Capturing Business 360°

കാലത്തിനൊത്ത് അഡ്വാൻസ് ആകാൻ കേരള പൊലീസും; ഡാറ്റാ മാനേജ്‌മെന്റ് സംവിധാനത്തില്‍ ബ്ലോക്ക് ചെയിന്‍ സാങ്കേതിക വിദ്യ ഏര്‍പ്പെടുത്തുന്നു, സേനയില്‍ ഇനി തിരുത്തലോ ക്രമക്കേടോ നടക്കില്ല

ന്യൂഏജ് ന്യൂസ്

തിരുവനന്തപുരം: സംസ്ഥാന പൊലീസിന്റെ ഡാറ്റാ മാനേജ്‌മെന്റ് സംവിധാനത്തില്‍ ബ്ലോക്ക് ചെയിന്‍ സാങ്കേതിക വിദ്യ ഏര്‍പ്പെടുത്തുന്നു. കേസുകളുടെ അന്വേഷണത്തില്‍ പ്രധാന പങ്ക് വഹിക്കുന്ന ഏജന്‍സികളുടെ പരസ്പര സഹായത്തോടെയുള്ള പ്രവര്‍ത്തനം ഊര്‍ജിതമാക്കാനാണിത്. കേരള പൊലീസില്‍ ആദ്യമായാണ് ഈ സംവിധാനം വരുന്നത്. പദ്ധതിയെക്കുറിച്ച്‌ വിശദമായ നിര്‍ദ്ദേശം സമര്‍പ്പിക്കാനായി ഡി.ജി.പി ലോക്‌നാഥ് ബെഹ്ര പ്രത്യേക സമിതിയെ ചുമതലപ്പെടുത്തി. പൊലീസ് ആസ്ഥാനത്തെ എ.ഡി.ജി.പി അനന്തകൃഷ്ണന്‍ ചെയര്‍മാനായ സമിതിയില്‍ ബറ്റാലിയന്‍ ഡി.ഐ.ജി, സംസ്ഥാന ക്രൈം റെക്കാഡ്‌സ് ബ്യൂറോ എസ്.പി എന്നിവരാണ് അംഗങ്ങള്‍. സമിതി ഒരു മാസത്തിനകം റിപ്പോര്‍ട്ട് സമര്‍പ്പിക്കും. തുടര്‍ന്ന് പദ്ധതി പ്രാബല്യത്തിലാക്കും.

ബ്ലോക്ക് ചെയിനിന്റെ സാങ്കേതിക വശങ്ങള്‍ ഉള്‍പ്പെടെ പഠിക്കാന്‍ വിശദമായ ചര്‍ച്ചകള്‍ ഇക്കാര്യത്തില്‍ നടത്തേണ്ടി വരും. ഡി.ജി.പിയുടെ നിര്‍ദ്ദേശപ്രകാരം അനുവദിച്ച സമയപരിധിക്കുള്ളില്‍തന്നെ റിപ്പോര്‍ട്ട് സമര്‍പ്പിക്കുമെന്ന് സമിതി ചെയര്‍മാനായ എ.ഡി.ജി.പി പറഞ്ഞു. നിലവില്‍ കേസുകളുടെ അന്വേഷണ പുരോഗതി സംബന്ധിച്ച വിവരങ്ങള്‍ കൈമാറുന്നതില്‍ വിവിധ ഏജന്‍സികള്‍ തമ്മില്‍ പ്രായോഗികമായ പല ബുദ്ധിമുട്ടുകളും നേരിടുന്നുണ്ട്. ഇത് പരിഹരിക്കാനാണ് ബ്ലോക്ക് ചെയിന്‍ സംവിധാനം ഏര്‍പ്പെടുത്തുന്നത്.

ബ്ലോക്ക് ചെയിന്‍
സുതാര്യമായ തുറന്ന ഡാറ്റാബേസ് ആണ് ബ്ലോക്ക് ചെയിന്‍. ഈ ഡാറ്റാബേസിലേക്ക് ചേര്‍ക്കപ്പെടുന്ന ഓരോ കാര്യവും അതിന് മുന്‍പ് ചേര്‍ക്കപ്പെടുന്നവയുമായി ബന്ധപ്പെട്ട് കിടക്കും. ആര്‍ക്കും ഒരു വിധത്തിലുള്ള തിരുത്തലുകളോ കൃത്രിമ ഇടപെടലോ നടത്താന്‍ സാധിക്കില്ല. ഓരോ ഇടപാടും അടുക്കുകള്‍ അല്ലെങ്കില്‍ ബ്ലോക്കുകള്‍ ആയി പരിണമിച്ച്‌ അവസാനം ഒരു ചെയിന്‍ ആയി മാറുന്നു. ഈ അര്‍ത്ഥത്തിലാണ് ബ്ലോക്ക് ചെയിന്‍ എന്ന പേര് തന്നെ ഈ സാങ്കേതികവിദ്യയ്ക്ക് വന്നത്. ബ്ലോക്ക് ചെയിന്‍ ടെക്‌നോളജിയില്‍ ഒരിക്കലും ഒരു വിവരം അഥവാ ഇന്‍ഫര്‍മേഷനുകള്‍ സെന്‍ട്രല്‍ കമ്ബ്യൂട്ടറില്‍ ശേഖരിച്ച്‌ വയ്ക്കുന്നില്ല. പകരം ഒരു കൂട്ടം കമ്ബ്യൂട്ടറുകളിലായിരിക്കും വിവരങ്ങള്‍ ഉണ്ടാവുക. അതിനാല്‍ ഹാക്കര്‍മാരോ വിവരങ്ങള്‍ മോഷ്ടിക്കാന്‍ ശ്രമിക്കുന്ന മറ്റുള്ളവരോ സെന്‍ട്രല്‍ കമ്ബ്യൂട്ടറില്‍ നുഴഞ്ഞുകയറിയാലും ഡാറ്റകള്‍ ചോര്‍ത്താന്‍ പറ്റില്ല.