ്ച് റൗണ്ടുകള് വീതം).
1 ബില്യണ് ഡോളറിന് താഴെ മൂല്യമുള്ള മറ്റ് 5 കമ്പനികളിലും പ്രേംജി ഇന്വെസ്റ്റിന് പങ്കാളിത്തമുണ്ട്.
വന് നേട്ടവുമായി സ്റ്റാര്ട്ടപ്പുകള്
ഇന്ത്യന് സംരംഭകരായ തുഹിന് ശ്രീവാസ്തവയും പങ്കജ് ഗുപ്തയും ചേര്ന്ന് സ്ഥാപിച്ച ‘ബേസ്റ്റെന്’ (Baseten) എന്ന കമ്പനി 2026 ജൂണില് നടന്ന സീരീസ് എഫ് ഫണ്ടിംഗിലൂടെ മൂല്യം 13 ബില്യണ് ഡോളറായി ഉയര്ത്തി. പ്രേംജി ഇന്വെസ്റ്റ് ആദ്യമായി തുകയിറക്കിയ സമയത്തേക്കാള് ആറ് മടങ്ങ് അധികമാണിത്. കൂടാതെ ഇന്ത്യന് സംരംഭകരായ മുന്ജാല് ഷാ, വിശാല് പരീഖ് എന്നിവര് ചേര്ന്ന് സ്ഥാപിച്ച ‘ഹിപ്പോക്രാറ്റിക് എഐ’യുടെ (Hippocratic AI) മൂല്യം 2024-ലെ 500 മില്യണ് ഡോളറില് നിന്ന് ഏഴിരട്ടി വര്ധിച്ച് 3.5 ബില്യണ് ഡോളറിലെത്തി.
ഈ വര്ഷം ഫെബ്രുവരിയില് പ്രമുഖ വീഡിയോ സ്റ്റാര്ട്ടപ്പായ ‘റണ്വേ’ (Runway) നടത്തിയ 315 മില്യണ് ഡോളറിന്റെ സീരീസ് ഇ റൗണ്ടിലും പ്രേംജി ഇന്വെസ്റ്റ് നിക്ഷേപം നടത്തിയിരുന്നു. ഇതോടെ റണ്വേയുടെ മൂല്യം 5.3 ബില്യണ് ഡോളറായി ഉയര്ന്നു.
