മുംബൈ: റിലയൻസ് പവറും (ആർ‌പി‌എൽ) അതിന്റെ അനുബന്ധ സ്ഥാപനവും ചേർന്ന് വാർഡെ പാർട്ണർസിൽ നിന്ന് 1,200 കോടി രൂപ വരെ സമാഹരിക്കാൻ പദ്ധതിയിടുന്നു. ഈ റിപ്പോർട്ടുകൾക്ക് പിന്നാലെ റിലയൻസ് പവറിന്റെ ഓഹരികൾ 6.60 ശതമാനം ഉയർന്ന് 22.60 രൂപയിലെത്തി.
ഈ ധന സമാഹരണത്തിനായി കമ്പനി വാർഡെ വാർഡെ പാർട്ണർസുമായി ധാരണാപത്രം (എം‌ഒ‌യു) ഒപ്പുവെച്ചു. ധന സമാഹരണം ബൈൻഡിംഗ് ഡോക്യുമെന്റുകളുടെ അന്തിമവൽക്കരണത്തിനും നിർവ്വഹണത്തിനും ബാധകമായ നിയമങ്ങൾ / ചട്ടങ്ങൾ അനുസരിച്ച് റെഗുലേറ്ററി അംഗീകാരങ്ങൾ ഉൾപ്പെടെ ആവശ്യമായ എല്ലാ അംഗീകാരങ്ങൾക്കും വിധേയമായി നടത്തുമെന്ന് ആർ‌പി‌എൽ പ്രസ്താവനയിൽ പറഞ്ഞു.
നിർദിഷ്ട ധനസഹായത്തിന്റെ നിബന്ധനകൾ അന്തിമമാക്കുകയും നിർദ്ദിഷ്ട ധനസഹായവുമായി ബന്ധപ്പെട്ട കൃത്യമായ രേഖകൾ നടപ്പിലാക്കുകയും ചെയ്തുകഴിഞ്ഞാൽ ആ വിവരം സ്റ്റോക്ക് എക്സ്ചേഞ്ചുകളെ അറിയിക്കുമെന്ന് കമ്പനി കൂട്ടിച്ചേർത്തു. ക്രെഡിറ്റ്, ക്രെഡിറ്റുമായി ബന്ധപ്പെട്ട ആസ്തികൾ എന്നിവയിൽ വൈദഗ്ദ്ധ്യമുള്ള ഒരു ആഗോള നിക്ഷേപ സ്ഥാപനമാണ് വാർഡെ പാർട്ണർസ്.
റിലയൻസ് ഗ്രൂപ്പിന്റെ ഭാഗമായ റിലയൻസ് പവർ സ്വകാര്യ മേഖലയിലെ വൈദ്യുതി ഉൽപ്പാദന, കൽക്കരി വിഭവ കമ്പനിയാണ്. 5,945 മെഗാവാട്ടിന്റെ പ്രവർത്തന പോർട്ട്‌ഫോളിയോയുള്ള കൽക്കരി, വാതകം, ജലവൈദ്യുത, പുനരുപയോഗ ഊർജം എന്നിവയെ അടിസ്ഥാനമാക്കിയുള്ള വൈദ്യുതി പദ്ധതികളുടെ ഏറ്റവും വലിയ പോർട്ട്‌ഫോളിയോയാണ് കമ്പനിക്കുള്ളത്.
