ആഗോള വിപണിയിൽ(Global Market) എണ്ണവില(Oil Price) വീണ്ടും വർധിക്കുന്നു. ഡിമാൻഡ് ആശങ്കകൾ ശക്തമായി നിലനിൽക്കുന്നതിനിടെയാണ് എണ്ണവില തിരിച്ചുകയറുന്നത്. വിരലിൽ എണ്ണാവുന്ന ദിവസങ്ങൾക്കുള്ളിൽ ബരലിന് 10 ഡോളറോളം നേട്ടം കൈവരിക്കാൻ എണ്ണയ്ക്കു സാധിച്ചു.
2025ൽ കുറഞ്ഞ എണ്ണ ഡിമാൻഡ് വ്യക്തമാക്കുന്ന രാജ്യാന്തര എനർജി ഏജൻസിയുടെ റിപ്പോർട്ട് പുറത്തുവന്നിട്ടും വില കുതിക്കാനുള്ള ഒരോയൊരു കാരണം എണ്ണക്കമ്പനികളുടെ കള്ളക്കളിയാണ്.
24 മണിക്കൂറിടിനിടെ ആഗോള എണ്ണവില ബാരലിന് 0.50 ശതമാനത്തിനു മുകളിൽ വർധിച്ചു. നിലവിൽ ബ്രെന്റ് ക്രൂഡ് ബാരലിന് 81.02 ഡോളറും, ഡബ്ല്യുടിഐ ക്രൂഡ് ബാരലിന് 78.76 ഡോളറുമാണ്.
ഇൻവെന്ററി ഇടിവാണ് നിലവിലെ വില വർധയ്ക്കു കരുത്തുപകർന്നിരിക്കുന്നത്.
അമേരിക്കൻ പെട്രോളിയം ഇൻസ്റ്റിറ്റ്യൂട്ട് (എപിഐ) പ്രകാരം യുഎസിലെ ക്രൂഡ് ഓയിൽ ഇൻവെന്ററി ആഴ്ചയിൽ 5.205 ദശലക്ഷം ബാരലായി കുറഞ്ഞു.
2 ദശലക്ഷം ബാരലിന്റെ കുറവായിരുന്നു വിശകലന വിദഗ്ധർ പ്രവചിച്ചിരുന്നത്. കഴിഞ്ഞ ആഴ്ചയിൽ ക്രൂഡ് ഇൻവെന്ററികളിൽ 1,80,000 ബാരൽ വർദ്ധനവ് എപിഐ റിപ്പോർട്ട് ചെയ്തിരുന്നു.
സ്ട്രാറ്റജിക് പെട്രോളിയം റിസർവിലെ (എസ്പിആർ) അസംസ്കൃത എണ്ണ ശേഖരം ഓഗസ്റ്റ് 9 വരെ 0.7 ദശലക്ഷം ബാരൽ ഉയർന്നതായി തിങ്കളാഴ്ച ഊർജ വകുപ്പ് (ഡിഒഇ) റിപ്പോർട്ട് ചെയ്തു.
ഇൻവെന്ററികൾ നിലവിൽ 376.5 ദശലക്ഷം ബാരലിലാണ്. ഗ്യാസോലിൻ ഇൻവെന്ററികളും വാരത്തിൽ 3.689 ദശലക്ഷം ബാരൽ കുറഞ്ഞു. കഴിഞ്ഞ ആഴ്ചയിലെ 3.31 ദശലക്ഷം ബാരൽ വർധനയെക്കാൾ കൂടുതലാണ് ഈ ഇടിവ്.
എണ്ണക്കമ്പനികളുടെ കളിയാണ് ഇൻവെന്റിറികളിൽ കാണുന്നതെന്നു ഒരു കൂട്ടം വിദഗ്ധർ പറയുന്നു. കൂപ്പുകുത്തിയ എണ്ണവില വർധിപ്പിക്കുന്നതിനായി അവർ മനഃപ്പൂർവ്വം ഉൽപ്പാദനം കുറയ്ക്കുന്നു.
എന്നിട്ട് പഴി ഡിമാൻഡിനും, സീസണിനും മുകളിൽ ചുമത്തുന്നു. ആഗോള എണ്ണവില വീണ്ടും 80 ഡോളർ പിന്നിട്ടത് ഇന്ത്യയ്ക്ക് നിരാശ പകരുന്നതാണ്. വിലകുറഞ്ഞ റഷ്യൻ എണ്ണയുടെ സാധ്യതകൾ ഒരിക്കൽ കൂടി മങ്ങുകയാണ്.
അതേസമയം കഴിഞ്ഞ ഒരു മാസം കൊണ്ട് മാർജിൻ അൽപം മെച്ചപ്പെടുത്താൻ എണ്ണക്കമ്പനികൾക്കു സാധിച്ചു. ഇതു കുറച്ചുനാൾ കൂടി വിലമാറ്റമില്ലാതെ പെട്രോൾ, ഡീസൽ വിതരണം നടത്താൻ കമ്പനികളെ അനുവദിക്കും.
രാജ്യത്ത് റീട്ടെയിൽ പണപ്പെരുപ്പം അഞ്ചുവർഷത്തെ താഴ്ന്ന നിലയിലേയ്ക്ക് എത്തിയെന്ന് ഏറ്റവും പുതിയ റിപ്പോർട്ടുകൾ വ്യക്തമാക്കുന്നു. ഇതോടെ ആർബിഐ നിരക്കുകൾ കുറയ്ക്കാനുള്ള സാധ്യത വർധിച്ചിട്ടുണ്ട്.
