മുംബൈ: ചമ്പ ജില്ലയിൽ 500 മെഗാവാട്ട് ദുഗർ ജലവൈദ്യുത പദ്ധതി നടപ്പിലാക്കുന്നതിനായി ഹിമാചൽ പ്രദേശ് സർക്കാരുമായി കരാർ ഒപ്പിട്ട് പ്രമുഖ ജലവൈദ്യുത കമ്പനിയായ എൻഎച്ച്പിസി. ഈ ജലവൈദ്യുത പദ്ധതിയുടെ നടത്തിപ്പിനുള്ള കരാർ എൻഎച്ച്പിസി ലിമിറ്റഡും ഹിമാചൽ പ്രദേശ് സർക്കാരും തമ്മിൽ 2022 ഓഗസ്റ്റ് 26 ന് ഷിംലയിൽ വച്ച് ഒപ്പുവച്ചു.
ഹിമാചൽ പ്രദേശ് മുഖ്യമന്ത്രി ജയ് റാം താക്കൂർ, എൻഎച്ച്പിസി ലിമിറ്റഡ് മാനേജിംഗ് ഡയറക്ടർ എ കെ സിംഗ് എന്നിവരുടെ സാന്നിധ്യത്തിലാണ് കരാർ ഒപ്പിട്ടത്. എൻഎച്ച്പിസി ജനറൽ മാനേജർ (ഇ) സുരേഷ് കുമാറും ഹിമാചൽ പ്രദേശിലെ എനർജി ഡയറക്ടറേറ്റ് (ഡിഒഇ) ഡയറക്ടർ (ഊർജ്ജം) ഹരികേഷ് മീണയുമാണ് രേഖയിൽ ഒപ്പുവച്ചത്. നേരത്തെ, 449 മെഗാവാട്ട് ദുഗർ ജലവൈദ്യുത പദ്ധതിക്കായുള്ള ധാരണാപത്രം (എം‌ഒ‌യു) എൻ‌എച്ച്‌പി‌സിയും ഹിമാചൽ പ്രദേശ് സർക്കാരും തമ്മിൽ 2019 സെപ്റ്റംബർ 25 ന് ഒപ്പുവച്ചിരുന്നു.
നിലവിലെ പദ്ധതിയുമായി ബന്ധപ്പെട്ട് വനം, പരിസ്ഥിതി മന്ത്രലായങ്ങളുടെ അനുമതികൾക്കായുള്ള നടപടികൾ പുരോഗമിക്കുകയാണ്. ദുഗർ ജലവൈദ്യുത പദ്ധതി ഒരു വർഷം 1,759.85 ദശലക്ഷം യൂണിറ്റ് വൈദ്യുതി ഉൽപ്പാദിപ്പിക്കുമെന്ന് പ്രതീക്ഷിക്കുന്നു.
