മുംബൈ: ആഭ്യന്തര വിപണിയും ഓഹരി നിക്ഷേപകരും ആകാംക്ഷയോടെ ഉറ്റുനോക്കുന്ന ടാറ്റ ക്യാപിറ്റലിന്റെ പ്രാരംഭ പൊതു ഓഹരി വിൽപ്പന അഥവാ ഐപിഒ നടപടികൾക്ക് തുടക്കമാകുന്നു.
രാജ്യത്തെ മൂലധന വിപണിയുടെ നിയന്ത്രണ ഏജൻസിയായ സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യ അഥവാ സെബിയുടെ മുൻപാകെ 15,000 കോടിയിലധികം രൂപയുടെ ഐപിഒയ്ക്ക് വേണ്ടിയുള്ള അനുമതി തേടിക്കൊണ്ട് അപേക്ഷ സമർപ്പിച്ചു.
കോൺഫിഡൻഷ്യൽ പ്രീ-ഫയലിങ് മാർഗം മുഖേനയാണ് പ്രാഥമിക രേഖകൾ സമർപ്പിച്ചിരിക്കുന്നത്.
ഐപിഒയുടെ പ്രാഥമിക അനുമതി ചോദിക്കുന്ന ഘട്ടത്തിൽ കമ്പനിയുമായി ബന്ധപ്പെട്ട രേഖകളും വിവരങ്ങളും രഹസ്യമായി സൂക്ഷിക്കാൻ കമ്പനികളെ അനുവദിക്കുന്ന മാർഗമാണ് കോൺഫിഡൻഷ്യൽ പ്രീ-ഫയലിങ് റൂട്ട്.
സെബിയിൽ നിന്നും ഐപിഒയ്ക്ക് അന്തിമ അനുമതി ലഭിക്കുന്ന ഘട്ടത്തിൽ മാത്രമാകും കമ്പനിയെ സംബന്ധിച്ച വിവരങ്ങൾ പൊതുയിടത്തിൽ ലഭ്യമാക്കുന്നത്. എന്തായാലും റിസർവ് ബാങ്കിന്റെ നിബന്ധന പാലിക്കേണ്ടതിനാൽ ഈ വർഷം സെപ്റ്റംബറിനകം ടാറ്റ ക്യാപിറ്റൽ ഐപിഒ നടപടികൾ പൂർത്തിയാകുമെന്നാണ് പ്രതീക്ഷ.
ടാറ്റ ക്യാപിറ്റൽ ഐപിഒ
ടാറ്റ ക്യാപിറ്റലിനെ രാജ്യത്തെ ഒന്നാംനിര നോൺ ബാങ്കിങ് ഫിനാൻസ് കമ്പനികളുടെ പട്ടികയിലാണ് റിസർവ് ബാങ്ക് (ആർബിഐ) ഉൾപ്പെടുത്തിയിരിക്കുന്നത്.
2021 ഒക്ടോബറിൽ ആർബിഐ പുറത്തിറക്കിയ സർക്കുലർ പ്രകാരം, റിസർവ് ബാങ്കിന്റെ ഒന്നാംനിര പട്ടികയിൽ ഉൾപ്പെട്ടിട്ടുള്ള എൻബിഎഫ്സി സ്ഥാപനങ്ങളുടെ ഓഹരികൾ 2025 സെപ്റ്റംബറിനകം സ്റ്റോക്ക് എക്സ്ചേഞ്ചിൽ ലിസ്റ്റ് ചെയ്യണമെന്നും നിഷ്കർഷിച്ചിരുന്നു.
ഇതിന്റെ ഭാഗമായാണ് ടാറ്റ ക്യാപിറ്റൽ ഇപ്പോൾ ഐപിഒ നടപടികൾ ആരംഭിച്ചിരിക്കുന്നത്. അതേസമയം പുതിയ ഓഹരികൾ അനുവദിക്കുന്ന ഫ്രഷ് ഇഷ്യൂ മുഖേനയും നിലവിലുള്ള നിക്ഷേപകരുടെ ഓഹരി കൈമാറ്റം നടക്കുന്ന ഒഎഫ്എസ് രീതിയിലും ഐപിഒയിലൂടെ ഓഹരികൾ ഇഷ്യൂ ചെയ്യുന്നതിനായി കമ്പനിയുടെ ഡയറക്ടർ ബോർഡ് യോഗം നേരത്തെ തന്നെ അംഗീകാരം നൽകിയിരുന്നു.
