മുംബൈ: ബർമൻ കുടുംബം വാഗ്ദാനം ചെയ്തതിനേക്കാൾ കൂടുതൽ മൂല്യം കമ്പനിക്കുണ്ടെന്ന് കരുതുന്നതിനാൽ, റിലിഗെയർ എന്റർപ്രൈസസ് ലിമിറ്റഡിന്റെ ബോർഡ് ഒരു സ്വതന്ത്ര മൂല്യനിർണ്ണയ റിപ്പോർട്ട് ആവശ്യപ്പെട്ടതായി റിപ്പോർട്ട്.
ഡാബർ ഇന്ത്യയുടെ പ്രൊമോട്ടറായ ബർമൻ കുടുംബം, ഫിനാൻഷ്യൽ സർവീസ് കമ്പനിയുടെ 5.27 ശതമാനം അധിക ഓഹരി 407 കോടി രൂപയ്ക്ക് വാങ്ങാൻ സെപ്റ്റംബർ 23ന് ഒരു ഓഫർ നൽകിയെന്നും ഇതിന്റെ ഭാഗമായി പൊതുജനങ്ങളിൽ നിന്ന് 26 ശതമാനം അധിക ഓഹരി വാങ്ങാൻ നിർബന്ധിത ഓപ്പൺ ഓഫർ ആരംഭിച്ചുവെന്നും മിന്റ് റിപ്പോർട്ട് ചെയ്തു.
റെഗുലേറ്ററി അംഗീകാരം ശേഷിക്കുന്ന ഇടപാടിന് ഇതുവരെ അന്തിമരൂപമായിട്ടില്ല. രണ്ട് ഇടപാടുകൾക്കുമായി തങ്ങളുടെ നിർദ്ദിഷ്ട വില ഒരു ഷെയറിന് 235 രൂപയാണെന്ന് ബർമൻ കുടുംബം വ്യക്തമാക്കി, ആ സമയത്ത് കമ്പനിയുടെ ഓഹരികൾ ട്രേഡ് ചെയ്തിരുന്ന 275 രൂപയിൽ 15 ശതമാനം കിഴിവ്.
“റിലിഗെയർ ബോർഡ് ഒരു മൂല്യനിർണ്ണയ റിപ്പോർട്ട് തയ്യാറാക്കാൻ ആവശ്യപ്പെട്ടിട്ടുണ്ട്, അതിനായി രണ്ട്-മൂന്ന് കമ്പനികളെ നിയോഗിച്ചിട്ടുണ്ട്,” പേരു വെളിപ്പെടുത്താത്ത ഒരു ജീവനക്കാരൻ പറഞ്ഞതായി മിന്റ് റിപ്പോർട്ട് ചെയ്തു.
രണ്ടാഴ്ചയ്ക്കകം ഇതുമായി ബന്ധപ്പെട്ട റിപ്പോർട്ടുകൾ ലഭ്യമാകുമെന്ന് പ്രതീക്ഷിക്കുന്നതായി സൂചനയുണ്ട്.
ടേക്ക് ഓവർ കോഡ് പ്രകാരം, ടെൻഡറിംഗ് കാലയളവ് ആരംഭിക്കുന്നതിന് മുമ്പ് ഓപ്പൺ ഓഫറിനെക്കുറിച്ച് രേഖാമൂലമുള്ള ശുപാർശ നൽകാൻ ടാർഗെറ്റ് കമ്പനിയുടെ സ്വതന്ത്ര ഡയറക്ടർമാരുടെ കമ്മിറ്റി നിർബന്ധിതരാണെന്ന് എസ് ആൻഡ് ആർ അസോസിയേറ്റ്സിലെ പങ്കാളിയായ സുദീപ് മഹാപത്രയെ ഉദ്ധരിച്ച് മിന്റ് റിപ്പോർട്ട് പറയുന്നു.
സുതാര്യതയും റെഗുലേറ്ററി മാർഗ്ഗനിർദ്ദേശങ്ങൾ പാലിക്കുന്നതും ഉറപ്പാക്കുന്നതിന്, കമ്മിറ്റി അതിന്റെ ശുപാർശയുടെ കാരണങ്ങളും റിപ്പോർട്ടിൽ പരാമർശിക്കേണ്ടതുണ്ട്.
എംബി ഫിൻമാർട്ട്, പുരൺ അസോസിയേറ്റ്സ്, വിഐസി എന്റർപ്രൈസസ്, മിൽക്കി ഇൻവെസ്റ്റ്മെന്റ് ആൻഡ് ട്രേഡിംഗ് കോ തുടങ്ങിയ വിവിധ സ്ഥാപനങ്ങൾ വഴി റെലിഗെയർ എന്റർപ്രൈസസിൽ 21 ശതമാനം ഓഹരി ബർമൻ കുടുംബത്തിന് ഉണ്ട്. ഈ സ്ഥാപനങ്ങൾ കസിൻമാരായ ആനന്ദ്, മോഹിത് ബർമൻ എന്നിവരുമായി ബന്ധപ്പെട്ടിരിക്കുന്നു.
അഞ്ച് വർഷത്തിനിടയിൽ, ബർമൻ കുടുംബം ക്രമേണ റെലിഗെയർ എന്റർപ്രൈസസിലെ ഓഹരികൾ ഉയർത്തിവരികയാണ്. 2018 ഏപ്രിലിൽ 9.9 ശതമാനം ഓഹരികൾ ഏറ്റെടുത്താണ് ഇത് ആരംഭിച്ചത്. തുടർന്ന്, 2021 ജൂണിൽ, ഓഹരിപങ്കാളിത്തം 14 ശതമാനമായി ഉയർത്തി, 2023 ഓഗസ്റ്റിൽ അത് 7.5 ശതമാനം അധിക ഷെയർഹോൾഡിംഗ് സ്വന്തമാക്കി.
നിലവിൽ, ഒരു നിയുക്ത പ്രൊമോട്ടർ ഇല്ലാതെ, പ്രൊഫഷണലുകളാൽ നിയന്ത്രിക്കപ്പെട്ടാണ് റെലിഗെയർ എന്റർപ്രൈസസ് പ്രവർത്തിക്കുന്നത്.
സിംഗ് സഹോദരൻമാരായ മൽവിന്ദർ, ശിവീന്ദർ എന്നിവരുടെ നിയന്ത്രണത്തിലായിരുന്നു കമ്പനി മുമ്പ്. റെലിഗെയർ എന്റർപ്രൈസസിലും അതിന്റെ അനുബന്ധ സ്ഥാപനമായ റെലിഗെയർ ഫിൻവെസ്റ്റ് ലിമിറ്റഡിലും സാമ്പത്തിക ക്രമക്കേടുകൾ ആരോപിച്ച് 2018 ൽ സഹോദരങ്ങളെ അറസ്റ്റ് ചെയ്തു.
