ന്യൂഡൽഹി: ടെസ്‌ലയെപ്പോലുള്ള ആഡംബര ഇലക്ട്രിക് വാഹന നിർമ്മാതാക്കളുടെ ഇറക്കുമതി തീരുവ കുറയ്ക്കാനുള്ള സാധ്യത മഹീന്ദ്ര ആൻഡ് മഹീന്ദ്ര, ടാറ്റ മോട്ടോഴ്‌സ്, മാരുതി സുസുക്കി, ഹ്യുണ്ടായ് എന്നിവയുൾപ്പെടെയുള്ള ഇന്ത്യൻ ഓട്ടോമൊബൈൽ കമ്പനികളിൽ ആശങ്ക സൃഷ്ടിക്കുന്നു.
വിവിധ ഘട്ടങ്ങളിലായി പരിശോധിച്ചുകൊണ്ടിരിക്കുന്ന നയം ഇപ്പോഴും പരിഗണനയിലാണെന്ന് സർക്കാർ ഉദ്യോഗസ്ഥർ വെളിപ്പെടുത്തി. ഇറക്കുമതി തീരുവ സംബന്ധിച്ച ഏത് തീരുമാനവും രാജ്യത്തെ പ്രധാന വാഹന കമ്പനികളുമായി ആലോചിച്ചതിന് ശേഷമേ എടുക്കൂ.
ഇതുവരെ തീരുമാനമൊന്നും എടുത്തിട്ടില്ലെങ്കിലും ഒരു നിശ്ചിത കാലയളവിലേക്ക് ഇറക്കുമതി തീരുവ കുറയ്ക്കുക എന്നതാണ് പരിഗണിക്കുന്ന ഒരു ഓപ്ഷൻ എന്ന് മുതിർന്ന ഉദ്യോഗസ്ഥൻ ടൈംസ് ഓഫ് ഇന്ത്യയോട് പറഞ്ഞു. നയം “വികസിക്കാൻ” കുറച്ച് സമയമെടുക്കുമെന്ന് ഉദ്യോഗസ്ഥൻ പറഞ്ഞു.
ടെസ്‌ല തങ്ങളുടെ വാഹനങ്ങളുടെ ഇറക്കുമതി തീരുവ കുറയ്ക്കണമെന്ന് ദീർഘകാലമായി വാദിക്കുകയും ആഭ്യന്തര, കയറ്റുമതി വിപണികൾക്കായി കൂടുതൽ താങ്ങാനാവുന്ന വേരിയന്റ് നിർമ്മിക്കുന്നതിനായി ഇന്ത്യയിൽ ഒരു നിർമ്മാണ അടിത്തറ സ്ഥാപിക്കാൻ താൽപ്പര്യം പ്രകടിപ്പിക്കുകയും ചെയ്തിരുന്നു.
എന്നിരുന്നാലും, ടാറ്റ മോട്ടോഴ്‌സ്, മഹീന്ദ്ര ആൻഡ് മഹീന്ദ്ര തുടങ്ങിയ കമ്പനികൾ ഇറക്കുമതി തീരുവ ഇളവ് ചെയ്യുന്നതിനെ ശക്തമായി എതിർത്തു, കാരണം ആത് ഇതിനകം ഗണ്യമായ നിക്ഷേപം നടത്തിയതിന് ശേഷമുള്ള അവരുടെ വിൽപ്പനയെയും ബിസിനസ്സ് സാധ്യതകളെയും അപകടത്തിലാക്കുമെന്ന് അവർ കരുതുന്നു.
“ഇപ്പോൾ തീരുവ വെട്ടിക്കുറക്കുന്നത് പ്രാദേശികമായി നേരത്തെ തന്നെ നിക്ഷേപിച്ചവർക്ക് പ്രതിഫലം നൽകാനുള്ള സർക്കാരിന്റെ മുൻ പ്രതിജ്ഞാബദ്ധതയ്ക്ക് വിരുദ്ധമാകുമെന്ന് അവർ വാദിക്കുന്നു,” ToI റിപ്പോർട്ട് പറയുന്നു. രണ്ട് കമ്പനികൾക്കും ഇതിനകം തന്നെ വിപണിയിൽ വാഹനങ്ങളുണ്ട്, കൂടാതെ പ്രൊഡക്ഷൻ-ലിങ്ക്ഡ് ഇൻസെന്റീവ് (പിഎൽഐ) പദ്ധതിയിൽ പങ്കാളികളുമാണ്.
സൊസൈറ്റി ഓഫ് ഇന്ത്യൻ ഓട്ടോമൊബൈൽ മാനുഫാക്‌ചേഴ്‌സ് (സിയാം), അതിന്റെ കാഴ്ചപ്പാടുകൾ ഔപചാരികമാക്കുന്നതിനും അത് സർക്കാരുമായി പങ്കിടുന്നതിനുമായി മിക്ക കമ്പനികളുമായും ചർച്ചയിൽ ഏർപ്പെട്ടിട്ടുണ്ട്.
സർക്കാരിനുള്ളിൽ പോലും, ഈ നീക്കത്തെക്കുറിച്ച് ഉദ്യോഗസ്ഥർക്ക് പൂർണ്ണ ബോധ്യമില്ല. ഇത് വരുമാന നഷ്ടം മാത്രമല്ല, സാധാരണക്കാരിൽ നിലവിലെ ഭരണകൂടത്തിന്റെ ശ്രദ്ധ, ആഡംബര വിഭാഗത്തിനാണെന്ന തോന്നൽ സൃഷ്ടിക്കുകയും ചെയ്യുമെന്ന് അവർ കരുതുന്നു. കൂടാതെ, ഈ നീക്കം സ്വതന്ത്ര വ്യാപാര കരാറുകളിലെ ചർച്ചാ അവസരങ്ങളെ പരിമിതപ്പെടുത്തും.
എന്നാൽ വർദ്ധിച്ച മത്സരം വൈദ്യുത വാഹനങ്ങൾ സ്വീകരിക്കുന്നത് ത്വരിതപ്പെടുത്തുമെന്ന് നയത്തിന്റെ വക്താക്കൾ വാദിക്കുന്നു.
