Capturing Business 360°

വിവിഐപി യാത്ര : എയര്‍ ഇന്ത്യക്ക് കേന്ദ്രം നല്‍കാനുള്ളത് 325 കോടി

വിദേശ രാജ്യങ്ങളിലേക്ക് വിവിഐപികള്‍ക്ക് വിമാനം ചാര്‍ട്ട് ചെയ്ത ഇനത്തില്‍ കേന്ദ്ര സര്‍ക്കാര്‍ എയര്‍ ഇന്ത്യക്ക് നല്‍കാനുള്ളത് 325 കോടി രൂപ. പ്രധാനമന്ത്രി, രാഷ്രപതി, ഉപരാഷ്ട്രപതി തുടങ്ങിയവര്‍ നടത്തിയ വിദേശ യാത്രകളുടെ നിരക്കുകളാണിത്.

വിവരാവകാശ നിയമ പ്രകാരം ലഭിച്ച രേഖകള്‍ വഴിയാണ് കേന്ദ്ര സര്‍ക്കാര്‍ എയര്‍ ഇന്ത്യക്ക് നല്‍കാനുള്ള തുകയുടെ കണക്ക് വ്യക്തമായിരിക്കുന്നത്. 2018 ജനുവരി 31 വരെയുള്ള കണക്കനുസരിച്ച്‌ 325.81 കോടി രൂപയുടെ ബില്ലുകളാണ് വിവിഐപി ചാര്‍ട്ടര്‍ വിമാനങ്ങള്‍ക്കായി നല്‍കിയിരിക്കുന്നത്. ഇതില്‍ 84.01 കോടി രൂപ കഴിഞ്ഞ സാമ്ബത്തിക വര്‍ഷത്തിലേതാണ്.

പ്രതിരോധ മന്ത്രാലയം, വിദേശകാര്യ മന്ത്രാലയം, പ്രധാനമന്ത്രിയുടെ ഓഫീസ്, ക്യാബിനറ്റ് സെക്രട്ടറിയേറ്റ് എന്നിവരാണ് ഈ തുക എയര്‍ ഇന്ത്യക്ക് നല്‍കേണ്ടത്. വിദേശകാര്യ മന്ത്രാലയമാണ് ഏറ്റവും കൂടുതല്‍ തുക നല്‍കാനുള്ളത് എന്നാണ് എയര്‍ ഇന്ത്യയുടെ കണക്കുകള്‍ വ്യക്തമാക്കുന്നത്. 178.55 കോടി രൂപ വിദേശകാര്യ മന്ത്രാലയവും, ക്യാബിനറ്റ് സെക്രട്ടറിയേറ്റും പ്രധാനമന്ത്രിയുടെ ഓഫീസും 128.84 കോടി രൂപയും പ്രതിരോധ മന്ത്രാലയം 18.42 കോടി രൂപയുമാണ് എയര്‍ ഇന്ത്യക്ക് നല്‍കാനുള്ളത്.

ഇത്രയും തുക നല്‍കാന്‍ ഉണ്ടായിട്ടും നഷ്ടത്തിലായ എയര്‍ ഇന്ത്യയെ സ്വകാര്യവത്കരിക്കാനുള്ള ശ്രമത്തിലാണ് കേന്ദ്ര സര്‍ക്കാര്‍. 50,000 കോടി രൂപയുടെ കടബാധ്യതയാണ് എയ‍ര്‍ ഇന്ത്യയിക്ക് നിലവില്‍ ഉള്ളത്. കഴിഞ്ഞ വര്‍ഷമാണ് എയ‍ര്‍ ഇന്ത്യ സ്വകാര്യവത്ക്കരിക്കാന്‍ കേന്ദ്ര സര്‍ക്കാര്‍ തീരുമാനിച്ചത്.