Capturing Business 360°

വ്യാജവാര്‍ത്തകള്‍ തടയാന്‍ കർശന നിർദ്ദേശവുമായി വാട്സ്ആപ്പിന് കേന്ദ്രത്തിന്റെ നോട്ടീസ്; നടപടികൾ വേഗത്തിലാക്കി കമ്പനി, ഫോര്‍വേഡ് മെസേജുകള്‍ക്ക് നിയന്ത്രണം ഏർപ്പെടുത്തുന്നു, ഇനി മെസേജുകള്‍ ഫോര്‍വേഡ് ചെയ്യുവാൻ സാധിക്കുക അഞ്ച് പേര്‍ക്ക് മാത്രം

ന്യൂഏജ് ന്യൂസ്

ന്യൂഡെല്‍ഹി: വാട്‌സ്‌ആപ് വഴി വ്യാജ വാര്‍ത്തകള്‍ പ്രചരിച്ച്‌ ആള്‍ക്കൂട്ടം നടത്തുന്ന ആക്രമണങ്ങളില്‍ ഈയടുത്ത് ഒരുപാട് പേര്‍ക്ക് ജീവന്‍ നഷ്ടപ്പെട്ടിരുന്നു. ഇത് തടയാനായി വ്യാജ വാര്‍ത്തയുടെ ഉറവിടം കണ്ടെത്താനുള്ള മാര്‍ഗങ്ങള്‍ കേന്ദ്രം വാട്‌സ്‌ആപ് കമ്ബനിക്ക് കത്തയച്ചിരുന്നു. ഇതിന്റെ ബാഗമായി വ്യാജവാര്‍ത്തകള്‍ തടയാന്‍ മാര്‍ഗങ്ങള്‍ സ്വീകരിക്കുകയാണ് വാട്‌സ്‌ആപ്.

ഒരു മെസേജ് തന്നെ ഒരുപാട് നമ്ബറുകളിലേക്ക് ഫോര്‍വേഡ് ചെയ്യുന്നതിന് പരിധി നിശ്ചയിക്കാനാണ് വാട്‌സ് ആപിന്റെ പദ്ധതി. പുതിയ രീതി പ്രകാരം സന്ദേശങ്ങള്‍ക്ക് പുറമെ, വീഡിയോകളും ഇമേജുകളും അഞ്ചില്‍ കൂടുതല്‍ ആളുകള്‍ക്ക് ഫോര്‍വേഡ് ചെയ്യാന്‍ സാധിക്കില്ല. അഞ്ചില്‍ കൂടുതല്‍ ചാറ്റുകള്‍ ഫോര്‍വേഡിങ്ങിനായി സെലക്‌ട് ചെയ്താല്‍ ഈ ഫോര്‍വേഡ് ബട്ടണ്‍ നീക്കം ചെയ്യുന്ന രീതിയുള്ള സംവിധാനമാണ് വാട്‌സ്‌ആപ്പ് ഒരുക്കിയിരിക്കുന്നത്.

വ്യാജവാര്‍ത്തകള്‍ തടയണമെന്ന് ആവശ്യപ്പെട്ട് ഇന്ത്യന്‍ സര്‍ക്കാര്‍ രണ്ടാമത്തെ നോട്ടീസ് അയച്ചതിന് പിന്നാലെയാണ് ഇക്കാര്യത്തില്‍ നടപടികള്‍ കര്‍ശനമാക്കാന്‍ വാട്‌സ് ആപ് നിര്‍ബന്ധിതമായത്. വാട്‌സ് ആപിലുടെ പ്രചരിക്കുന്ന വ്യാജവാര്‍ത്തകള്‍ രാജ്യത്തെ ആള്‍ക്കൂട്ട കൊലകള്‍ക്ക് കാരണമായതിനെ തുടര്‍ന്നാണ് കര്‍ശന നടപടികള്‍ സ്വീകരിക്കാന്‍ സര്‍ക്കാര്‍ നിര്‍ദേശിച്ചത്. ആള്‍ക്കൂട്ട കൊലപാതകത്തിനെതിരെ സുപ്രീം കോടതിയും രംഗത്ത് വന്നിരുന്നു.

നേരത്തെ വ്യാജ വാര്‍ത്തകളെ തടയുന്നതിനായി വാട്‌സ് ആപ് ഫോര്‍വേഡ് മെസേജുകള്‍ക്ക് മുകളില്‍ പ്രത്യേക ലേബല്‍ നല്‍കിയിരുന്നു. ഇതിന് പിന്നാലെയാണ് വ്യാജ വാര്‍ത്തകള്‍ തടയുന്നതിനായി വാട്‌സ് ആപിന്റെ പുതിയ നീക്കം.