ഡൽഹി: സോവറിൻ വെൽത്ത് ഫണ്ട് അബുദാബി ഇൻവെസ്റ്റ്‌മെന്റ് അതോറിറ്റി (എഡിഐഎ) ഐഐഎഫ്എൽ ഹോം ഫിനാൻസിന്റെ 20 ശതമാനം ഓഹരികൾ 2,200 കോടി രൂപയ്ക്ക് വാങ്ങും. ഐഐഎഫ്എൽ ഹോം ഫിനാൻസിന്റെ നിലവിലെ മൂല്യം 11,000 കോടി രൂപയാണ്. ഇന്ത്യയിലെ ഈ ഹൗസിംഗ് ഫിനാൻസ് വിഭാഗത്തിൽ ഒരു സാമ്പത്തിക നിക്ഷേപകൻ നടത്തുന്ന ഏറ്റവും വലിയ ഇക്വിറ്റി നിക്ഷേപമാണിത്. ഐഐഎഫ്എൽ ഫിനാൻസിന്റെ പൂർണ ഉടമസ്ഥതയിലുള്ള ഉപസ്ഥാപനമായ ഐഐഎഫ്എൽ ഹോം ഫിനാൻസ്, ഭവനവായ്പകളുടെ വർദ്ധിച്ചുവരുന്ന ആവശ്യം നിറവേറ്റുന്നതിനായി പുതിയ വിപണികളിലേക്കുള്ള വിപുലീകരണം തുടരുന്നതിന് ഈ അധിക മൂലധനം ഉപയോഗിക്കാൻ പദ്ധതിയിടുന്നു.
ഐഐഎഫ്എൽ ഹോം ഫിനാൻസിന് 24,000 കോടി രൂപയുടെ ലോൺ ബുക്കും 11,000 കോടി രൂപയുടെ വിപണി മൂല്യവുമാണ് ഉള്ളത്. ചെറിയ-ടിക്കറ്റ് മോർട്ട്ഗേജുകൾ, വസ്തുവകകൾക്കെതിരായ വായ്പകൾ, നിർമ്മാണ ധനസഹായം എന്നിവ വാഗ്ദാനം ചെയ്യുന്ന ഐഐഎഫ്എൽ ഹോം ഫിനാൻസിന് 230 ശാഖകളും 16 ലക്ഷത്തിലധിമായുള്ള ഉപഭോക്തൃ അടിത്തറയുമുണ്ട്. ഐഐഎഫ്എൽ ഫിനാൻസിൽ നിർമൽ ജെയിനും കുടുംബത്തിനും 25% ഓഹരിയുള്ളപ്പോൾ, കനേഡിയൻ നിക്ഷേപകനായ പ്രേം വാട്‌സയുടെ ഫെയർഫാക്‌സ് ഗ്രൂപ്പിനും യുകെയിലെ സി‌ഡി‌സി ഗ്രൂപ്പ് പി‌എൽ‌സിക്കും യഥാക്രമം 22.3%, 7.7% എന്നിങ്ങനെ ഓഹരിയുണ്ട്. ഇവയ്ക്ക് പുറമെ ജനറൽ അറ്റ്ലാന്റിക്, ബെയിൻ ക്യാപിറ്റൽ, ദി ക്യാപിറ്റൽ എന്നിവ ഐഐഎഫ്എൽ ഫിനാൻസിലെ മറ്റ് ചില നിക്ഷേപകരാണ്.
