മുംബൈ: രാജ്യത്തെ പ്രമുഖ സ്വകാര്യ ടെലികോം ഓപ്പറേറ്റർമാരിൽ നിന്ന് 59.22 കോടി രൂപയുടെ പർച്ചേസ് ഓർഡറുകൾ ലഭിച്ചതായി അറിയിച്ച് എച്ച്എഫ്‌സിഎൽ. ഈ വാർത്തയ്ക്ക് പിന്നാലെ കമ്പനിയുടെ ഓഹരികൾ 7.29 ശതമാനം ഉയർന്ന് 66.95 രൂപയിലെത്തി. വിവിധ ടെലികോം സർക്കിളുകളിലെ ഫൈബർ ടു ദ ഹോം (FTTH) നെറ്റ്‌വർക്കിനും ദീർഘദൂര ഫൈബർ നെറ്റ്‌വർക്കിനുമായി ഒരു പ്രമുഖ ടെലികോം ഓപ്പറേറ്ററാണ് പർച്ചേസ് ഓർഡറുകൾ നൽകിയതെന്നും, ഇതിന്റെ ഭാഗമായി തങ്ങൾ ഹോം നെറ്റ്‌വർക്കിലേക്കും ദീർഘദൂര ഫൈബർ ശൃംഖലയിലേക്കും ഫൈബറിനായുള്ള ഒപ്റ്റിക്കൽ ഫൈബർ കേബിളുകൾ (OFC), റോളൗട്ടിനുള്ള സേവനങ്ങൾ എന്നിവ നൽകുമെന്നും എച്ച്എഫ്‌സിഎൽ പറഞ്ഞു. ഓർഡർ പ്രകാരം 2023 ജൂലായ് മാസത്തിനുള്ളിൽ കമ്പനി കേബിളുകളുടെ വിതരണം നടത്തും.
ഹൈ-എൻഡ് ട്രാൻസ്മിഷൻ, ആക്സസ് ഉപകരണങ്ങൾ, ഒപ്റ്റിക്കൽ ഫൈബർ, ഒപ്റ്റിക്കൽ ഫൈബർ കേബിളുകൾ (OFC) എന്നിവയുടെ നിർമ്മാണത്തിൽ ഏർപ്പെട്ടിരിക്കുന്ന ഒരു സാങ്കേതിക സംരംഭമാണ് എച്ച്എഫ്‌സിഎൽ. ടെലികോം സേവനദാതാക്കൾ, റെയിൽവേ, പ്രതിരോധം എന്നിവയ്ക്കായി ആധുനിക ആശയവിനിമയ ശൃംഖല സ്ഥാപിക്കുന്നതിൽ ഇത് പ്രത്യേകം ശ്രദ്ധിക്കുന്നു. 2022 മാർച്ചിൽ അവസാനിച്ച പാദത്തിൽ കമ്പനി 65.32 കോടി രൂപയുടെ ഏകികൃത അറ്റാദായം രേഖപ്പെടുത്തിയിരുന്നു.
