മുംബൈ: എച്ച്എസ്ബിസി ഹോൾഡിംഗ്‌സ് പി‌എൽ‌സി അതിന്റെ ഇന്ത്യയിലെ സ്വകാര്യ ബാങ്കിംഗ് ബിസിനസ്സ് ഒരു വർഷത്തിനുള്ളിൽ പുനരാരംഭിക്കാൻ പദ്ധതിയിടുന്നതായി സ്ഥാപനത്തിന്റെ ഇന്ത്യ സിഇഒ റോയിട്ടേഴ്‌സിനോട് പറഞ്ഞു. ഏഷ്യയിലെ തങ്ങളുടെ വളർച്ചയുടെ പ്രധാന തന്ത്രപരമായ വിപണിയാണ് ഇന്ത്യയെന്ന് അദ്ദേഹം പറഞ്ഞു. ഒരു ഗ്രൂപ്പ് സ്ട്രാറ്റജിയുടെ ഭാഗമായി 2015-ൽ എച്ച്എസ്ബിസി ഇന്ത്യൻ സ്വകാര്യ ബാങ്കിംഗ് ബിസിനസിൽ നിന്ന് പുറത്തുകടന്നിരുന്നു. ലണ്ടൻ ആസ്ഥാനമായുള്ള ബാങ്ക് ലാഭത്തിന്റെ കാര്യത്തിൽ ഏറ്റവും വലിയ മേഖലയായ ഏഷ്യയിൽ ശ്രദ്ധ കേന്ദ്രീകരിക്കുന്ന സമയത്താണ് ഇന്ത്യയിൽ ബിസിനസ്സ് പുനരാരംഭിക്കാൻ ഒരുങ്ങുന്നത് എന്നതും ശ്രദ്ധേയമാണ്.
ഇന്ത്യയിൽ സമ്പത്ത് സൃഷ്ടിക്കുന്നതിന്റെ അളവും കോടീശ്വരന്മാരുടെ എണ്ണത്തിലെ വളർച്ചയും നമുക്ക് കാണാൻ കഴിയുമെന്നും, അതിനാൽ ഇന്ത്യയിൽ സ്വകാര്യ ബാങ്കിംഗ് വീണ്ടും അവതരിപ്പിക്കാൻ തങ്ങൾ തത്വത്തിൽ തീരുമാനമെടുത്തിട്ടുണ്ടെന്നും എച്ച്എസ്ബിസി ഇന്ത്യ സിഇഒ ഹിതേന്ദ്ര ദേവ് പറഞ്ഞു. ഈ തിരിച്ച് വരവിന് ആറ് മുതൽ 12 മാസം വരെ എടുത്തേക്കാമെന്ന് അദ്ദേഹം ഒരു അഭിമുഖത്തിൽ പറഞ്ഞു. നിലവിൽ, സിംഗപ്പൂർ, ലണ്ടൻ, മിഡിൽ ഈസ്റ്റ് എന്നിവിടങ്ങളിലെ ആഗോള കേന്ദ്രങ്ങളിൽ നിന്ന് സമ്പന്നരായ ഇന്ത്യക്കാർക്ക് വായ്പ നൽകുന്നതിൽ എച്ച്എസ്ബിസി ശ്രദ്ധ കേന്ദ്രീകരിക്കുന്നു.
അടുത്ത 3-5 വർഷത്തിനുള്ളിൽ വിവിധ ബിസിനസ് സെഗ്‌മെന്റുകളിൽ ഇന്ത്യയിലെ ഉപഭോക്തൃ അടിത്തറ നാലിരട്ടിയാക്കാൻ ബാങ്ക് ലക്ഷ്യമിടുന്നു. എച്ച്എസ്ബിസി ഇന്ത്യയുടെ 2021ലെ നികുതിക്ക് മുമ്പുള്ള ലാഭം 2020ലെ 1.02 ബില്യൺ ഡോളറിൽ നിന്ന് 9% ഉയർന്ന് 1.11 ബില്യൺ ഡോളറായിരുന്നു.
