മുംബൈ: കുറഞ്ഞ ചെലവിൽ ഗ്രീൻ ഹൈഡ്രജൻ ഉൽപ്പാദിപ്പിക്കുന്ന നിർമ്മാണ പ്ലാന്റുകൾ വികസിപ്പിക്കാൻ സഹായിക്കുന്നതിന്, കോടീശ്വരനായ ഗൗതം അദാനിയുടെ അദാനി ഗ്രൂപ്പ് 4 ബില്യൺ ഡോളർ സമാഹരിക്കാൻ ശ്രമിക്കുന്നു.
മുൻനിര കമ്പനിയായ അദാനി എന്റർപ്രൈസസ് ലിമിറ്റഡിന്റെ പൂർണ്ണ ഉടമസ്ഥതയിലുള്ള അദാനി ന്യൂ ഇൻഡസ്ട്രീസ് ലിമിറ്റഡ്, ആഭ്യന്തര, അന്തർദേശീയ ബാങ്കുകളിൽ നിന്ന് പണം സ്വരൂപിക്കുന്നതിന് നേതൃത്വം നൽകുമെന്നും നിരവധി വായ്പാ ദാതാക്കളുമായി പ്രാരംഭ ഘട്ട ചർച്ചകൾ നടത്തുകയാണെന്നും ദേശിയ മാധ്യമങ്ങൾ റിപ്പോർട്ട് ചെയ്തു.
മലിനീകരണത്തിന്റെ തോതിൽ ലോകത്തിലെ മൂന്നാമത്തെ വലിയ രാഷ്ട്രമായ ഇന്ത്യയെ ഡീകാർബണൈസ് ചെയ്യാൻ ശ്രമിക്കുന്നതിനാൽ ഇവിടെ ഗ്രീൻ ഹൈഡ്രജനും അനുബന്ധ ഉൽപ്പന്നങ്ങളും ഉത്പാദിപ്പിക്കാൻ 5 ബില്യൺ ഡോളർ നിക്ഷേപിക്കാൻ പദ്ധതിയിടുന്നതായി ഫ്രാൻസിന്റെ ടോട്ടൽ എനർജീസ് എസ്ഇയും അദാനിയും ജൂണിൽ പറഞ്ഞിരുന്നു.
ഗ്രൂപ്പിന്റെ പ്രവചന മൂലധനച്ചെലവിന്റെ 75% ഹരിത ബിസിനസുകളിലായിരിക്കുമെന്നും അടുത്ത ദശകത്തിൽ പുനരുപയോഗം, ഹരിത ഘടക നിർമ്മാണം, അനുബന്ധ അടിസ്ഥാന സൗകര്യങ്ങൾ എന്നിവയിൽ 20 ബില്യൺ ഡോളർ നിക്ഷേപിക്കാൻ തന്റെ കമ്പനികൾക്ക് പദ്ധതിയുണ്ടെന്നും ഗൗതം അദാനി മുമ്പ് പറഞ്ഞിരുന്നു.
ശുദ്ധമായ സാങ്കേതികവിദ്യയിലേക്കുള്ള പരിവർത്തനത്തിൽ ആഗോളതലത്തിൽ ഇന്ത്യയുടെ നേതൃത്വം സ്ഥാപിക്കാൻ പ്രധാനമന്ത്രി നരേന്ദ്ര മോദി ശ്രമിക്കുന്നതിനാൽ അദാനിയും അദ്ദേഹത്തിന്റെ എതിരാളിയായ മുകേഷ് അംബാനിയും ഗ്രീൻ ഹൈഡ്രജനിൽ വലിയ നിക്ഷേപത്തിനൊരുങ്ങുകയാണ്.
അദാനി ന്യൂ ഇൻഡസ്ട്രീസ് സ്വതന്ത്രമായി പുതിയ മൂലധന സമാഹരണം നടത്തും. പ്രതിവർഷം 1 ദശലക്ഷം മെട്രിക് ടൺ ഗ്രീൻ ഹൈഡ്രജൻ സൗകര്യം ഗുജറാത്തിൽ നിർമ്മിക്കുന്നതാണ് പണം ചെലവഴിക്കുന്ന ആദ്യ പദ്ധതികളിലൊന്ന്. ഈ പ്ലാന്റിൽ നിന്നുള്ള ഉൽപ്പാദനം 2027ൽ ആരംഭിക്കുമെന്നാണ് പ്രതീക്ഷിക്കുന്നത്.