ടാറ്റ ക്യാപിറ്റൽ: കമ്പനി വിശദാംശം
രാജ്യത്തെ ഏറ്റവും വലിയ വ്യവസായ സംരംഭകരായ ടാറ്റ ഗ്രൂപ്പിന്റെ ഉടമസ്ഥരായ ടാറ്റ സൺസ് പ്രൈവറ്റ് ലിമിറ്റഡിന്റെ ഉപകമ്പനികളിലൊന്നാണ് ടാറ്റ ക്യാപിറ്റൽ ലിമിറ്റഡ്.
ധനകാര്യ മേഖലയിൽ പ്രവർത്തിക്കുന്ന ടാറ്റ ഗ്രൂപ്പ് സംരംഭങ്ങളുടെ ഫ്ലാഗ്ഷിപ്പ് കമ്പനിയുമാണിത്. 2007-ൽ മുംബൈ കേന്ദ്രമാക്കിയാണ് ടാറ്റ ക്യാപിറ്റലിന്റെ തുടക്കം. ടാറ്റ സൺസിന്റെ കൈവശമാണ് കമ്പനിയുടെ 92.83 ശതമാനം ഓഹരികളും ഉള്ളത്. അതേസമയം ബാങ്കിതര ധനകാര്യ സേവന മേഖലയിലാണ് കമ്പനിയുടെ പ്രവർത്തനം കേന്ദ്രീകരിച്ചിട്ടുള്ളത്.
ഇൻവെസ്റ്റ്മെന്റ് ബാങ്കിങ്, കൺസ്യൂമർ ലോൺ, പ്രൈവറ്റ് ഇക്വിറ്റി, കൊമേഷ്യൽ ഫിനാൻസ്, അസറ്റ് ഫിനാൻസ്, ടാറ്റ കാർഡ്സ്, ലീസിങ് സർവീസസ്, ക്ലീൻടെക് ഫിനാൻസ് തുടങ്ങിയ സേവനങ്ങളാണ് ടാറ്റ ക്യാപിറ്റൽ പ്രധാനമായും വാഗ്ദാനം ചെയ്യുന്നത്.
അതുപോലെ ടാറ്റ ക്യാപിറ്റലിന്റെ പൂർണ ഉടമസ്ഥതയിൽ പ്രവർത്തിക്കുന്ന രണ്ട് ഉപകമ്പനികളാണ് ഉള്ളത്. ഭവന വായ്പ, പ്രോപ്പർട്ടി ലോൺ സേവനങ്ങൾ നൽകുന്ന ടാറ്റ ക്യാപിറ്റൽ ഹൗസിങ് ഫിനാൻസ് ലിമിറ്റഡ്, ഓഹരി വ്യാപാരവുമായി ബന്ധപ്പെട്ട സേവനങ്ങൾ വാഗ്ദാനം ചെയ്യുന്ന ടാറ്റ സെക്യൂരിറ്റീസ് ലിമിറ്റഡ് എന്നിവയാണ് ഈ ഉപകമ്പനികൾ.
അതേസമയം വള‍ർച്ച സാധ്യതയുള്ള സ്വകാര്യ കമ്പനികളിൽ മൂലധന നിക്ഷേപമിറക്കി നേട്ടം കൊയ്യാൻ ശ്രമിക്കുന്ന ടാറ്റ ക്യാപിറ്റലിന്റെ കീഴിലുള്ള മൂന്ന് പ്രൈവറ്റ് ഇക്വിറ്റി ഫണ്ടുകളാണ് ടാറ്റ ക്യാപിറ്റൽ ഹെൽത്ത്കെയർ ഫണ്ട്, ടാറ്റ ഓപ്പർച്യൂണിറ്റീസ് ഫണ്ട്, ടാറ്റ ക്യാപിറ്റൽ ഗ്രോത്ത് ഫണ്ട് എന്നിവ.
2024 ജനുവരിയിൽ ടാറ്റ ക്യാപിറ്റൽ ഫിനാൻഷ്യൽ സർവീസസ് ടാറ്റ ക്യാപിറ്റലിലേക്ക് ലയിച്ചിരുന്നു.
അതേസമയം പ്രമുഖ റേറ്റിങ് ഏജൻസിയായ ക്രിസിൽ 2024 സെപ്റ്റംബറിൽ പുറത്തിറക്കിയ റിപ്പോർട്ട് പ്രകാരം, 2023-24 സാമ്പത്തിക വർഷ കാലയളവിൽ ടാറ്റ ക്യാപിറ്റൽ കൈകാര്യം ചെയ്യുന്ന ആസ്തി മൂല്യം ഏകദേശം 1.60 ലക്ഷം കോടി രൂപയായിരുന്നു.
